⭕️حیله (اوشاق ادبیاتی)
✍️کؤچۆرن: #محمود_بنی‌آدم‌دیزج

یوْلدا حیله بیردن دایاندێ:
- آتا جان! آتا جان! من چوْخ یوْرولدوم. آخێ آیاقلارێم بالاجادیر...
آتاسێ دئدی:
- فیکر وئرمه، منیم بالام! چاره‌سینی تاپارێق. ایلک گلن ماشینا مینه‌ریک. حاضیر اوْل!
آتا تۆلکو سؤزۆنۆ بیتیرمیشدی کی، سارێ بیر یۆک‌ماشینی اوْنلارا طرف گلمَـڲه باشلادێ. ماشین‌ین ایچینده، قفسه سالێنمیش توْیوق‌لارێن سسی گلیردی.
تۆلکو هیجانلاندی:
- هئچ اینانا بیلمیرم! طالع* قارشێمیزا توْیوق‌ دوْلو بیر یۆ‌ک‌ماشینی چێخارتدی!
حیله سوْروشدو:
- اوْنلار هارا گئدیرلر؟
آتا تۆلکو دئدی:
- بازارا. اوْردا ساتێلیب، قازانێن دیبینی گؤره‌جکلر!
آتاسێ‌نین بو جوابێندا، حیله راضی قالمادی: «آتا! سن منه بیر تعطیل هدیه‌سی آلاجاغێنی سؤیله‌میشدین. أن چوْخ ایسته‌دیڲیم شئیی ایندی تاپدێم! بۆتون قفس‌لری آچاق!»
حیله، بونو دئییب، قفس‌لرین قاپێلارینی آچدێ.
توْیوق‌لار قاچێشارکن «قێت – قێت... قێداق...» دییه سسلندیلر:
- تشکّر ائدیریک حیله قارداش! سیزه گؤزل تعطیللر آرزولایێریق!

🔶آچێقلاما؛

طالع: سرنوشت، آلێن یازێسی

#سون

@MuncuqAz
https://t.me/Sancaq_media/7074

⭕️دانێشان کیف (اوشاق شعری)
✍️شاعر: #خسرو_باریشان

مدرسه واختێ چاتدێ؛
کیفیم منی اًیاتدی!
عینگیمی تاخدێ کیف!
برنامه‌مه باخدێ کیف!
اؤز آغزێنی آچدێ کیف!
کتابلاری سئچدی کیف!
-کتابلارێن بیر به بیر
دئدی: - باخ، ایچیمده‌دیر.
مداد، سیلگی، خودکاریم،
یازماقدا یوْلداشلاریم،
اوْنلاری دا گؤتۆردۆ!
قارنێنا تئز اؤتۆردۆ!
آتێلدی قوجاغێما!
یاواشجا قولاغێما!
دئدی:- تعجّب ائتمه.
منسیز کیلاسا گئتمه.
کتابلارێن دوْستلوغو
ایچیمده قارانلێغی
یوْخ ائتدی، ایشیق ائتدی؛
جهالتیم ده بیتدی.
دیل آچدیم قانان اوْلدوم.
بیلیب مهریبان اوْلدوم.

@MuncuqAz
https://t.me/Sancaq_media/7070

.
⭕️مئشه،
چاققال‌سێز اوْلماز.

@MuncuqAz

⭕️پیشیک‌بالالار (یئنی‌یئتمه‌لر اۆچون)
✍️یازان: #سحر_خیاوی

بیرینجی بؤلوم

ماشینی قاپێدا ساخلادێ. آچارێ کلید یئرینه سالێب، قاپێنی آچدێ. یئنه همیشه‌کی کیمی قارانلیق دهلیزه کئچدی. پریزی ووروب، چێراغی یاندێردی. هالێن قاپێسینی آچێب، ایچری گیردی. سوْیوق و قارانلێق هالێن دا چێراغینی یاندێردی. الینده‌کی حصیردن توْخونموش سَله‌نی یئره قوْیدو.
بیر آن گؤزۆ پنجره‌یه ساتاشدێ. پیشیک‌بالالارێن آناسێ اۆزگون، شیشه‌دن ایچری‌یه باخێردی. اوْنا یازێغی گلدی، پنجره‌نی آچدێ، آنا‌پیشیک ایچری‌یه آتێلدی. قابدا قوْیدوغو قورو خؤره‌ڲه گؤز اوجو ایله بئله باخمادێ! سله‌یه سارێ گئدیب، دوره‌سینه فێرلاندی. آیاقلارێنی قوْوزایێب، سله‌نین ایچینه باخدێ، اییله‌مَـڲه باشلادێ. سوْنرا اؤز پیشیک دیلی ایله ایتمیش بالالارێنی سسله‌دی.

