​Омма олдида гапириш сири

Омма олдида чиқиш қилиб тураман. Кўп марта янги гуруҳ ўқувчиларига дарс ўтишимга тўғри келган.

Видеоларга тушаман. Қолаверса, одатда тажрибаси мени ёшимданда катта бўлган устозларга тренинг ўтишимга тўғри келади.

Ҳаяжонланиш бўлади, албатта. 2 дақиқа. Дарров ҳаяжон йўқолади.

Кейин эса дўстимга гапиргандек дарс ўтиб кетавераман.

Кел, қадрдоним, сенга ўзимнинг омма олдидаги қўрқувимни енгиш услубларимни ўргатаман:

1. Қўрқув сабаби – мавҳумлик. Сени нима кутаётганини, дарсинг қандай ўтишини билмасанг, ҳаяжонга тушасан. Давоси – тайёргарлик. Дарсингни ипидан игнасигача режалаштириб ол. Мабодо “бу ишламай қолса, буни ишлатаман” деган тарзда «б» режани ҳам тузиб қўйсанг, янада яхши бўлади.

2. “Одамлар қандай қабул қиларкин?”, “Шарманда бўлмасмиканман?” – деган ваҳималар пайдо бўлса, ўзингга эслат: барибир 100 йилдан кейин ҳамма чириб йўқ бўлиб кетади. Сен ҳам. Одамлар ҳам.

3. Аудитория ўта тажрибали бўлса, шуни ўйла – ҳаттоки бирор барг ҳам Аллоҳнинг изнисиз тушмайди. Аллоҳ сени айнан шу ерда гапиришингни тақдир қилган. Демак, улар билмайдиган ниманидир сен биласан.

4. Қўрқув, ҳаяжон, стресс – ривожланаётганингни билдиради. Фойдаланиб қол. Бу катта неъмат. Кейин хоҳласанг ҳам бу туйғуларни тополмайсан.

5. Имкон бўлса, дарсингни биринчи катта аудиторияда эмас, кичикроқ танишлар олдида ўтказиб синаб ол. Қаерида бўшлиқ бўлса, тўлдириб ол.

6. Агар томошабинлар жуда ақлли бўлиб туюлаётган бўлса – фақат туюляпти. Биз бандалар ҳаммамиз жоҳилмиз.

7. “Мен гапирадиган мавзуни улар аллақачон билишсачи?” деган қўрқув бўлса, эслаб қол – билим беришдан ташқари, эслатма бериш ҳам катта хизмат.

Шунда ҳам ҳаяжонинг босилмаса сенга риторик саволим бор:

Нега қаланғи-қасанғи бетайинлар, очиқ-сочиқ кийимларда омма олдига чиқишга уялмайди, сен эса яхшилик тарқатаман деб хижолат чекишинг керак?

Ишларингга омад!

@Ustoz_kundaligi

— Шу қизимни чиқариш учун хорижда ишлаяпман. Болам-чақам деб юрибмизда..

— Қиз чиқариш шунчалик катта харажат талаб қиладими? 

— А энди, тўйни каттароқ қилмасанг бўлмайди. Танишлар кўп. Қолаверса, аёлларнинг латта-путтасини биласанку. 

— Шу тўйни ихчам ўтказиб, латта-путталарни йўқ қилсангиз бўлмайдими? 

— Йўғе, одамлар нима дейди?!

— Болам-чақам деб эмас, аслида, "одамлар нима дейди"си учун ишлаб юрган экансизда амаки..

@Ustoz_kundaligi

Видеодаги спикерлар мен ва Муҳаммад.

Бугун Юксалиш (Олмалиқ) мактабида тренинг ўтдик.

Кейинги манзил қайси ўқув даргоҳи бўлсин? 😎

Yuksalish Maktabida o‘qituvchilarimiz uchun o‘tkazilgan ilhomlantiruvchi mahorat darsidan yorqin lavhalar!

Bu darsda ta’lim sifatini oshirish, darslarni yanada qiziqarli va samarali o‘tish bo‘yicha o‘z bilim va tajribalarini ulashgan kuchli mutaxassislar — @ustoz_kundaligi asoschisi Mohir Mirzakhmedov va @muallimmuhammad kanali egasi Uralov Muhammad biz bilan bo‘lishdi.

📌 “Qanday qilib o‘rgatishni o‘rgataman” tamoyili asosida tashkil etilgan ushbu mahorat darsida:
🔹 Samarali dars o‘tish metodikalari
🔹 Murakkab mavzularni soddalashtirish yondashuvlari
🔹 O‘quvchilar bilan samarali muloqot qurish usullari
muhokama qilindi.

🎓 O‘qituvchilarimiz yangi yondashuvlar bilan tanishib, o‘z pedagogik mahoratlarini yanada boyitish imkoniyatiga ega bo‘lishdi.

🤝 Ushbu foydali uchrashuvni tashkillashtirgan Yuksalish Maktabi direktori — Ilhomjon Boborahimovga chuqur minnatdorlik bildiramiz.

⚡️ YUKSALISH MAKTABLARI — taʼlim va tarbiya birlashgan dargoh!

📍  YUKSΛLISH maktabi | OLMΛLIQ

💬 Murojaat uchun :
📞 +998881314114
🧑‍💻 @Yuksalish_olmaliq

📱 Telegram | 📱 Instagram

Нега мақолалар таржимаси тўхтаб қолди?

Педагогика бўйича хорижий мақолалар таржимасини бошлаган эдик.

Жамоа тузгандим. Зўр кетаётган эди.

Бир нарсани ҳисобга олмабман:

Энг фойдали мақолаларда муалликлик ҳуқуқи бор экан. Таржимага рухсат йўқ..

