Sunʼiy intellekt deganlari Alovuddinning sehrli chirogʻini eslatmoqda: soʻrovingizga tezda javob berib, istagingizni bajo keltirmoqda. Qadrdon doʻstimiz "Sensiz" nomli sheʼrimni qoʻshiq qilib kuylashini soʻragan ekan, sanoqli daqiqalarda bir juft qoʻshiq yaratibdi. Talaffuzi chet ellik hofiznikiga oʻxshashini aytmasa, ijrosi, taronalari binoyidek. Tinglab koʻring-chi... 😊

@n_jonuzoq

TEMURBEK

Zimmamga ulugʻ ish tushdi, dedi u,
Haq qo‘llab, yurt zafar quchdi, dedi u.
Qullik, istibdodning dodini bergan
Xudoyimning temir mushti edi u!

——————

ТEМУРБEК

Зиммамга улуғ иш тушди, деди у,
Ҳақ қўллаб, юрт зафар қучди, деди у.
Қуллик, истибдоднинг додини берган
Худойимнинг темир мушти эди у!

@n_jonuzoq

​​LAYLATUL QADR

Qanday oqshom,
Bu qanday kecha,
Yulduzlardan yogʻar mushk-atir.
Falak tuzar bir yillik reja –
Laylatul qadr.

Har lahzasi billurdek toza,
Yogʻduli shab – ming oyga tatir.
Lang ochilur yorugʻ darvoza –
Laylatul qadr.

Farishtalar tushajak gʻuj-gʻuj,
Nurlanadi barcha kent, adir.
Salom yoʻllar bizga Buyuk Kuch –
Laylatul qadr.

Dur-u gavhar sochgay sohir Ruh,
Oshiq ahli tusharkan sadr.
Dilga sigʻmas shavqu tavajjuh –
Laylatul qadr.

Samo – misli ochiq dasturxon,
Oy – ushatib qoʻyilgan patir.
Oʻz rizqidan rozidir har jon –
Laylatul qadr.

Tongga qadar eson-omonlik,
Hech dil bilmas gʻam-gʻussa nadir.
Sidirilar hamma yomonlik –
Laylatul qadr.

Sheʼr oqadi – toza bol kabi,
Quyulgaydir satrma-satr.
Ilhom saxiy bu tun... Sababi – 
Laylatul qadr...

--------------------

​​ЛАЙЛАТУЛ ҚАДР

Қандай оқшом,
Бу қандай кеча,
Юлдузлардан ёғар мушк-атир.
Фалак тузар бир йиллик режа –
Лайлатул қадр.

Ҳар лаҳзаси биллурдек тоза,
Ёғдули шаб – минг ойга татир.
Ланг очилур ёруғ дарвоза –
Лайлатул қадр.

Фаришталар тушажак ғуж-ғуж,
Нурланади барча кент, адир.
Салом йўллар бизга Буюк Куч –
Лайлатул қадр.

Дуру гавҳар сочгай соҳир Руҳ,
Ошиқ аҳли тушаркан садр.
Дилга сиғмас шавқу таважжуҳ –
Лайлатул қадр.

Само – мисли очиқ дастурхон,
Ой – ушатиб қўйилган патир.
Ўз ризқидан розидир ҳар жон –
Лайлатул қадр.

Тонгга қадар эсон-омонлик,
Ҳеч дил билмас ғам-ғусса надир.
Сидирилар ҳамма ёмонлик –
Лайлатул қадр.

Шеър оқади – тоза бол каби,
Қуюлгайдир сатрма-сатр.
Илҳом сахий бу тун... Сабаби – 
Лайлатул қадр...