کیشی بو منظره‌یه دؤزه بیلمه‌دی و یانلێش یاپدێغینی دۆشوندو. درین بیر کؤکس اؤتۆرۆب، ائوین یالقێزلیق و حۆزونلو هاواسێندان چێخماق اوْچون، سوسیس آلماق بهانه‌سینه کۆچه‌نین باشێنداکی ماغازایا گئتدی.
اوْرادا ماغازاچی قوْنشویا اۆر‌ک سرّینی آچێقلادی. قوْنشو: "اوْلسون، حیوان انسان کیمی دڲیل، یادداشێ ضعیف‌دیر، ایکی گۆنلوک‌دیر، بالالارێنی اونوداجاق!"، - دئدی.
کیشی: "کئشکه سن دئدیڲین کیمی اوْلسون، آمّا من گؤر‌ن بو آناپیشیک سانکی فرقلیدی، اونودان دڲیل!"، - دئدی.
بیرآز دا قوْنشوسو ایله دانێشیب – دردلشندن سوْنرا ائوه قایێتدی.
هله ده آناپیشیک، غریب ناله‌لی سسلر چێخاریب، ائوین هر کۆنج – بوجاغێنی اییله‌ییب، بالالارێنی آختارێردی. کیشی ایسه اؤزۆنۆ گۆناهکار حسّ ائدیب، سوْیوق تر باسێب، بدنی‌ گیزیلده‌ییردی.
بیر نئچه سوسیس پیشیرسه ده سانکی بوْغازێ بیچیلدی.

شام یئیه بیلمه‌دی. یاتاغێندا اوزانێب، گؤزۆنۆ تاوانا زیلله‌دی. یادێنا بو آناپیشیڲی نئجه تاپماغێ دۆشدو. اوْ گۆن آلاتوْرانلێقدا هله یاتاقدا ایدی. گۆر، سسلی – کۆیلو یاغێش یاغێردی. سانکی گؤڲ یێرتیلمیشدی. یاغێشین سسی، هم ده نارین پیشیک‌بالا جێویلتی‌لرینه اوْیاندی. اوّلجه یوخو گؤردۆڲۆنۆ ساندێ. قولاق یاپێرتدی. یوْخ یوخو دڲیلدی. هؤله‌سک یئریندن قالخێب، آرخا حیطه آچێلان هال قاپێسینی آچدێ. ها گؤز گزدیردی، بیر شئی گؤرمه‌دی. بئله ساندێ نارین مییولتو سسلری دامدان گلیر. پلّه‌لردن داما قاچدێ. دام یوْلونون قاپێسینی آچێب، دقّتله باخدێ. حتّی نودان گیلیفینه ده باخدێ.

گۆر یاغان یاغێشدان باشقا دامدا هئچ نه یوْخ ایدی. پلّه‌لردن آشاغێ ائنیب، چترینی گؤتۆرۆب، حیطه چێخدی. هر یئره گؤز گزدیردی، لاپبادان حیطده‌کی میوه جعبه‌سی‌نین ایچینده ایکی تزه دوْغولموش پیشیک‌بالا گؤردۆ. سانکی آنالارێ اوْنلاری یاغێشدان قوْرویا بیلمه‌میشدی. بالاجا پناهسێز بدنلری گۆر یاغێشین آلتێندا ایسلانێب، تیر – تیر اَسیردی.
ایسلاق پیشیک‌بالالارێ گؤتۆرۆب، ائوه گتیردی. سشوار توتوب، بالاجا بدنلرینی قوروتدو. سوْرنگ ایله بوْغازلارێنا آزاجێق ایلێق سۆد تؤکدۆ. بیرآز توْرالدێلار. ایندی ایسه نارین تۆکلری‌نین رنگی بلله‌نیردی. بیر باجی، بیر قارداش ایدیلار.
باجی‌نین رنگی آغ‌سارێ، قارداش ایسه یاشێل، اۆستونده ده قارا زوْلاق‌لاری* وار ایدی.