Мақола таржимасидан кўра — муаллифлик ҳуқуқи йўқ, таржима қилишга рухсат бўлган мақола топиш қийин бўляпти.

Сиздан бир илтимос:

Ўзбек ўқитувчилар жамиятига фойдали деб билган, таржимага рухсат берилган мақола, матн, видеоларингизнинг ҳаволасини изоҳда улашинг.

Биз таржима қилайлик. Ўзбекистон устозларига манфаатимиз тегсин!

@Ustoz_kundaligi

Дўстимиз кеч қолди:

“Ухлаб қолгандирда” – деди одатда ухлаб қолувчи танишимиз.

“Намозини йўлда ўқиётгандирда” – деди намозига қаттиқ қаровчи дўстимиз.

“Тирбандликка тушиб қолган бўлса керак” – деди машинаси бор танишимиз.

“Бетайин, вақтига умуман қарамайди у!” – деди бетайинроқ дўстимиз.

Хулоса:

Ҳамма ўзидан келиб чиқиб гумон қилади!

Айтишадику:

Ўғри дунёдаги ҳаммани — ўғри деб ўйлайди.

@Ustoz_kundaligi

​Айб фақат менда эмас экан..

Мактаб вақтлари тарихга қўшимчага борардим.

Устоз уйга 5 та мавзу ўқиб келишга берардилар. Ўқиб ҳеч тушунмасдим:

Қайта-қайта ўқирдим. Роса қийналардим. Ўзимни калтафаҳмдай ҳис қилардим.

Узоқ вақт ўтди.

Бу ўқув йили яна мактаб дарслигини қўлимга олишга мажбур бўлдим.

Муаммо қаердалигини тушуниб етдим:

Дарсликларимиз ўта тушунарсиз — ғализ ёзилган экан.

Инглиз, рус, қисман турк адабиётини ўқиб кўрган ўқитувчи сифатида айтаман:

Бизни тарих дарсликларини баъзи пайт қайта-қайта ўқишга мажбур бўляпман. Англай олмаяпман..

Мисол учун қуйидаги расмдаги матнга қаранг. Америка ҳиндулари ҳақида.

Бир марта ўқиб кўринг. Тушунсангиз — қойил!

Лекин олдинги китоблардан кўра анча янгиланиш борку, ҳали ҳам мукаммал эмас:

Чалкаш гаплар кўп. Google таржимондан таржима қилинганга ўхшайди..

Хуллас, ўқувчиларни айблайвермай, шу дарсликларни тўғирлаб қўйсак бўлмасмикан-а?

- Танқид қилмай ечим берсанг бўлмайдими, ақлли?
- Ўзим учун ечим топганман. ChatGPT'да матнни соддалаштириб оламан.

P.s: Сиз расмдаги матнни қандай қилиб тушунарли қилиб ёзган бўлардингиз? Изоҳга ёзиб қолдиринг.

@Ustoz_kundaligi

Сенинг қандай эҳтиёжинг бор?

Психолог Авраам Маслоу томонидан тузилган пирамидада инсоннинг эҳтиёжлари кетма-кетликда тартибга келтирилган.

Пирамида беш даражадаги эҳтиёжларни ўз ичига олади, қуйи даражалар асосий талабларни ва юқори даражалар мураккаброқ эҳтиёжларни ифодалайди.

5. Физиологик эҳтиёжлар: Бу ҳаво, сув, озиқ-овқат, бошпана, уйқу ва кийим-кечак каби яшаш учун зарур бўлган энг асосий эҳтиёжлардир.

Мисол учун, агар кимдир оч ёки чанқаган бўлса — унинг асосий эътибори бу эҳтиёжларни қондиришда бўлади.

4. Хавфсизлик эҳтиёжлари: Физиологик эҳтиёжлар оқилона қондирилгач, асосий эътибор хавфсизлик эҳтиёжларига, жумладан шахсий хавфсизлик, молиявий барқарорлик, саломатлик ва жисмоний ва ҳиссий зарарлардан ҳимояланишга ўтади.

Масалан, барқарор даромад келтирадиган иш, хавфсиз маҳаллада яшаш ёки тиббий хизматдан фойдаланиш хавфсизлик эҳтиёжларини қондиради.

3. Севги ва жамоага мансублик: Бу эҳтиёжлар муносабатларни шакллантириш, севги, меҳр ва ижтимоий гуруҳларга, дўстлик ва яқин муносабатларга мансублик туйғусини ҳис қилишни ўз ичига олади.

Бу эҳтиёж оила, дўстлик, ишқий муносабатларни ўз ичига олади. Бошқалар томонидан қабул қилинган ва севилганини ҳис қилиш бу даражадаги эҳтиёжни қондиради.

2. Обрў-эътибор ва ҳурмат эҳтиёжи: ҳурматга бўлган эҳтиёж ўз-ўзини ҳурмат қилиш (ишонч, муваффақият) ва бошқаларнинг ҳурматини (бошқалар томонидан тан олиниши, қадрланиши, мақоми ва ҳурмати) ўз ичига олади.

Масалан, мукофотлар олиш, шахсий мақсадларга эришиш, тан олиниши ёки ҳурматли лавозимга эга бўлиш.

1. Ўз-ўзини англаш: Бу Маслоу пирамидасидаги энг юқори даража бўлиб, ўзини ўзини тафаккур қилиш, шахсий ўсиш, ўз потенциалига эришиш ва ижодий ёки интеллектуал ҳаракатларга интилиш истагини ифодалайди.

