Улар “ташмачилар”ми?

Танишинглар, сизлар “ташмачи” дея жазолаган ватандошлар:

“Одамлар Қозоғистондан қайтишда шахсий эҳтиёжлари учун асосан ёғ, гўшт, “памперс” ва “порошок” олиб киришади. Энг кўп кўзим тушганлари шулар”.

“Ҳозирги шароитда ҳаммага 10 минг сўм бўлса ҳам иқтисод бўлгани яхши. Шундай қилиб ўтиб-бориб келишяпти, бизга қараганда [Қозоғистонда] арзонроқ, анча фарқ бор-да”.

“Мана, болаларимга, невараларимга конфет олиб келяпман. Пенсиям етмайди, 881 минг сўм оламан. Оёғим, белим оғрийди, озгина “лечение” учун, тирикчилигим шу. Бегоналарга эмас, қизларимга, ўғилларимга сотаман. Улар менга пулини беради.
[Қозоғистонда] колбасалар, геллар арзон-да. [Кир ювиш воситасини] 42 минг сўмга олган бўлсам, бизда 90-100 минг сўм, айтинг, нима қилайлик?”.

“Колбаса, гел, порошоклар, “памперслар”... У ерда кўп нарса арзон-да. Деярли ярим нархида. Мисол учун, [идиш ювадиган] гел у ерда 40 минг бўлса, бу ерда 80 минг. 4-5 кунда бир, 1 ҳафтада бир бориб келаман. У ерда қариндошларимиз бор, шунинг учун”.

“2-3 кун қонуни” кучга кириши билан билан энди улар арзонроқ колбаса, конфет, йогурт ея олишмайди, арзонроқ памперсдан маҳрум бўлишади. Уддаладингизлар.

Мана энди “маҳаллийлаштирувчи” олигархлар ниҳоят тўйса керак.

Ўзэнергосотиш тарифлар ошиши арафасида сотиб олиш ва сотиш битимлари ҳақида қисман маълумотлар эълон қилмоқда

2025 йил 10 апрель куни "O'zbekgidroenergo" АЖ билан 3,3 трлн.сўмлик электр энергияси сотиб олиш тўғрисида битим тузган Ўзэнергосотиш 17 апрель куни "Issiqlik elektr stansiyalari" АЖ билан 6,8 трлн.сўмлик электр энергия сотиб олиш тўғрисида битим тузган. Аввалги битимда бўлганидек, бу битимда ҳам қанча муддат давомида ва қанча ҳажмда электр энергияси сотиб олаётганини ёки тўлов шакли ва усули очиқланмаган. Яъни, электр энергияси қанчадан сотиб олингани ноаниқлигича қолмоқда.

Айни пайтда, Ўзэнергосотиш АЖ сотиш бўйича тузган 4та битим "Hududiy elektr tarmoqlari" АЖ (5,5 трлн.сўм; 2,6 трлн.сўм; 1,4 трлн.сўм) ва "O'zbekiston milliy elektr tarmoqlari" АЖ (1,1 трлн.сўм) инобатга олинса, 430 млрд.сўмдан ортиқ ижобий фарқ шаклланганини кўриш мумкин. Яъни, иккита асосий ишлаб чиқарувчи бўйича хулоса қилинса, электр энергиясини бюджетдан субсидиялашга умуман ҳожат йўқ.

Албатта, бу тўлиқ картина эмас. Ўзэнергосотиш АЖ яна ДХШ шартларида электр энергияси ишлаб чиқарувчи, янги газ-буғ поршенли, қуёш ва шамол станцияларидан ҳам электр энергияси сотиб олади (аксарияти бўйича нархлар ёпиқ). Лекин бир нарса аниқки, бу сегментда электр энергияси бўйича кафолатланган сотиб олиш нархлари эски станцияларникидан анча арзон.

Эслатиб ўтамиз, Ўзэнергосотиш АЖ ҳали бирон марта молиявий натижаларини эълон қилмаган. Йирик битимлари бўйича муҳим фактларни ҳам охирги ойда фақат аффилланган шахсларга оид қисмини, ундаям тўлиқ бўлмаган шаклда очиқламоқда.

Олтин қуймалар чиқарилганидан буён 2,33 каррагача, олтин тангалар грамми 3,65 каррага қимматлаган

2018 йил 28 ноябрдан Ўзбекистонда олтин тангалар сотуви бошланган. Ўшанда вазни 31,1 трамм бўлган 999,9 пробали олтин 12,7 млн.сўмдан сотилган. Бир грамм олтин 408,4 минг сўмдан тўғри келган.