یاغێش سَیرییه‌ندن سوْنرا گۆن چێخدی. هله گؤڲ اۆزونده فاطما ننه ده رنگارنگ خالچاسێنی اوزاتدێ.
آناپیشیک ده دیوار اۆستونه گلدی. اوْ دا برک ایسلانمێشدی. کیشی، بیر جعبه ایچینه قالین و ایستی اَدیال* سَردی. پیشیک‌بالالارێ ایچینه قوْیدو، بیر پیشیک‌یوْلو دا آنالارێنا آچدێ. قاپێنی آچێب، جعبه‌نی قاپێ‌نین قاباغێنا قوْیدو.
آنا‌پیشیڲـین، بالالارێنی قبول ائتمه‌مه‌سیندن قوْرخوردو. آخێ ائشیتمیشدی: "پیشیک‌بالالاردان انسان قوْخوسو گلسه، آنالارێ داها اوْنلاری قبول ائتمیر!" قوْرخوردو ثواب یئرینه، کاباب ائله‌سین، یازێق پیشیک‌بالالار آناسێز قالسێن!
آناپیشیک اۆرکمه‌‌دن، دیواردان بالالارێ‌نین یانینا دۆشسون دییه، هالێن قاپێسینی اؤرتۆب، پرده‌نی کنارا ووروب، یاواشجا پنجره‌دن گۆددو.
آغ‌قارا آنا‌پیشیک، بالالارێ‌نین مییولتوسونا دؤزمه‌ییب، آشاغێ ائندی. احتیاط‌لا جعبه‌یه سارێ گلدی. پیشیک‌یوْلوندان ایچری گیردی. کیشی، یاواشجا هالێن قاپێسینی آچێب، جعبه‌نین اۆستونه قوْیدوغو کارتونی کنار ائدیب باخدێ. ایلاهی!.. پیشیک‌بالالار مێشامیشلا آنالارێ‌نین دؤشۆندن سۆد اَمیردیلر. هردن ایسه چؤهرایی* باپ‌بالاجا دوْداقلارێ‌نین قێراغیندان سۆد آخێردی. سۆد، آنا و کؤرپه قوْخوسو جعبه‌نین ایچینی بۆروموشدو.

🔶آچێقلامالار؛

زوْلاق‌: نوار – رۇبان
اَدیال: قالین پارچا، پَتو
چؤهرایی: صورتی، پنبه رنگی

#آردێ_گلن_سایێـدا...

@MuncuqAz
https://t.me/Sancaq_media/7064

■ 2386 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز دوشنبه 15 بهمن ماه 1403

🔹فایل pdf صفحات نشریه در لینک کانال تلگرام مهدتمدن⬇️
https://t.me/mtnewspaper

�� www.mtnews.ir
🌐 www.asanews.ir
☎️ 04135550663
📳 09362822918
🆔 @asanews

«#سانجاق»، سیاسی- اجتماعی مهد تمدن گۆنده‌لیگی‌نین ۲۳۸۶. سایێنداکی تۆرکجه صفحه‌

«مونجوق» صفحه‌سی، تۆرکجه یازێب - اوْخوماغێ سئون اوشاقلار و یئنی‌یئتمه‌لریمیز اۆچون چیخیر.

@SancaqDergisi
@MuncuqAz

🌐 https://www.instagram.com/sancaq2
�� https://instagram.com/asanews.ir

⭕️غَدّار پادشاه (آذربایجان ناغیل‌لاریندان)