@n_jonuzoq

​​ODAM

Hayot – jumboq, tugunday tugilar odam,
Yechim topolmay goh boʻgʻilar odam.
Dunyo bozorida oʻzin axtarib,
Har tong qayta-qayta tugʻilar odam…

———————

ОДАМ

Ҳаёт – жумбоқ, тугундай тугилар одам,
Ечим тополмай гоҳ бўғилар одам.
Дунё бозорида ўзин ахтариб,
Ҳар тонг қайта-қайта туғилар одам…

14.03.2025

@n_jonuzoq

​​TOLE

Aziz Ona,
Munis Opa, Singil, Yor,
Dunyo shoir bugun, yogʻdirar olqish:
Siz baxtli boʻlsangiz – boshlanar bahor,
Siz yayrab kulsangiz – chekinadi qish.

Sizdan najot kutar junjikkan jahon,
Jilmaying – erisin bezraygan muzlar.
Kimdir gul tanlaydi Siz uchun shu on,
Kimdir Siz yoqtirgan atirni izlar.

Sizning koʻnglingizni olmoq qasdida,
Olov, suv, tuprogʻu havo muntazir.
Sizni tabriklaymiz! Lekin, aslida
Bizni qutlasangiz, ming karra arzir.

Axir, taqdir siylab baxtimiz kulgan
(Mumkin edi bahor – baxtga zor boʻlmoq),
Biz uchun umrlik bayramdir ulkan –
Sizga oʻgʻil, aka, uka, yor boʻlmoq!

-----------------

ТОЛЕ

Азиз Она,
Мунис Опа, Сингил, Ёр,
Дунё шоир бугун, ёғдирар олқиш:
Сиз бахтли бўлсангиз – бошланар баҳор,
Сиз яйраб кулсангиз – чекинади қиш.

Сиздан нажот кутар жунжиккан жаҳон,
Жилмайинг – эрисин безрайган музлар.
Кимдир гул танлайди Сиз учун шу он,
Кимдир Сиз ёқтирган атирни излар.

Сизнинг кўнглингизни олмоқ қасдида,
Олов, сув, тупроғу ҳаво мунтазир.
Сизни табриклаймиз! Лекин, аслида
Бизни қутласангиз, минг карра арзир.

Ахир, тақдир сийлаб бахтимиз кулган
(Мумкин эди баҳор – бахтга зор бўлмоқ),
Биз учун умрлик байрамдир улкан –
Сизга ўғил, ака, ука, ёр бўлмоқ!

@n_jonuzoq

​​Bugun – qutlugʻ kun: ham Ramazonning, ham Bahorning birinchi kuni. Men uchun yana bir muhim jihati, bugun – Onamning tavallud topgan kuni. 
Baxtimizga doimo sogʻ-omon boʻling, ayajon. Tugʻilgan kuningiz bilan tabriklayman!


AYA

Hovlimizni gulbogʻ qilib, gul ekasiz,
Dildan hasrat pechaklarin yuling, aya.
His qilaman: baʼzan pinhon gʻam chekasiz,
Sizga kulgi yarashadi, kuling, aya.

Koʻylak kabi toʻzdimi yo xush chogʻingiz,
Shamol bilan toʻldimi keng quchogʻingiz.
Choʻgʻi oʻchib, sovimasin oʻchogʻingiz,
Oʻzim olay koʻnglingizning kulin, aya.

Boshimizda yoʻl boshladi qarchigʻay, sor,
Boʻyladig-u, keng dalamiz tuyuldi tor,
Toychoqlarin izlab bir ot kishnadi zor,
Bizlar – tarqab ketgan bebosh qulun, aya.

Olti bola, olti taqdir, olti yoʻlak,
Har birining bugun oʻyi, uyi boʻlak.
Nabiralar irgʻishlaydi, qilgay halak –
Qoshingizda bir juft oʻgʻil, kelin, aya.

Goho oylab choʻzilar uch yuz chaqirim,
Oʻchirmoqchi boʻlib sogʻinch choʻgʻ-chaqinin.
Agar oʻngʻay emas oʻng – tushda chaqiring,
Yoki… bizni baxtli qiling – keling, aya!