Қолаверса, эҳтиросга интилиш, шахсий ривожланиш билан шуғулланиш, билимга интилиш ва ўзининг ноёб салоҳиятини рўёбга чиқариш ҳам эҳтиёжларнинг энг олийси ҳисобланади.

Шуни таъкидлаш керакки, Маслоу назариясига кўра, одамлар одатда қуйи даражадаги эҳтиёжлари қондирилгандагина кейинги эҳтиёжга кўтарилади.

@Ustoz_kundaligi

Араб тилидан дарс ўтувчилар кам. Дарс бериб, канал юритувчилар унданда кам.

Уларнинг ичидан ишончлилари саноқли.

Саноқли каналлардан бири, қадрдонимиз — Arabeyati Muhammadjon Ustoz

Араб тилидан PhD даражасига эга бўлиб, ҳозирда 5000 дан ортиқ ўқувчига дарс бериб улгурдилар.

Уланинг, араб тилидан билимингизни оширинг!

Тавсия қиламан!

Тоғ сафаридан фалсафий хулосаларим

1. Яхшилаб қарасанг, тошлар ичида ҳам гуллар бўлади.

2. Тепага чиқиш — машаққат. Пастга тушиш — роҳат, деб ўйлайсан. Аслида пастга тушиш ҳам қийин.

3. Одам кўп бўлишининг ҳам яхши тарафи бор — адашиш камроқ бўлади.

4. Тўғри йўлда юрмоқчимисан — сендан аввалгилар юрган йўлга боқ.

5. Энг катта машаққатли чўққига манзилга оз қолганда дуч келасан. Кўпчилик бу синовдан ўтолмай, қайтиб кетади.

6. Машаққатли сафарда инсоннинг кимлиги: турмуш тарзи, ўзига ишончи, нафсини бошқариши — ҳаммаси очилади.

7. Тепага чиқишда сени қийнаган тошлар, тушаётганингда фойда беради.

8. Сенинг юкингнинг оғирлигини фақат ўзинг биласан. Бошқаларга қизиқ эмас.

9. Текис йўлда юриш, текис жойда ухлаш ҳам неъматлигини тушуниб етасан.

10. Чиқишда эмас, тушаётганда йиқилиш кўпроқ бўлади.

11. Ҳамма шаршарани кўриш учун боради, аммо чиқиш жараёни кўпроқ эсда қолади.

12. Тез югуриб кетганлар эмас, давомий юрганлар манзилга аввал етиб боради.

13. Чиқишда иссиқ бўлса, қайтишда салқин бўлади.

14. Йиқилсангиз, ҳеч ким кулмайди. Сабаби — ҳамма йиқилиш хавфида бўлади.

15. Энг тоза ҳаво, зилол сув тепаликда бўлади.

16. Биринчи бўлиб юрсанг, кўп хатó қиласан. Яхши тарафи, қолганларни адашишдан сен асраб қоласан.

17. Тоғнинг тепасига чиқиб, энди фахрланаман десанг, оддий чўпонлар у ерда мол боқиб юрган бўлади.

18. Гўзаллик шундоқ ёнингда яширинган. Кўриш осон эмас: иссиқда, тоғу тошлардан юришинг керак.

Хуллас, сафар қилиб тур:

Ҳаётингга маъно киради. Ўзингга ишонч ошади. Хотираларинг кўпаяди. Янги фикрлар келади..

@Ustoz_kundaligi

Оналар васвасаси: сунъий тақиқлар муаммоси

- "Укангни мактабга ташлаб кел," дедилар онам.

"Ия, 6-синф болаку. Мактаб яқин бўлса, машина йўл бўлмаса, ўзи кетса бўлмайдими?"
"6-синфимда мен ундан 10 баробар узоқ жойга ўзим борардимку, она?"

- "Йўқ, ҳозир замон бошқа!"

Бу каби суҳбатлар доимо бир хил жавоб билан тугарди:

"Ҳозир замон нотинч! Ҳозир бошқа замон!"

Ҳақиқатан ҳам, шундайми?

"Thinking, Fast and Slow" китобида "мавжудлик эвристикаси" (availability heuristic) деган маълумотга кўзим тушди:

Мавжудлик эвристикаси — эслаш осон бўлган маълумотлар орқали хулоса чиқариш.

Яъни, миямиз катта маълумотларни таҳлил қилишга эринади ва энг осон, кўзга кўринган, ҳиссиётга бой маълумотларни олади. Шуларга асосланиб хато хулоса чиқаради.

Мисол: Телевизорда самолёт аварияси ҳақида эшитдингиз. Шундан сўнг, миянгиз самолёт — ўта хавфли транспорт деб ўйлайди.

Нега?

Чунки бу маълумот ҳиссиётга бой, эслаш осон ва яқинда эшитилган.

Аслидачи?

НСС берган статистикага кўра, самолёт машинадан 100 баробар, автобусдан эса 8 баробар хавфсиздир.

Иккинчи мисол: Акулалар ҳақида кўп кино кўриш денгиздан қўрқишга сабаб бўлади.

Статистика эса буни қандай кўрсатади?

Акула ҳужумидан кўра бошга кокос тушиб ўлиб кетиш эҳтимоли 20 баробар кўпроқ.

Ҳа, энди тушундим:

Нега ота-оналар бугун аввалгидан кўра кўпроқ қўрққан ва хавотирли.

Бунга сабаб: Телевизор ва оммавий ахборот воситалари одамларни қўрқитиш учун турли «ваҳима» хабарларини тарқатади.

Айниқса бизнинг каналлар — "Ваҳима солиш 2025" танловида юқори ўринларга чиқишса ажаб эмас..

