Давлат органи ходими ушбу орган бўйсунувидаги ОТМда қўшимча равишда ўқитувчилик қилолмайдими?

Менга айни шу масалада савол келди. Бир давлат бошқаруви органи раҳбари ўринбосари қўшимча равишда шу давлат органига бўйсинувчи олий таълим муассасасида ўқиувчилик қилиб, талабаларга дарс бераётган экан. Ва унга ўтилган дарс соатларидан келиб чиқиб, иш ҳақи тўлаб келинган. Ана энди текширувчилар келиб, бу иш ноқонуний бўлганини ва ушбу раҳбар ходимга ОТМдан ортиқча иш ҳақи тўланганлигини даъво қилаётган экан. Асосий камчиликлардан бири сифатида ОТМга ўқитувчилик лавозимига ишга қабул қилишда меҳнат шартномасида “ўриндошлик” деб ёзиб кетилгани экан.

Масала шундаки, Вазирлар Маҳкамасининг 2012 йил 18 октябрдаги 297-сонли қарори билан тасдиқланган “Ўриндошлик асосида ҳамда бир неча касбда ва лавозимда ишлаш тартиби тўғрисида”ги Низомнинг 4-бандида ўриндошлик асосида ишлаш таъқиқланган ишлар бирма-бир келтириб ўтилган. Шулар орасида, аниқроғи, 4-банднинг еттинчи хатбошисида ҳақиқатдан ҳам, давлат бошқаруви органларининг ходимлари ушбу орган бўйсинувидаги ва назоратидаги ташкилотларда ўриндошлик асосида ишлаши мумкин эмаслиги кўрсатилган.

Лекин, таълим ташкилотлари, жумладан, ОТМлар борасида “демак, мумкин эмас эканда” деб хулоса қилишга шошилманг. Чунки, шу таъқиқ қисмининг давомида “соғлиқни сақлашни бошқариш органларида банд бўлган врачлар ва таълимни бошқариш органларида банд бўлган ўқитувчилар бундан мустасно” деб аниқ қўрсатилган.

Қолаверса, ушбу Низомнинг иловаси билан тасдиқланган “Ўриндошлик асосида ишлаш ҳисобланмайдиган ишлар рўйхати”нинг 1-бандида ўқитувчилик фаолияти агар бу асосий иш жойидан ташқаридаги иш бўлса, ўриндошлик иши ҳисобланмаслиги белгилаб қўйилган.

Бу дегани, давлат бошқаруви органи ходимининг, шу жумладан, рахбар ўринбосарининг қўшимча равишда ушбу орган таркибидаги ОТМда ўқитувчилик қилиши ўриндошлик иши ҳисобланмайди. Демак, ўриндошлик ишларига доир 297-сонли Низомнинг 4-банди еттинчи қисмида таъқиқ давлат органи ходимининг шу орган таркибидаги ОТМдаги ўқитувчилик фаолиятига тегишли эмас.

Тушунишимча, текширувчилар меҳнат шартномасида “ташқи ўриндошлик асосида ишга қабул қилинди” деб ёзилгани учун, мавжуд ҳолатни ўриндошлик деб қабул қилган ва шунга кўра ходимнинг бўйсинувдаги ОТМдаги ўқитувчилик фаолиятини ноқонуний деб хулоса қилган.

Айнан шу ҳолат кечаги постимдаги қонунбузарлик ҳисобланмайдиган техник хатоликка бир мисол бўла олади. Чунки, қонунчиликда ва Вазирлар Маҳкамасининг 297-сонли қарори билан тасдиқланган Низомда ўриндошлик иши эмас деб белгиланган ишни кимнингдир хатоси билан меҳнат шартномасида “ўриндошлик” деб ёзилиши бу шунчаки техник хатоликдир.

Бундай ҳолатларни қонунбузарлик деб, тўланган иш ҳақи суммаларини эса зарар деб баҳоланиши мутлақо нотўғри.

@doktorantlarofficial
@doktorantlarofficial_group