2020 йил 2 ноябрдан Марказий банк олтин қуймаларни тижорат банклари орқали сотувга қўйишни йўлга қўйган. Ўшанда, масалан, 999,9 пробали 50 граммлик олтин қуйма 32,177 млн.сўмдан сотилган. Бир грамм олтин 643,5 минг сўмданга тушган.

Бугун, 2025 йил 22 апрель куни Марказий банк белгилаган олтин қуймаларининг янги котировкаларига кўра 50 граммлик олтин қуйма 74,673 минг сўмдан сотила бошланди. Бугун 1 грамм олтин 1 493,5 минг сўмга баҳоланмоқда.

Демак, Ўзбекистонда олтин тангалар муомалага чиққандан буён олтин 3,65 баравар, олтин қуймалар чиққандан буён эса 2,32 баравар қимматлаган.

“2-3 кун қоидаси” маъмурчилиги қанча вақт олади ва қанчага тушади?

Иқтисодчи Ботир Кобилов телеграмда ва твиттерда савол қўймоқда:

“Буни маъмурчилигининг ўзи ҳам барчанинг вақтини кетқазади. Божхоначиларни ҳам, истеъмолчиларни ҳам. Истеъмолчилар чет элда неча кун бўлганликлари, қўлларидаги ноутбук ва телефон нархи қанча, чет элдан қанча витамин/дори заказ қилганликларини ёзиб юриб шуларнинг барчасининг чекларини йиғиб юриш керак”.

“Айтайлик, чемоданда кийимларнинг қиймати $500, ноутбукнинг қиймати $2000, телефон $1200.

1. Бу нархни ким белгилайди? Божхоначи ўтириб ҳисоблайдими, чек сўрайдими?

2. (500+2000+1200)-1000=$2700*(30% бож+12% ққс) = $1,134 Шунча бож тўланадими?”

Ростанам, 8 кундан кейин кучга кирадиган янги чекловлар қандай ишлаши ҳақида оддий мисолларда тушунтириш берилиши керак. Англашилмовчиликлар, ўзаро тушунмовчиликлар олди олиниши учун.

Ўзи, чекловларни тасдиқлашдан аввал масалан, Дубай, Истамбул ё Алмати рейслари ёки Дўстлик пости мисолида стресс-тестлар ўтказилдими? Божхоначилар ҳар бир ҳолатда қандай ҳужжат, савол ва ҳаракат қилиши кераклиги бўйича ўқитилдими? Масалан, йўловчи бож тўлашга пули етмаса, нима бўлади? Ўзи Божхона маъмурчилиги вақти қанчага узаймоқда? Бу бюджетга қанчага тушади?

"Бошпана" Евро яна қарийб 200 сўмга сакради

Инвесторларнинг доллардан аллақачон 3 400лик маррадан ўтган олтинга, бошқа валюталарга, хусусан еврога қараб қочиши тўхтагани йўқ ва бу Ўзбекистонда ҳам сезилмоқда. Ўтган ҳафта душанба куни евро расмий курси 450 сўмга қимматлаган бўлса, бу душанба яна қарийб 200 сўмга сакради ва 14 900 сўмдан ошди. Март охиридан буён евронинг сўмга нисбатан расмий қиймати жами 1 000 сўмга ёки 7,18%га ошди.

Халқаро бозорда айни соатларда Евронинг долларга нисоби 1,16га яқинлашмоқда ва бу қарийб 5 йиллик максимум.

Миркомил Холбоев юз бераётган силкинишларни АҚШдаги ҳозирги ноаниқликлар фонида инвесторлар Европа мамлакатларини (хусусан Германияни) "молиявий бошпана" сифатида кўришни бошлаётгани билан ҳам изоҳламоқда.

📌 Хон Сарой компаниясидан қулай турар-жой таклифлари.

Хон Сарой компаниясининг Муҳаббат Шаҳри лойиҳасида 1 хонали квартира учун бошланғич тўловни қилинг. Қолган суммани ойига 4,4 миллион сўмдан тўлашингиз мумкин.

📱 Батафсил маълумот учун:
Бот орқали боғланинг

☎️ Телефонлар:
+998712007400
+998555017400

xonsaroy.uz | Телеграм

Реклама

Олтин тарихий рекордларни янгилашда давом этмоқда

Эрталабки савдоларда олтиннинг бир унцияси 3 394 долларга етган.

Тасаввур қилишингиз учун, биз учун янги давр ҳисобланган 2016 йил декабрдан бери олтин нақ 3 карра қимматлади.

Худди пандемия даврида бўлгани каби савдо ва тариф урушлари пайтидаги ноаниқликларнинг салбий оқибатларини утилизация қилишда олтин биз учун “хавфсизлик ёстиқчаси” вазифасини бажаришда, шунингдек, охирги йилларда йўл қўйилган ва бўлажак хатоларнинг балогардони бўлишда давом этади.