Энди менинг ваҳимамни эшитинг:

Ваҳималарга қулоқ солавериш бизни ўта эҳтиёткор қилиб қўяди — "уни қилма, буни қилма, дарахтга чиқма, қум ўйнама, у ерга борма, уйда жим ўтир!"

Бола қийинчилик кўрмайди. Энергияси сўнади. Эркаклигини тўлиқ ривожлантира олмайди.

Ибн Халдун мамлакат таназзулга учрашида шаҳарда ўсган эркакларнинг ўрнини айтиб ўтади:

"Саҳро ёки қишлоқ болалари оғир шароитда, курашда, эҳтиёж ичида улғайгани учун жасур бўлади. Шаҳарликлар эса фаровонлик ва юмшоқликда улғайганлиги сабабли, уларда довюраклик кам бўлади, қўрқоқлик устун бўлади."

Яъни, ортиқча тақиқлар билан ўсган болалар заифлашади, ўзига ишончсизлик ривожланади.

Жанговар муҳит, қийинчиликсиз ўсган болалар психологик жиҳатдан заиф ва қўрқоқ бўлади.

Ибн Халдуннинг назариясига кўра, саҳро ёки қишлоқ болалари келажакда ўлкани босиб олади, давлатни эгаллайди.

Хулоса қилиб айтганда,

1. Ваҳималарга таяниб хулоса чиқарманг.

2. Ушбу хулосаларга таяниб болаларга кўп тақиқ қўйманг.

P.S: Ваҳима қилинаётган муаммолар йўқ демоқчи эмасман. Бор, бўлган ва бўлади.

Айтмоқчи бўлганим — ваҳимага тушиб, болаларга ортиқча тақиқ қўйманг.

@Ustoz_kundaligi

Амир Олимхон хазинаси

Амир Олимхон деганда кўз олдимизга улкан бойлик келади.

Бухоро амири бўлган бу кишининг олтин-кумуш хазинаси — бўйи 35, эни 14 метрли тепаликни ташкил қилган.

Тахминан бугунги 80 та денгиз контейнерига тенг бойлик!

Аммо бу хазинадан халқ фойда кўрмади. Амирлар уни фақат йиғиш ва кўпайтириш билан овора бўлган.

Руслар ҳужум қилиши хавфи туғилганда, амирлардан қурол-яроғ учун пул сўрашган — улар рад этган.

Натижада руслар Бухорони босиб олди. Бойлик эса вагонларга ортилиб, олиб кетилди. Амир бойликларини ташлаб қочди.

Амир Олимхоннинг невара куёви айтишича, ҳатто фарзандларига ҳам ҳеч нарса қолмаган.

Олимхон оддий кийимда, соддагина ҳолатда вафот этган.

Хулоса оддий: мулк қанча катта бўлмасин, агар ишлатилмаса — фойда бермайди.

Бухоро Амирининг тиллаларини санаб, афсусланамиз.

"Ишлатсанг ўлармидинг?" — деб танқид қиламиз.

Аммо энг ачинарлиси — ўзимиз ҳам худди шу хатони такрорлаяпмиз..

Бизда Амирданда катта бойлик бор!

Ҳа, тўғри ўқидингиз.

Бу бойлик — ВАҚТ.

Қанчадан-қанча баракали тонглар, кунлар, тунларни исроф қиляпмиз.

Ачинаман — эҳ, шунча вақтда нималар қилиш мумкин эди-я?

Қадимда олимлар ҳатто овқатланишдан ҳам вақт қизғаниб, илм билан машғул бўлган.

Шайх Ҳазратлари эса вақт тежаш учун таҳоратгача кийимининг тугмаларини ечиб борганларини
эшитгандим.

Ишончим комил: ҳозир Бухоронинг исталган Амирига “бир кун ибодат қиласанми, ё хазинангними танлайсан?” десак — иккиланмай биринчисини танларди.

Хуллас, нима демоқчиман?

Бировнинг хазинасига ачиниб, ўз бойлигимиз — вақтимизни унутмайлик, азизлар!

@Ustoz_kundaligi

​Тошкент шаҳрида жонли учрашув!

Замонавий педагог курси асосчилари камина ва дўстим, ҳамкасбим — Муҳаммад тренинг ташкил қиляпмиз.

Тренинг вақти: Шанба 3-май
18:00 - 20:00

Жонли учрашув режаси:

18:00 - 18:50 "Дарсни самарали ўтиш йўллари"
18:50 - 19:00 танаффус - кофе бреак
19:00 - 20:00 "Ўқувчи билан тўғри муносабат ўрнатиш" + савол-жавоб.

Манзил: "Ground Zero" coworking

Мўлжал: Ҳамид Олимжон метроси, китоб олами кутбхонаси.

Қатнашинг. Манфаатли бўлади.

10 кишигина оламиз. Жойимиз чекланган!

Учрашув нархини билиш ва рўйхатдан ўтиш учун алоқага чиқинг @light_upon_light2

Китобсиз ўтган 10 кун

Сафар, касаллик, ички муаммолар сабабли 10 кун китоб ўқий олмадим.

Аксига олиб, китоб ўқиш марафоним ҳам тугаганди. Жазодан қўрқиб, ўқиб турардим.

Шу кун ичида ўзимда қуйидаги ўзгаришларни сездим:

1. Янги фикр, ғоялар келмай қолди;

2. Ишга, ўқишга мотивациям тушди;

3. Кўп стрессга тушдим;

4. Самарадорлигим тушиб кетди;

5. Келажакка ишончим йўқолди;

6. Қалбимда моддиятга муҳаббат ошди;

7. Блог ёзгим келмай қолди;

8. Ўта зерикарли одамга айландим;

9. Нутқим равонлигини йўқотдим;

10. Ўзимга ишонч тушди.