✍️کؤچۆرۆب، سسلندیرن: #شبنم_توحیدی

بیرینجی بؤلۆم

@MuncuqAz

⭕️غَدّار پادشاه (آذربایجان ناغیل‌لاریندان)
✍️کؤچۆرن: #شبنم_توحیدی

بیرینجی بؤلۆم

قدیم زمانلاردا بیر پادشاه واریمیش. بو پادشاه یامان ظلمکاریمیش. فرعون* اوْنون یانێندا هئچ نه‌ایمیش! ائله فیکری – ذکری قوْشون حاضرلاماق، آدام اؤلدۆرمک ایمیش!
پادشاه، بؤیله امر وئریبمیش کی، اۆچ – دؤرد یاشێندا اوشاقلارین هامێسینی یوْخلاسێنلار! هانسێ اوشاق ضعیفدی، جانسێزدی، ائله اوْرداجا اؤلدۆرسۆنلر. بیر چوْخ مدّت پادشاه، اوشاقلاری قێردیردی. امّا بو تدبیر ده، اوْنون آجێغی‌نین قاباغێنی آلا بیلمه‌دی.
پادشاه بو دفعه ده فیکرلشدی کی، دنیا دوْلودور قوْجا – قوْلتاخنان؛ دعوادا، قاچا – قاچدا، ال – آیاغا دوْلاشێرلار! امر وئردی کی، هاردا قوْجا آرواد – کیشی وارسا، اؤلدۆرسۆنلر.

همین ولایتده «عمران» آدێندا بیر جوان اوْغلان یاشایێردی. اوْنون گؤزۆنۆن آغێ – قاراسێ بیرجه قوْجا آتاسێ واریدی. عمران، آتاسێنی اوْ قدر چوْخ ایسته‌ییردی کی، اوْنون یئرینه اؤزۆ اؤلۆمه گئدردی. عمران، قوْرخوردو کی، پادشاهین آداملارێ گلیب، اوْنون آتاسێنی دا اؤلدۆرلر. اوْدور کی، آتاسێنی گؤتۆرۆب، شهردن چێخدی، گئجه‌یکن داغدان – داشدان گئدیب، بیر مئشه‌یه چاتدێ. بیر بولاغێن یانێندا قارانلێق بیر ماغارا* تاپدێ، آتاسێنی اوْردا گیزله‌دیب، دئدی:
- آتاجان! سن بوردا قال، من هر اۆچ گۆندن، بئش گۆندن بیر سنه یئمک گتیریب وئره‌رم، تکی سن پادشاه جلّادلارێ‌نین الینه دۆشمه‌یه‌سن.
آتاسێ راضی اوْلدو. عمران اوْنون الینی اؤپدۆ، گؤزلری دوْلومسونموش قایێتدی ائولرینه.
عمران، هر دفعه اوْوا چێخماق بهانه‌سیله آتاسێنا لاواش‌دان، یومورتادان، توْیوق‌دان گتیریردی.

بونلارێ بوردا قوْیاق، سیزه کیمدن دئییم، پادشاهدان...
پادشاه، بیر گۆن قوْشون گؤتۆرۆب، وزیری‌ ایله اوْوا چێخمیشدی. یوْلو بیر چای کنارێندان دۆشدو. چایێن اۆستونده نوح* دورانێندان قالما بیر کؤرپۆ واریدی، امّا بو کؤرپۆ اوْ قدر قشنگ ایدی کی، ائله بیل گۆنو بو گۆن تیکیلمیشدی.
پادشاه کؤرپۆدن گئچنده گؤزۆ ساتاشدێ سویا، باخێب گؤردۆ سودا بیر قێز شکلی گؤرۆنۆر. قیز نه قیز! یئمه، ایچمه، خطّ – خالێنا، گۆل جمالێنا تماشا ائیله! ائله بیل کی، اوْن‌بئش گئجه‌لیک بیر آی پارچاسێ‌دیر. پادشاه، بیر گؤنۆلدن مین گؤنۆله عاشق اوْلدو قیزا، الینی جیبینه سالێب، بیر سێخیم قێزیل چێخارتدی، آتدی سویا، اوْ ساعت سو بۇلاندێ، قێزین شکلی گؤزدن ایتدی!

پادشاه، الینی اۆره‌ڲینه قوْیوب، تیرتاپ یێخیلدی یئره!.. وزیر، پادشاهی بیر تَهرلیکنن آیێلدیب، دئدی: - قبله‌ی عالم ساغ اوْلسون! سیزه نه اؤلدو کی، بیردن بیره اؤزۆنۆزدن گئتدینیز؟
پادشاه دئدی:
- وزیر! چایدا بیر قیز گؤردۆم، عاغلێمی باشێمدان چێخارتدی. نه اوْلورسا اوْلسون، گرک اوْ قیزی تاپێب، منه آلاسان!
وزیر دئدی:
- قبله‌ی عالم! بیر قیز نه‌دیر کی، اوْندان اؤترۆ اۆره‌ڲینیز گئدیر. بو چوْخ آسان ایشدی. سحردن بیر امر وئره‌رسیز جوانلار دۆشوب، قیزی چایدان تاپارلار.
وزیرین بو سؤزۆندن سوْنرا، پادشاه بیر آز اؤزۆنه گلدی، داها اوْوا گئتمه‌ییب، گئری قایێتدی. ائله همان گۆن امر وئردی کی، شَهرده نه قدر جوان آدام وارسا، گرک بیر بیر چایا دۆشوب، قیزی تاپا. کیم قیزی سودان چێخارتسا، اوْنا بؤیۆك انعام وئریله‌جک، تاپا بیلمه‌یه‌نین ده بوْینو وورولاجاق.

