10 йил аввалги шеър...

ҲАЗРАТИМ

1.
Бугун ўз отамни сўнгги манзилга
Кузатиб қўйгандек бўшашиб қолдим.
Изтироб сиғмайин кўзга, кўнгилга,
Бағрини куйдириб қоғозга солдим.

Бўйнимда зил-замбил юкка айланиб, 
Ҳайҳот, эзаётир мунгли ҳасратим.
Бунда диллар қолур дардга бойланиб…
Абад манзил сари кетар ҳазратим.

Қабристон  – охират йўлининг боши
Табаррук инсонни кутаётир жим.
Туғилишга баъзан йўғу иложи,
Ўлимдан бенасиб қолмайди ҳеч ким.

Қўлларда тобутмас, дунё чайқалар
Йиғлар, юпатганга боқмайди қиё.
Маъюсланиб анбар ортидан қарар.  
Юрагин йўқотган Ўрта Осиё…

Туркистон бемадор, беҳол, бемажол,
Тошкент бергиси йўқ бахт қуёшини. 
Андижон не этиб юпатар, савол,
Шайхи ташлаб кетган Булоқбошини…

Қалбдан чиқиб келиб ғамланиб чопиб
Истиржо жаҳонга ҳаводай тўлди…

2.
…Устоз китобларин қидириб топиб.
Кўпроқ ўқимоқнинг фурсати бўлди.
   
Уч кунлик ой каби ёришиб, ёниб
«Тафсири ҳилол»лар сочаётир нур.
Ҳадис шарҳларидан ҳаёт қувониб,
Токи ўлгунича яшайди масрур.

Набий меросхўрин меросларидан,
Сайқалланиб борар онгу шууримиз.
Ошиб бораверар ўқиб баридан
Тасаввуф ҳақида тассавуримиз.

Битикларин кўзга тўтиё билиб
Кучлар топа олсак, юзга сургани.
Барини ўрганиб, амаллар қилиб,
Шоядки, тақводор бўлсайдик, қани…

Миллатга ҳаётбахш фидоий кўмак
Олим ўлса агар, ўларкан олам,
Мен ҳам шу оламнинг зарраси, демак,
Демак, ҳақиқатки, ўлибман мен ҳам!..

Хотира – эҳтиром бешигидир чин,
Ёдлар ёритгайдир юрак ойнасин.
Эслаганда ҳар дам дуоларда тил   
Ул зотни Роббимиз раҳмат айласин!

Ўткирбек Муҳаммадсобир

https://t.me/utkirbek_muhammadsobir

ТАШРИФИ РАМАЗОН

Ҳилол кўтарилди, шом тушди қатъий,
Шаъбон Билол бўлиб бошлади азон.
Руҳу жон муқтадий, жаҳон муқтадий,
Кўнгил меҳробига ўтди Рамазон.

Ўткирбек Муҳаммад Собир

РАМАЗОННИ ҚАРШИЛАБ

Шом еган ой яшнаган пайти,  
Яқинларда тинганда азон,
Болалардек рамазон айтиб
Остонада турар рамазон.

Бисотимда неки бор, барин
Қўлларингга қўшқўллаб тутай.
Бир қучоқла тўлдириб бағрим,
Ғамларимни буткул унутай.

Эшигимни топганинг не бахт,
Танлаб-танлаб келганинг гўзал!
Сиғмай қолиб оламга бу вақт,
Соғинганим билганинг гўзал!

Ўттиз кеча зиёфат берай,
Қулинг бўлай ўттиз кундузинг.
Фармонингга бош эгиб келай,
Остонамга келганда ўзинг.

Шом еган ой яшнаган пайти,  
Юлдузчалар милтиллаган он.
Болалардек рамазон айтиб
Дарвозамда турар рамазон.

Раҳмат билан келдим дейди у,
Мағфиратга борми харидор?
Дунёсига туганмас хайру
Охиратга борми харидор?

Кел, қўлларинг ўпай, султоним,
Кулбам узра келтирдинг шараф.
Кундуз каби кулди осмоним,
Тўймаяпман кўзингга қараб...

Шом еган ой яшнаган пайти,  
Ўз уйига қайтганда шаъбон.
Бўй кўрсатар рамазон айтиб
Остонада турган рамазон.

Ўткирбек Муҳаммадсобир

https://t.me/utkirbek_muhammadsobir

Bag‘ridan ketganimga 4-5 kun bo‘lgan Madina yana o‘ziga chorladi. Alhamdulillah!

https://t.me/utkirbek_muhammadsobir

#yangisi

Yuzim oydin,
Ko‘zim oydin,
So'zim oydin:

Oy Madinam,
Yo Madinam,
Senga yurdim.

Ruhda huzur,
Jonda surur,
Ko‘ngilda nur...

Zavqim toshib,
Nafsim oshib,
Qalbim ochib...

Men g‘arib qul,
Tortar nuqul
Ishqi Rasul...

Yashil gumbaz,
Chorlab, qo‘ymas,
Yurak to‘ymas...

Naqshi baxtim,
Cho‘kmas taxtim,
So‘nmas ahdim,

Sadoqat-la,
Saodat-la,
Salovat-la

Oy Madinam,
Yo Madinam,
Senga yurdim.

O‘tkirbek Muhammad Sobir

#yangisi

Ой мусулмон, Қуёш мусулмон,
Ер мусулмон, осмон мусулмон,
Он мусулмон, замон мусулмон,
Фақат инсон қайсар негадир?

Тоғ виқори Аллоҳу Акбар,
Субҳаналлоҳ ҳар ёнда сарвар,
Сано сочган заминга заргар,
Фақат инсон қайсар негадир?

Муножотда йиғлагуси най,
Қамиш найга айланмиш атай,
Зикри узра тинмас лафзи Ҳай,
Фақат инсон қайсар негадир?

Ҳар ўлимда қиёмат бошлар,
Ҳар қабрда кичик бир маҳшар,
Тупроқ ичра тан ёниб-қақшар,
Фақат инсон қайсар негадир?

Ғор оғзида пойлайди Қитмир,
Тиғ бўғзида қўчқору сигир,
Жаннат учун туя ҳам дилгир,
Фақат инсон қайсар негадир?

Дўзах юлар ҳар куни юзин,
Фарёд урар қамчилаб ўзин,
Ёқар уни бир жуббул ҳузн,
Фақат инсон қайсар негадир?

Замин қанча зўрларни ютди,
Замон умру ёшин унутди,
Дунё қариб, асолар тутди...
Фақат инсон қайсар негадир?

Ўткирбек Муҳаммад Собир

#yangisi

Butun odamzotdan umiding tugab,
Xudoga qaytasan, bechora, abgor.
Alloh qaytishingni bilishi bor gap,
O‘zing ham bilgaysan kelishing takror.

Ne uchun ilk boshda demaysan Robbim,
Oldin Xoliqingga kelmaysan, nodon.
Bosh egib borganing o‘sha maxluq kim —
O‘zingdek umidi tugagan inson.

Izoh: bir hikmatli gap qofiyaga tushdi.

O‘tkirbek Muhammad Sobir