Сиз ҳам юқоридагиларни ҳис қилмоқчимисиз?

10 кун китоб ўқиманг!

Тез орада китоб ўқиш марафонини қайта ташкил қиламиз. Қўшилинг!

@Ustoz_kundaligi

«Халқимиз фақат емоқ-ичмоқдангина юксак чўққиларни забт эта олади. Илм-фанга ҳам шунчалик ғайрат қилганида эди... »

Шайх Муҳаммад Содиқ Муҳаммад Юсуф

@Ustoz_kundaligi

Бахт нима? 

Ҳамма бахтни ҳар хил тасаввур қилади: 

Бойлик. Саломатлик. Оила. Қалб хотиржамлиги.

Менинг эса шахсий бахт формулам бор:

1. Бахт бу — эрталаб уйқуга тўйиб уйғонишинг. 

2. Бахт бу — ҳашаматли жойларда ўтириб, расмини инстаграмга жойлашга эҳтиёж сезмаслигинг. 

3. Бахт бу — футбол кўргинг келсада, ухлай олишинг. 

4. Бахт бу — сартарош соч турмагингни бузиб қўйса, кайфиятинг тушмаслиги. 

5. Бахт бу — қўшнинг янги машина олса, хотиржам ухлай олишинг. 

6. Бахт бу — кимдир сендан охират ишида ўтиб кетса, хотиржам ухлай олмаслигинг. 

7. Бахт бу — бахтсизликни нормал қабул қила билишинг. 

8. Бахт бу — обуначилар постларингни ўғирлаб, тагига ўзининг исмини ёзиб қўйиши. 

9. Бахт бу — китоб дўконига борганда кўзинг чақнай олиши.

10. Бахт бу — оилавий жанжалларни исроф қилмай, хулоса билан якунлай олишинг. 

11. Бахт бу — бемаза овқат еб, бемазалигини сезмай қолишинг.

12. Бахт бу — ўз жоҳиллик даврингни эслаб, хижолатдан уйқуинг ўчиб кетиши.

13. Бахт бу — уришиб қолсанг, биринчи бўлиб кечирим сўрай олишинг. 

14. Бахт бу — қилган яхшиликларинг ёдингдан чиқиб қолиши. 

15. Бахт бу — фарзандингни севишда меъёрни ушлай олишинг. 

16. Бахт бу — қалбингнинг тўри Эгаси учун бўш бўлиши. 

17. Бахт бу — қийинчилик вақти йиғласангда, қалбингда Аллоҳга ношукр бўлмаслигинг.

Энг катта бахт:

18. Бу дунёда комил бахт йўқлигини ичингдан англаб етишинг!

Бахтиёрлар жаннатдадирлар, унда мангу қолувчидирлар (11:108)

Сен учун бахт нима?

@Ustoz_kundaligi

Қизим креон деган дори ичарди

Билсак, таркибидаги — панкреатин чўчқанинг ошқозонидан тайёрланаркан. 

Ўрнини босадиган ҳалол дори қидиряпмиз:

Роса изладик. Тополмаяпмиз. 

Ўзим учун хулоса:

Таълим, инновация, ишлаб чиқаришга бепарволик — нафақат дунё, балки эътиқодимизга ҳам таъсир қилади.

@Ustoz_kundaligi

1. Навбат бузадиганларни ёмон кўраман.

2. Навбат бузганларга индамайдиганларни эса унданда баттар.

Биринчисига — амал қилдим, иккинчисида — ўзим ҳам қийналдим.

- Ўзинг амал қилмасанг нега ёзяпсан?

- Айтилганку, энг камида қалби билан ёмон кўрсин деб:

«Қайси бирингиз бир ёмонликни кўрса, уни қўли билан тузатсин. Агар (қўли билан қайтаришга) кучи етмаса, тили билан қайтарсин. Бунга ҳам кучи етмаса, қалбан ёмон кўрсин. Бу эса имоннинг энг заиф даражасидир» (Муслим ривояти).

@Ustoz_kundaligi

Китоб ютиб олинг!

Бир кишига китоб совға қиламан. 🎁

Шарти: 

Юқоридаги ушбу постни ўқув муассасангиз ўқитувчилар гуруҳига юборасиз. 

Агар сизда ўқитувчилар гуруҳи бўлмаса 5 та устозга юборишингиз мумкин. 

Шарт бажарганингиз тасдиғи ўлароқ screen — расмга олиб ушбу пост изоҳига юборинг.



Ўйин тугади

Устоз кундалиги каналида чиқарилган 16 фойдали пост:

1. Ўқувчи билан тил топишишнинг олтин қоидалари

2. Дарсларни фаол ўтишнинг 8 йўли:

3. Уй вазифасини бажартиришда "айёр" бир усул

4. Қандай қилиб перфекционизмдан воз кечиш мени яхшироқ устоз бўлишимга ёрдам берди?

5. Адолатсиз хулоса: “Ҳало Эффекти”

6. Ўсмир билан мулоқот: икки самарали тактика ҳақида

7. Пичирлашнинг сирли кучи ёҳуд устозларга ибрат бўладиган воқеа

8. Баҳона тўқиб берма

9. Хориж тажрибасидан бир чимдим: “Сирли ўқувчи методикаси”

10. Дарсда зериккан ўқувчи: нима қилиш керак?