🔶آچیقلامالار؛

غَدّار: عربجه کؤکنلی بیر کلمه‌دیر و «ظالم، آجیماسیز، قییجی» آنلامینا گلیر.
فرعون: حضرت موسی‌نین پیغمبر اوْلدوغو زمان، مصر اؤلکه‌سی‌نین پادشاهی
ماغارا: عربجه مَغاره کلمه‌سی‌دیر. غار، کؤهۆل
نوح: حضرت نوح، بیرینجی اولوالعزم پیامبریمیزدیر.

#آردی_وار...

@MuncuqAz
https://t.me/Sancaq_media/7062

⭕️تۆلکو بڲ ایله آسلانین یوْلداشلیغی

🔷ناغیلی تعریفله‌ین: #مهندس_ابراهیم_کرامت عیسی‌لو - اَرشقین جبارلی کندیندن

✍️یازییا گئچیب، سسلندیرن: #عزیز_سلیمانی (آراز)

@MuncuqAz

⭕️تۆلکو بڲ ایله آسلانین یوْلداشلیغی

🔷ناغیلی تعریفله‌ین: #مهندس_ابراهیم_کرامت عیسی‌لو - اَرشقین جبارلی کندیندن

✍️یازییا گئچن: #عزیز_سلیمانی (آراز)

بیری وار ایدی، بیری یوْخ ایدی. بیر گۆن، تۆلکو بڲ آستا گزیب، ایز گئتدی. أڲری اوْتوروب، دۆز گئتدی. آرادێ، آختاردێ یئمَـڲه بیر شئی تاپابیلمه‌ییب، اؤز – اؤزۆنه دئدی: «ناغایێریم! نئیله‌ییم؟» گؤردۆ گئندن بیر پئزه وَرتی* آسلان گئدیر! بیر آن گؤزلری قارانلیق چالدێ. ائله بیلدی بیر یئکه تیکه أت، اوْنا سارێ گلیر. تئز بئینینه بیر شئی گلدی؛ "قوْی ناغێلی بوردا اوْخوجولارا لوْ وئریم!" «سن اؤلمیه‌سن بو آسلانێ یییه‌جَـڲم.» - دئدی.
یئیین‌لشیب، اؤزۆنۆ آسلانا یئتیردی. ایکی قات اڲیلیب، سلام وئردی. جواب آلمادی دییه، باشلادێ آسلانێ تعریفله‌مڲه:
- «قبله عالم ساغ اوْلسون! مئشه یاراشێغی، خلقتین باشێ! سیزی گؤرن همن، گؤزلریم ایشێقلانیر، کؤنلۆم آچێلیر. بو گۆجده، بو دورومدا بۆتون یارانمێشلارین سلطانی ایگیدلر ایگیدی...»