Borimiz ne, yoʻgʻimiz ne – siz egasiz,
Bagʻrimizni gulbogʻ qilib, gul ekasiz.
Oltinsiz – eng qadri baland, boy bekasiz,
Sizga kulgi yarashadi, kuling, aya!

––––––––––

АЯ

Ҳовлимизни гулбоғ қилиб, гул экасиз,
Дилдан ҳасрат печакларин юлинг, ая.
Ҳис қиламан: баъзан пинҳон ғам чекасиз,
Сизга кулги ярашади, кулинг, ая.

Кўйлак каби тўздими ё хуш чоғингиз,
Шамол билан тўлдими кенг қучоғингиз.
Чўғи ўчиб, совимасин ўчоғингиз,
Ўзим олай кўнглингизнинг кулин, ая.

Бошимизда йўл бошлади қарчиғай, сор,
Бўйладиг-у, кенг даламиз туюлди тор,
Тойчоқларин излаб бир от кишнади зор,
Бизлар – тарқаб кетган бебош қулун, ая.

Олти бола, олти тақдир, олти йўлак,
Ҳар бирининг бугун ўйи, уйи бўлак.
Набиралар ирғишлайди, қилгай ҳалак –
Қошингизда бир жуфт ўғил, келин, ая.

Гоҳо ойлаб чўзилар уч юз чақирим,
Ўчирмоқчи бўлиб соғинч чўғ-чақинин.
Агар ўнғай эмас ўнг – тушда чақиринг,
Ёки… бизни бахтли қилинг – келинг, ая!

Боримиз не, йўғимиз не - сиз эгасиз,
Бағримизни гулбоғ қилиб, гул экасиз.
Олтинсиз – энг қадри баланд, бой бекасиз,
Сизга кулги ярашади, кулинг, ая!

@n_jonuzoq

​​RAMAZON

Mahkam bogʻlanadi nafsning buqasi,
Kamayar yemishi, chiqit, quyqasi.
Ozayadi vujud ozigʻi, ammo
Kun sayin ortar qalb, ruh ozuqasi!

2025

–––––––––

РАМАЗОН

Маҳкам боғланади нафснинг буқаси,
Камаяр емиши, чиқит, қуйқаси.
Озаяди вужуд озиғи, аммо
Кун сайин ортар қалб, руҳ озуқаси!

2025

@n_jonuzoq

Endi taʼlim tili oʻzbek tili boʻlmagan sinf bitiruvchilari ham davlat tilidan imtihon topshiradi

Maktabgacha va maktab taʼlimi vazirining 2025-yil 20-fevraldagi 65-sonli buyrugʻi bilan umumiy oʻrta taʼlim muassasalarida yakuniy davlat attestatsiyasi oʻtkazish tartibi belgilandi. Mazkur hujjatga asosan umumiy oʻrta taʼlim muassasalarida yakuniy davlat attestatsiyasi oʻtkaziladigan fanlar roʻyxati va imtihon oʻtkazish shakllari, umumtaʼlim fanlari hamda xorijiy tillarni bilish darajasini baholovchi milliy va xalqaro tan olingan sertifikatlar roʻyxati tasdiqlandi.

Unga koʻra, 9-sinf oʻquvchilarining yakuniy davlat attestatsiyasi:

➖Ona tili va adabiyoti (taʼlim oʻzbek tilida olib boriladigan sinflar uchun) fanidan – yozma;
➖Davlat tili (taʼlim tili oʻzbek tili boʻlmagan sinflar uchun)dan – yozma;
➖Matematika fanidan – yozma;
➖Oʻzbekiston tarixi fanidan – yozma/ogʻzaki;
➖Jismoniy tarbiya fanidan – amaliy shaklda oʻtkaziladi.