11. Сўконғич ўқувчи ва устоз реакцияси

12. Иқтидорли “иккичилар” психологияси

13. Суҳбат кучи: ўқувчи билан тарбиявий суҳбат қуришнинг 5 усули

14. Ёлғончи болалар ва болалар ёлғончилиги ҳақида

15. Ўқитувчи темирданмас-ку ёҳуд педагогнинг касбий куйиши ҳақида

16. Шовқинли синфни тинчлантиришнинг 5 та самарали услублари

Постни ҳозироқ ўқитувчиларга улашинг. Уларга манфаат етишига сабабчи бўлинг!

Таълим курсларида бизга ўргатилмайдиган нарсалардан бири — қандай қилиб кўп гапираётган ўқувчиларни тинчлантириш йўллари.

Бугун шовқинли синфни тинчлантиришнинг 5 та самарали услубларини кўриб чиқамиз.

Мақолани ўқинг: https://telegra.ph/Darsda-shovqinni-bostirish-usullari-04-24

@Ustoz_kundaligi

Физика устозимиз айтиб қолдилар:

Бир ўқувчимиз доимо "физика энг зўр фан!", дер экан. Хурсанд бўларканлар.

Ногаҳон, ўша ўқувчимиз инглиз тили устозига ҳам худди шу "инглиз тили энг зўр фан!" деганини эшитиб қолибдилар.

Иккала устоз сиқувга олиб "xўш, қайси фан энг зўри?", деб сўрашса

Инглиз тилида ўтилган физика! - деб жавоб берибди. 😂

@Ustoz_kundaligi

Қашшоқлик нима?

Қашшоқлик — тўйингга "мерс" айтиб, ўзинг ҳар куни автобусда ишга боришинг.

Қашшоқлик нима?

Ҳашаматли уй қуриб, табиат гўзалликларидан маҳрум қолишинг.

Қашшоқлик нима?

Қимматбаҳо соат тақиб, лекин вақтнинг қадрига етмаслигинг.

Қашшоқлик нима?

Расмларда ўзингни бахтли кўрсатиб, аслида қалбда бадбахт яшашинг.

Қашшоқлик нима?

Сарпо учун ҳашаматли жавон олиб, ўзинг эски пиёлада чой ичишинг.

Қашшоқлик нима?

Қиммат машина олиб, ичингда кредитини ўйлаб сиқилишинг

Қашшоқлик нима?

Дўстлар олдида сахий бўлиб, ўз оилангдан пул аяб яшашинг.

Қашшоқлик нима?

Бренд кийимлар кийиб, қалб гўзаллигига беъэътибор бўлишинг.

Хуллас, қашшоқлик чарчатди, дўстлар:

Бир соатлик дунёда бахтли яшайлик!

@Ustoz_kundaligi

​Курс ўқисангиз мазада

Янги танишлар топасиз. Янги ғоялар келади. Ишингизга мазмун киради.

Ўзим охирги марта 2023-йил ўқиган эканман: 2 йил бўлибди.

Расмда: Oзарбайжонлик устозимиз — Мр Ҳасан ва мен.

Сиз ҳам ўқитувчилик маҳоратини ошириш учун курс излаяпсизми?

Замонавий Педагог курсимизга қабул 20 соатдан кейин тугайди.

Батафсил маълумот:
https://t.me/zamonaviypedagogkursi/105

Ёзилишга улгурмаганлар алоқага чиқинг. @light_upon_light2

Сиз «идеал» устозсиз

Сиз блогларни яхши ёзасиз деди. Осмонга учдим.

Мутахассисга кўрсатсам, 80 та имловий хато топди. Жойимга тушдим.

Сиз зўр устозсиз деди талабалар. Аслида дарс самарасиз ўтганини билмасди улар.

Камчиликларингиз оддий одамларга кўринмайди. Улар фикр айтишга қодир эмас.  

Хавфли тарафи:

Улар мақтайди. Ишонасиз. Ўз қобиғингизда юраверасиз. 

• Сизни кимдир мақтаяптими? 
• Етишиб қолдим деб ўйлаяпсизми? 
• Зўр мутахассисман деган фикр келяптими? 

Ундай эмас!

Устозларга мурожаат қилинг. Камчиликларингиз устида ишланг. 
Ривожланинг!

Устозлар ҳам мақтаяптими? 
Бошқа устоз топиш вақти келибди.

Хуллас, айтилганидек:

Мукаммалликнинг чегараси йўқ.

Фалокатнинг энг каттаси — оми инсонлар мақтовидир. Мақтов қанча қанча инсонларни йўлдан оздирди.

Солиҳлар гулшани китобидан

@Ustoz_kundaligi

Абдуллоҳ домлани кўрдим

2010-йилдан бери Абдуллоҳ домлани суҳбатларини эшитаман. Ҳаётда кўришни орзу қилардим.

Ниятимга етдим. Бугун кўрдим:

Одатда медиадаги инсонларни ҳаётда кўрсам — ҳафсалам пир бўларди.

Устозга эса аксинча ҳурматим ошди.

Ҳамма ўзини кўзойнаги билан қарайди.

Мен ҳам педагогик кўз билан қараб, устознинг дарс ўтиш маҳоратини таҳлил қилдим:

1. Оммага мослашиш. Қийин мавзулар ҳам ўта енгил. Содда. Омма тилида гапирилади.

2. Кулгу. Дарслар юморга бой. Одамларни зериктириб қўймаслик учун, тез-тез кулдириб турилди.

3. Мисол бериш. Қийин, мавҳум мавзулар — ўта содда мисоллар билан тушунтирилди: машина, футбол, кундалик ҳаёт.

4. Тана ҳаракати (body language). Мавзу тушунтиришда қўл ҳаракатлари ўта моҳирлик билан ишлатилди. Дарсга ранг ва энергия берди.