تۆلکو اوْ قدر آسلانێن بوْیون اوْخشادێ، اوْ قدر قوْلتوغونا قارپێز وئردی، شوْربالادێ، دستماللادێ، آسلانێن خوْشو گلیب، اوْنلار یوْلا کؤرپۆ آتماق اۆچون یوْل یوْلداشێ اوْلوب، دئییب دانێشیب، آز گئتدیلر، چوْخ گئتدیلر، بیر یومورتا بوْیو یوْل گئتدیلر. سوْنوندا بیر اوچوروما یئتیشدیلر. اوچوروما یئتن همن، تۆلکو اوْتوردو، ظۆلوم – ظۆلوم اوْوۇنماز آغلادێ! گؤزۆنون یاشێنی قوْرغا کیمی اله‌دی! بئله کی، آسلانێن اوْنا اۆره‌ڲی یانێب، دئدی:
- «تۆلکو بالام! سنه نه اوْلدو. ندن آغلایێرسان!؟»
تۆلکو دئدی:
- «قوربان! آختارما، رحمتلیک آتان یادێما دۆشدو!»
آسلان دئدی:
- «مگر سن، آتامێ تانێییردین‌می؟»
تۆلکو: «آخ نئجه، هئچ عؤمرۆمده اوْنا تای بیر ائنلی‌کۆرَک، آغێزدان گیرده، قوْللو بیلک‌لی، لئی کیمی بیر آسلان گؤرمه‌میشم!» - دئییب، یئنه اوْوۇنماز آغلادێ!
آسلان دئدی:
- «صحبت ائله گؤرۆم بس ندن آغلایێرسان!؟»
- «آی آغا! آغلامایێم، به ناغایریم!؟ آتان اوْ قدر گۆجلو ایدی، اوْ قدر تایسیز ایدی، بو قایادان اوْ بیریسی تایا، بیر دؤنه آتێلیب دۆشوردو، ائله بیل قوش کیمی قاناد چالێردی.» اوْوو، اوْوو یئنه آغلادێ.
آسلان دئدی:
- «آی بابام! داها آغلاما! من ده آتێلا بیله‌رم دا!»
تۆلکو، «یوْخ قوربان یوْخ! دیلیم لال، دیلیم لال، سیز ده بَـزبۇروتلوسوز*، سیز ده چوْخ گۆجلو سوز. آنجاق، آتان رحمتلیک آلاهی بیر آسلان ایدی. دالدالێ گئدیب، گلیب، بیر دؤنه بو قایانی آتێلیب، باخ دۆز اوْ قایانین اۆستونده، اوْ قارا داشێن اوْرتاسێنا دۆشوردو.» - دئدی.
آسلان، دال‌دالا گئدیب، قاچا قاچا گلیب قایادان آتێلماق ایسته‌دی، آنجاق گؤردۆ یوْخ کؤندۆ یوْخدور، آتێلا بیلمز! دایاندێ.»
یئنه تۆلکو آغلاماغا باشلادێ:
- «دئمه‌دیم اوْنا تای آسلان، آنالار دوْغماییب، دوْغماز دا!»
آسلان، حرصله‌نیب دا‌‌ل‌دالا گئدیب، لئی کیمی گلیب، قایانێ بیر دؤنه آتێلدی، گؤیده چالێقلاییب – چالێقلاییب، گۆپپولتویله ائله بیر داشێن اۆستونه دۆشدو! یئر لاخلادێ. آسلانێن بئلی بوخونو اوْوۇخ – اوْووخ اوْلوب سێندی!
تۆلکو تئز چیبین* کیمی اوْ داشدان، اوْنا آتێلیب، اوْندان بونا آتێلیب، قایادان ائنیب، اؤزۆنۆ آسلانا یئتیردی و باشلادێ اوْنو آرخادان سؤکمَـڲه!
آسلان، تزه آنلادێ کی، نئجه تۆلکونون توْرونا دۆشوب! ایسته‌دی سوْن آنلارێندا تۆلکونو اؤزۆنه یوْل یوْلداشی ائیله‌سین دییه، اؤله‌زیمیش سسی* ایله «گل بالا قاباقدان یئه، دؤشۆمده شیپ‌شیرین یاغلێ، قارا تیکه‌م، أتیـم وار، پیییم وار، جییار بندیم وار.» - دئدی.
تۆلکو «یوْخ بڲ! گؤزۆم گؤزۆنه دۆشر، سوْنرا وجدان آغرێسی چکه بیلمه‌رم. ائله آتان رحمتلیڲی ده آرخادان سؤکدۆم. یاپێشیر، وار اوْل. چوْخ یاخشێ‌دیر » - دئدی.

🔶آچێقلامالار؛

پئزه وَرتی: بؤیۆك هیکل‌لی
بَـزبۇروتلو: یاراشێقلی – گؤرکملی
چیبین: آرێ – زنبور
اؤله‌زیمیش سسی: جان وئررکن چێخان سس

#سون - ۱۴۰۲

@MuncuqAz
https://t.me/Sancaq_media/7060

⭕️ Qəddar padşah, səsli nağıllar

⭕️غَدّار پادشاه، سسلی ناغیل‌لار

🔹ایضاح؛

غَدّار، عربجه کؤکنلی بیر کلمه‌دیر و «ظالم، آجیماسیز، قییجی» آنلامینا گلیر.


