БУЮК ЮРИШ

Бахт ва бахтсизликнинг ораси, билсанг,
Бир қадам — масофа жуда ҳам камдир.
Бахтсизлик томондан бахт сари жилсанг,
Бу бориш энг олий юриш, қадамдир.

Биродар, уқдингми, ўрнингдан тургин,
Боргин, бахтсизликдан бахтингни ярат.
Ундан тагкурси сол, сўнг уй ҳам қургин,
Бу бахтсиз дунёга хўп, кўп бахт тарат.

Бахтнинг гул уруғин сочгин, сеп кўпроқ,
Худо ҳам ҳаракат қилганга дўстдир.
Очунда бир сиқим қолмаса тупроқ,
Ҳовучингда бахтнинг дарахтин ўстир.

Бу бориш — яшашдан маъно топмоқдир,
Бу бориш — бировга яхшилик қилмоқ.
Бу бориш — бахтсизлар бозорин ёпмоқ,
Бу бориш — одамлар қалбини билмоқ.

Бу қадам — ўзингдан кечмоқ, бермоқдир,
Бу қадам — ўзликни топишнинг сеҳри.
Бу қадам — муҳаббат дурин термоқдир,
Бу қадам — болалар кулгиси, меҳри.

Бу юриш — Ватанга хизмат қилмоқдир,
Бу юриш — халқингга хизматкор бўлмоқ.
Бу юриш — дунёга байроқ илмоқдир,
Бу юриш — хотиржам яшаш, тинч ўлмоқ.

2025 йил 17 апрел,
Корея Республикаси Кападо ороли.

Фозил Фарҳод

👉 https://t.me/fozilfarhod 👈