5. Равон нутқ. Гаплар дона-дона. Сўзлар равон. Тушунишни осон қилади.

6. Эмпатия. Инсонларни ҳис қилиш кучли: чарчоқ, уйқусираш бошланиши билан дарров одамлар ҳаракатга келтирилди.

7. Кўз контакти (eye contact). Бир ерга қараб — монотон суҳбат қилмасдан, барча оммага кўз ташлаб, дарс ўтилди.

8. Ўз вақтида тугатиш. Одамларнинг ҳолати ҳисобга олинди. Малоллантирилмай, ўз вақтида тугатилди: шакарнинг ҳам ози ширин дегандай.

Хуллас, шундай.

Қирғизистон, Ўш, 18.04.2025

@Ustoz_kundaligi

Таниш-билишни кўпайтир!

Социолог Грановетер ўзининг машҳур "Нозик Алоқалар Кучи" (The Strength of Weak Ties) асарида ажойиб маълумот келтиради:

Унга кўра меҳнат бозоридаги муваффақиятингиз нечта яқин дўстингиз борлигига эмас, балки умумий танишлар сонига боғлиқ экан.

Грановетер, айниқса, иш топиш, инновация қилиш ва касбий ривожланишда кучли алоқалардан (яқин дўстлар ёки оила) кўра заиф алоқалар (танишлар) муҳимроқ эканини таъкидлайди:

1-сабаб: Яқин дўстлар одатда сизга ҳамфикр ҳисобланиб, гапингиз бир жойдан чиқади. Вазиятга бошқа тарафдан қарай олмайсиз. Аксинча, узоқ танишлар эса ўзгача фикрлаш билан дунёқарашингизни кенгайтиради.

2-сабаб: Дўстлар кўп ҳолатда сиз билан бир ижтимоий табақага оид бўлади (бой, ўрта ҳол, камбағал). Танишлар эса турли қатлам вакиллари бўлгани туфайли сиз кўрмаётган имкониятларни очиб бериши мумкин.

3-сабаб: Яқин дўстлар одатда сизга яқин манзилда яшайди. Танишлар эса турли манзилдан бўлгани боис сиз учун кўприк вазифасини бажариб бериши мумкин.

4-сабаб: Танишлар кўпроқ турли касбларда ишлагани туфайли сизга янги иш ўринлари ҳақида тезроқ хабар бериши мумкин. Тадқиқотга кўра 56% ишчилар ўз ишхоналарини дўстлари эмас, узоқ танишлар орқали топгани аниқланади.

5-сабаб: Яқин дўстлар кам, танишлар эса кўплиги. Сизда 2 та дўстингиз ва 20 та танишингиз бор дейлик. 20 та танишингизни 2 тадан чин дўсти бор. Шунда сиз танишларингиз орқали 40 та одамга алоқага чиқа олишингиз мумкин.

P.s: Дўст керак эмас дейилмади. Карьерадаги муваффақият учун кўпроқ танишлар орттириш керак демоқчи эдик.

Фойдаландим: The Strenght of Weak Ties
Ўзимдан ҳам озгина қўшдим)

@Ustoz_kundaligi

Абдураззоқ (@Abdurazzoq_Khanov) билан китоблар ҳақида суҳбат қиламиз.

Чатга марҳамат!

Кеча "Замонавий Педагог" курсимизнинг 8-гуруҳ дарсларини якунладик:

Доимгидек иштирокчилардан сўровнома олдим. Ўқиб маза қилдим. Бекор яшамабман. Баъзи изоҳларни улашаман:

• "3та дарсни ўзида 3 йил педагогика университетида ўқиб ўрганмаган илмимни ўргандим.

Фақат назария билан чекланилмасдан амалий маслаҳатлар ҳам берилди.

• Чунки кутганимдек аъло бўлди

• "Замонавий мактабларда айнан хусусий мактаблар учун ажойиб қўлланма бўлди

• Манга ҳар бир дарс ундаги маълумотлар, устозларнинг самиймийлиги барча барчаси ёқди. Касбимни яхши кўраман, энди янада кўпроқ яхши кўришимга ва энди дарсларда бошқаларга кўпроқ манфаат улашишга сабабчи бўлди.

• Бошқа онлине дарсларга қатнашганимизда устоз бизни фикримиз қизиқмас эди.

Замонавий педагог курсида устозлар тўғридан тўгри биз билан мулоқот қилди. Барча саволларимизга тўлиқ жавоб олдик

• Шахсий ривожланиш учун ҳам кўп маслаҳатлар берилди.

Эндиликда биз янги курсга старт беряпмиз. Дарсимиз чоршанба 23-апрелдан бошланади.

Курс ҳақида батафсил маълумот https://t.me/zamonaviypedagogkursi/105

Аъзо бўлинг. Ривожланинг.

@Ustoz_kundaligi

Ўқувчиларни гуруҳларга бўлишда 4 та муҳим қоида

Баъзан ўқувчиларни гуруҳларга бўлиб вазифа бажартириш дарс жараёнига ранг беради.

Аммо афсуски, баъзи ҳолларда гуруҳ бўлиб ишлаш нотўғри ташкил этилади. Бу эса дарснинг самарадорлигига салбий таъсир кўрсатади:

Кўринишидан дарс қизиқарли ва ҳаракатга бой бўлсада, гуруҳ ишлари кутилган натижа бермайди.

Келинг ҳурматли устозлар, гуруҳ бўлиб ишлашнинг баъзи самарали қоидаларини кўриб чиқамиз:

1. Мақсад қўйинг. Гуруҳ ишини ташкил қилишда аниқ мақсад бўлиши керак:

Гуруҳга бўлишдан қандай мақсад? Қандай кутилмалар бор? Ўқувчилар ўзи бу ҳақида биладими?