🔷ناغیل‌لار! اوشا‌قلار و یئنی‌یئتمه‌لر اۆچون! (آذربایجان تۆرکجه‌سینده کارتون)

@MuncuqAz
https://t.me/Sancaq_media/7056

⭕️رسمی چکیب، گؤندرن:

#داغلار_رادمهر - ۸ یاشێندا - خیاو شهریندن

***

🟣حرمتلی عائله‌لر اوشاقلارێنیزین چکدیکلری نقّاشی‌لری بیزه گؤندریز، اؤز آد و عکسلری ایله بیرلیکده مونجوق صفحه‌سینده چاپ اوْلونسون.

@MuncuqAz
https://t.me/Sancaq_media/7054

⭕️ناز قێزیم
✍️#حاج‌علی_دیاردوست_مغانلو – تنکابن

قوزو اَملیک، قیز املیک
اطرافی قار، بیز املیک
نوْروز گۆلون در بالا
بیرچَـڲینه دۆز املیک

بو گؤزللیک هاردا وار
قوزو دا وار، قاردا وار
دوْداغوندا گۆلوشون
اۆزونده بیر خال دا وار

نازلێ قێزیم، ناز قێزیم
طبیعته باز قێزیم
من سنه، قوْشما قوْشدوم
سن، دفتره یاز قێزیم

«علی» سؤوَر بو حالی
آق اۆزده قارا خالی
هئچ نقّاش چکه بیلمز
طبیعتده بو حالی

@MuncuqAz
https://t.me/Sancaq_media/7050

⭕️تئز قاچان،
تئز یوْرولار.


@MuncuqAz

⭕️بؤیۆك ننه‌م‌گیلده
✍️یازان: #دکتر_شایان

آران، آنا آناسێ‌گیلی، جانێندان چوْخ سئویردی.
آناسێ‌نین قوْجاق عطیر دادێنی، بؤیۆك ننه‌سی‌نین قوجاغێندان باشقا، کیمسه‌نین قوجاغێندا دادا بیلمه‌زدی.
آنا قوجاغێندان سوْوای هئچ بیر قوجاق اوْنا قانێق وئرمه‌ییردی.
آرانێن قارێ ننه‌سی، قارێ دده‌سی‌له، هابئله دایی‌لاریلا بیرلیکده، اوْنلارین کندلریندن اوزاقداکی، آغ‌کتده‌ یاشایێردیلار.
ایلده ایکی، اۆچ کَره*، اۆچ ساعاتلیق پیادا‌ چؤل بایێرلیق یوْلونو، آناسێ‌نین اتَـڲیندن یاپێشیب، دده‌سی‌گیله گئدیردیلر. یوْل بوْیو یوْرولاندا، آناسێ اؤنو کۆره‌ڲـینه آلاردێ.
اوزون یوْلون سوْنوندا، آغ‌کنده چاتمادان، کنده قارشێ، اوجا یاماجلاردان دوروب باخاندا، آغ‌کندین گؤز آلێجی دورومو دۆم‌آغ اێلغیمدا* آرانێن، جان ائوینی سئویندیریردی، بیر آزدان، آناسێ‌نین‌ عایله‌سی‌نین گۆلر اۆزلری، ایستی قوجاقلارێ، سئوینجینی قات – قات آرتاردێ.
بو سئوینجلی گؤروشلرده، بئش‌ - آلتی یاشا دوْلارکن، بیر ایل یای فصلینده، قوْجا ننه‌سی، اوْنو آناسێندان ایسته‌دی کێ، یای چێخاناجاق اوْلاردا قالسێن. سحرلر، مال‌لارێ قوْروغا* سۆروب، گئجه‌لر قوْروقدا قالان دایێسی‌گیله گۆنده‌لیک یئمک‌لرینی گؤتۆرسۆن.
آناسێ، آرانێن سئوینجینی آنلایێنجاق، قوْجا ننه‌نین ایستَڲینه یوْخ دئمه‌دی. سوْنرا اۆزونه گۆلومسه‌ییب، سوْروشدو:
- دارێخمازسان کی، قاداسێ؟
- یوْخ آنا، من قوْجا ننه‌می چوْخ سئویرم.
- اوْلسون، قالگینان. آما هاچان دارێخسان، دایی‌لاریندان بیرینه قوْشولوب گلرسن.
- یاخشی آنا.
آناسێ دوْیونجاق اوْنو اؤپۆب، باغرێنا باسێب، اوْندان آیرێلدی. آتاسێ ایله آتا مینیب، اؤز ائولرینه قایێتدیلار.