11-sinf oʻquvchilarining yakuniy davlat attestatsiyasi:

➖Ona tili va adabiyoti (taʼlim oʻzbek tilida olib boriladigan sinflar uchun) fanidan – yozma;
➖Davlat tili (taʼlim tili oʻzbek tili boʻlmagan sinflar uchun)dan – yozma;
➖Matematika (Asosiy) / Matematika (Chuqurlashtirilgan) fanidan – yozma;
➖Tarix fanidan – yozma;

Oʻquvchining tanlovi boʻyicha:

➖ Ona tili va adabiyoti (qoraqalpoq, rus, qozoq, turkman, tojik, qirgʻiz tilida taʼlim boʻlgan sinflar uchun), Biologiya, Fizika, Kimyo, Davlat huquq asoslari, Geografiya fanlaridan – yozma;
➖ Chet tili fanidan yozma/ogʻzaki shaklda oʻtkaziladi.

Ma’lumot uchun, 2025-yilidan boshlab taʼlim o‘zbek tilida olib borilmaydigan umumiy o‘rta ta’lim muassasalarining 11-sinf bitiruvchilari uchun ham Davlat tilidan yakuniy nazorat imtihonlarini topshirish majburiy bo‘lishi belgilanmoqda.

Oʻzgarishlar haqida batafsil maʼlumotlar vazirlikning ijtimoiy tarmoqlari orqali beriladi.

@hilola_umarova

​​BOBUR

Hijronga payvand nihol, gʻamzada shoxdir Bobur,
Sogʻinchi shigʻil-shigʻil, hasratli bogʻdir Bobur.

Ikki daryo orasi tanglik qilib, oqibat
Yot nahrdan suv ichib, yuragi dogʻdir Bobur.

Shamshir bilan savashda sheʼr bitgan arslon shoir,
Qalamini oʻynatib jang qilgan shohdir Bobur.

Gʻanimlar hamlasidan jismi salomat, ammo
Ahbobu doʻst zarbidan siyrati chokdir Bobur.

Zar chopon kiygan darvesh, taxtda oʻtirgan faqir,
Saroyu qasrlarni toʻldirgan ohdir Bobur.

Hushyorlar davrasida yolgʻiz devona koʻngil,
Telbalar zumrasida yagona sogʻdir Bobur.

Milyon yilda yaralmish Hindikush, Pomir togʻi,
Qirq yetti yilda koʻkka yetishgan togʻdir Bobur.

Adolat, mardlik, vafo tugʻ ilgan oliy zirva,
Xiyonatu tubanlik yiqilgan chohdir Bobur.

Moziy, deya yuz burma, oldga tikilgan, ey doʻst,
Marraga eng tez, ildam eltguvchi rohdir Bobur…

----------------------------

БОБУР

Ҳижронга пайванд ниҳол, ғамзада шохдир Бобур,
Соғинчи шиғил-шиғил, ҳасратли боғдир Бобур.

Икки дарё ораси танглик қилиб, оқибат
Ёт наҳрдан сув ичиб, юраги доғдир Бобур.

Шамшир билан савашда шеър битган арслон шоир,
Қаламини ўйнатиб жанг қилган шоҳдир Бобур.

Ғанимлар ҳамласидан жисми саломат, аммо
Аҳбобу дўст зарбидан сийрати чокдир Бобур.

Зар чопон кийган дарвеш, тахтда ўтирган фақир,
Сарою қасрларни тўлдирган оҳдир Бобур.

Ҳушёрлар даврасида ёлғиз девона кўнгил,
Телбалар зумрасида ягона соғдир Бобур.

Милён йилда яралмиш Ҳиндикуш, Помир тоғи,
Қирқ етти йилда кўкка етишган тоғдир Бобур.

Адолат, мардлик, вафо туғ илган олий зирва,
Хиёнату тубанлик йиқилган чоҳдир Бобур.

Мозий, дея юз бурма, олдга тикилган, эй дўст,
Маррага энг тез, илдам элтгувчи роҳдир Бобур…

@n_jonuzoq