Мақсад аниқ бўлса, ўқувчилар ҳам ўз вазифаларини масъулият билан бажаришади.

2. Гуруҳ таркибини тўғри тузинг. Гуруҳларни тузишда иқтидорли ва билим олишда қийналаётган ўқувчиларни аралаштириб жойлаштиринг. Бу усул орқали гуруҳ ичида тажриба алмашинуви содир бўлади.

3. Шахсий жавобгарликни белгиланг. Ҳар бир гуруҳ аъзосига аниқ вазифа юкланг:

Эшмат — кириш қисмини тайёрлаш;
Тошмат — асосий мавзуни тушунтириш;
Гулчеҳра — якуний хулосани умумлаштиришга жавобгар.

Бундай ёндашув ўқувчиларда жавобгарлик ҳиссини оширади ва гуруҳ ишини тизимли қилади.

4. Гуруҳ иштирокчилари сонини балансланг. Гуруҳ аъзолари сони ортиқча кўп бўлса, ўқувчиларнинг шахсий жавобгарлиги сусаяди ва фаоллик пасаяди. Mутахассислар гуруҳда 4 нафар ўқувчи бўлишини тавсия этишади — бу рақам самарали ва барқарор ҳамкорлик учун энг идеал ҳисобланади.

Хулоса:

Гуруҳ бўлиб ишлаш тўғри ташкил этилганида, дарс жараёни нафақат қизиқарли, балки самарали ва мақсадга йўналтирилган бўлади. Ҳар бир ўқувчи жараёнда фаол иштирок этади ва жавобгарликни ҳис қилади.

@Ustoz_kundaligi

Энергиянгизни қаерга сарфлаяпсиз?

Ўқитувчига энг керакли бўлган билимлардан бири — энергия бошқарувини билиш (power management)

Сабаби шахсий «зарядкангиз» 70% дан тушиб кетганида — сиз асабийлашиш, болаларга бақиришни бошлайсиз

Қолаверса, энергиясизлик касбий толиқиш (выгорание) ва ҳаётингиз маъносини йўқотишингизга сабабчи бўлади

Қуйидаги рўйхатда энергиямизни «сўриб» олаётган «зараркунандалар»ни кўриб чиқамиз:

Ҳаёт тарзида:

1. Овқатланиш:
- Энергия бермайдиган таомлар (ролтон, биг бон);
- Фастфуд;
- Ошиқча ширинлик истеъмол қилиш;
- Ўз вақтида овқатланмаслик;
- Ўта ёғли овқатланиш;
- Кечқурун кўп миқдорда таомланиш.

2. Уйқуда:
- Етарлича ухламаслик;
- Сифатсиз уйқу.

3. Нафас олиш:
- Ифлосланган ҳавода нафас олиш;
- Нотўғри нафас олиш.

4. Кун Тартибида:
- Кун ва тун алмашиб қолиши;
- Кун тартибига амал қилмаслик.

Психологик сабаблар:

1. Мақсадсизлик:
- Умидсизлик
- Ўзини фойдасиздек ҳис қилиш;
- Ўтмишдан афсусланиш;
- Узоқ келажак ҳақида хавотир;

2. Қўрқув:
- Ўзини ҳимоясиз ҳис қилиш;
- Адолатсизликдан қўрқиш;
- Келажакдан ғам қилиш;
- Ишларни комил қилолмаганидан қайғу чекиш (перфекционизм);
- Ўзини ноқис ҳис қилиш (сомплех);
- Рад жавоб олишдан қўрқув;
- Жамоадан ажралиб қолиш қўрқуви.

3. Салбий ҳиссиётлар:
- Аразлаш;
- Ҳасад;
- Пессимист бўлиш;
- Алам;
- Ички конфликтлар 
- Ғазаб;
- Қасос олиш истаги.

4. Ўзгача кўриниш истаги:
- Барчага ёқишга ҳаракат қилиш;
- Одамларга ниманидир исботлаб қўйишга ҳаракат қилиш;
- Ўзини ўзгалар билан солиштириш;
- Ўзидан сохта бахтли одам ясаш;
- Ўзидан мағрурланиш.

Хулқ-атвордаги муаммолар:

1. Ишхонада:
- Иш ва шахсий ҳаётни аралаштириб қўйиш;
- Бир-хил зерикарли иш билан шуғулланиш;
- Дам олмасдан ишлаш;
- Чала қолдириб кетилган ишлар кўпайиши;
- Табиат ва тоза ҳаво билан мулоқот камайиши;
- Қарздорлик.

2. Муносабатларда:
- Сизга ёқмайдиган инсонлар билан суҳбат;
- Бошқалар олдидаги мажбуриятлар.

3. Нафсга оид:
- Зарарли одатлар;
- Қимор ўйинлари;
- Салбий ахборот;
- Смартфонлар, компьютерлар, гаджетлардан нотўғри фойдаланиш.

4. Ташқи таъсирлар:
- Ҳақорат қилиниш;
- Қўпол муомалага учраш;
- Ҳийлага учраш;
- Ношукрлик;
- Адолатсизлик;
- Туҳмат;
- Танқид қилиниш.

Юқорида энергия «челагингизни» баъзи бир «тешиклари» билан танишиб чиқдик.

Муаммони аниқлаб, энергиянгизни тиклаб олишингизни тилаб қоламан.

Сизда қайси турдаги энергия муаммоси бор? Изоҳларда ёзиб қолдиринг!

@ustoz_kundaligi