آرانێن آناسێ‌نین بوْشلوغون، قوْجا ننه‌سی‌نین ایستی یانار قوجاغێ دوْلدوروردو.
آران گۆنده سحر تئزدن بوْز ائششڲی مینیب، مال‌لارێ قاباغێنا قاتێب، یارێم ساعاتلێق قوْروق یوْلونا دۆشوردو. دوْغروسو، مال‌لار اؤزلری یوْلو تانێیارکن، چاشمادان، بیر باشا گئدیب، قوْروغا چاتاردیلار. هابئله ترسینه ائو یوْلونو دا آرخایێنجاق تانێیب، قایێداردیلار، آران یالنێزجا، اوْنلارین آرخاسێندا قارا وئره‌ردی.
ائششڲین بئلینده‌کی تئرده، یئمک‌لری دایێسی‌گیله چاتدیراردی.
قوْروقدا خێرمان* دؤڲۆلوردو، بیچین، بچیلیردی، اوْت دریلیردی، گۆن‌اوْرتا چاغێندا دا چارداقدا چای –چؤرک یئییب ایچیلیردی.
دایێسی‌گیل یاندێریجی گۆنش‌لیکده چالێشارکن، آران چارداقدا، بولاق باشێندا، بوْیوندان اوجا بیتگی‌لر اوْرتاسێندا اوْیونلار اوْینایێردی.

🔶آچێقلامالار؛

اۆچ کَره: اۆچ دفعه
اێلغیم: قۇرو، سۇسوز چؤل‌لرده بُخارێن یئره یایێلیب، اوزاقدان سو کیمی گؤرۆنتوسو – سَراب
قوْروق: اَکیلمیش یئرلر (بوْستان، زَمی، اوْتلاق و....)
خێرمان دؤڲمک: دَنلی بیتگی‌لری سۆنبولدن آێێرماق عملیّاتی (بۇغدا، دۆڲۆ، آرپا و....)

#سون

@MuncuqAz
https://t.me/Sancaq_media/7045

■ 2381 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز دوشنبه 8 بهمن ماه 1403

🔹فایل pdf صفحات نشریه در لینک کانال تلگرام مهدتمدن⬇️
https://t.me/mtnewspaper

�� www.mtnews.ir
🌐 www.asanews.ir
☎️ 04135550663
📳 09362822918
🆔 @asanews

«#سانجاق»، سیاسی- اجتماعی مهد تمدن گۆنده‌لیگی‌نین ۲۳۸۱. سایێنداکی تۆرکجه صفحه‌

«مونجوق» صفحه‌سی، تۆرکجه یازێب - اوْخوماغێ سئون اوشاقلار و یئنی‌یئتمه‌لریمیز اۆچون چیخیر.

@SancaqDergisi
@MuncuqAz

🌐 https://www.instagram.com/sancaq2
�� https://instagram.com/asanews.ir

⭕️⭕️سایێن اوْخوجولار، ایستکلی بالالار!

🔷مونجوق یوْلونوزو گؤزله‌ییر. یازیلارێنیزی، شعرلرینیزی، حکایه‌لرینیزی و چکدیڲینیز نقّاشی‌لری مونجوغا گؤندرین.

⭕️عزیز اوشاقلار!

مونجوق سیزلرله دانێشماق، سیزلرله قالماق ایسته‌ییر. سؤزلرینیزی مونجوغا دئیین، ایستکلریزی مونجوقدان ایسته‌یین. مونجوغون أن بؤیۆك آرزێسی سیزلرله یوْلداش اوْلماقدیر.

🟣آدرسلریمیز:

👇

sancaq2024@gmail.com (ایمیل)
@tansu6252(تلگرام)
@Buqday (تلگرام)

@MuncuqAz
@SancaqDergisi

https://t.me/Sancaq_media/7043