Олтиннинг кўтарилиши билан бир вақтда АҚШ долларининг барча асосий валюталарга нисбатан қадрсизланиши ҳам тўхтагани йўқ. Доллар индекси 98,2гача тушиб кетган (3 йиллик минимум).

Аввалги даврларда ҳамма вақт стресс ва ноаниқликлар пайтида доллар (индекси) доим ошарди. Трамп янги маъмурияти даврида доллар хатардан қочиб олинадиган валюта мақомини йўқотиб бормоқда.

"Ташмачилик" яратилган сунъий муаммонинг оқибати, сабаби эмас

Божхона қўмитаси жисмоний шахслар томонидан товарларни божсиз олиб кириш тартибининг янада қаттиқлашганига изоҳ берипти.

Бир сўз билан айтганда, ўтган ёмон эпохадаги "10 долларлик" қонунга менгзаб "2-3 кун" қонуни деб ном берса бўладиган навбатдаги тақиқларни божхоначилар ташмачиликка қарши кураш билан изоҳлашган.

Биттагина иқтибос: "Натижада, ташмачилар кўмагида йирик партиядаги товарлар майда партияларда ҳеч қандай божхона тўловларисиз Ўзбекистон ички бозорига кириб келмоқда".

Жуда узун матнда ташмачиликка (бу сўз ўзи совок-ОБХСС даври штамларидан), аслида тижорий моккиликнинг авж олгани сабабларига тўхталмаган. Нима учун узоққа бормайлик, қўшни қардош қозоқлар ва қирғизлар шунақа сиз айтгандек "ташмачилик" билан шуғулланмайди? Нима учун Дубай ё Истамбул аэропортларида фақат ўзбекистонликлар ўзлари билан бошқа йўловчиларни ҳам товар "ташмачилиги"га жалб қилишади? Бир ўйлаб кўринг. Биласизку сабабларини.

Балки аждарҳо божлар мавжудлиги туфайлидир? Бир тўда "маҳаллийлаштирувчилар" ва маҳаллий "импортерлар" фойдасига киритилган аждарҳо божларни олиб ташланг. Ишонинг, ҳеч ким чегара ошиб телефон-у, кондиционер олгани қўшни давлатларга бормайди. Нормал давлатлардаги каби товарлар ўзаро рақобатлашувчи ва энг оптимал импорт каналлари орқали кириб келади, соғлом бозор пайдо бўлади. Истеъмолчи камбағаллашмайди.

Ҳа, айтгандай, мен ташмачилик билан шуғулланадиган яна икки жой борлигини биламан: Турк қардошлар Грузиянинг Батумисига алкоголь, тамакидан тортиб компьютерларгача бўлган товарларни сотиб олгани келишади. Ишонмасангиз, Сарпидаги постга бориб ўз кўзингиз билан кўрсангиз бўлади.

Бундан-да даҳшатли манзара Колумбия-Венесуэла чегараларида токи Венесуэла ҳукумати чегараларни ёпиб қўймагунча кузатилган. Ҳар куни ўнминглаб венесуэлаликлар телефон ё смартфон учун эмас, шунчаки овқат ёки дори-дармон олиш учун қўшни давлатга ўтиб келишган. Венесуэла ҳукумати халқи уни "шарманда" қилаётганида айблаган (балки бизнинг амалдорлар ҳам ўзбек моккилар бизни шарманда қилишаяпти, деб ўйлашаётган бўлса ажаб эмас).

Яна қайтараман, сизларга ёқмаётган ташмачиликни тугатишнинг ва шарманда бўлмасликнинг энг осон йўли аждарҳо божларни бекор қилиш. Йўқ, биз ҳақмиз деган позицияда маҳкам турилса, бу оқим барибир яна давом этаверади. Фақат контрабанда каналлари орқали. Кейин контрабандага қарши курашиш учун янги ва янги тақиқларни ўйлаб топишга тўғри келади. Ҳали худди эски замонларидек, Ўзбекистон чегараларида эмас, мамлакатимиз ичида, масалан яна Қамчиқ довонида божхона пости қад ростлайди.

Ўтган эпоханинг “10 доллар” қонуни “2-3 кун” қонуни бўлиб қайтди

Тақа-тақ тақиқнинг йўли янада осон эканку. Шунга ўтган ёмон эпохадагиларнинг нега ақли етмаган?

Ўтган эпохани янги давримиздан фарқлантириб турувчи ўша машҳур 10 доллар қонуни бўйича қўшни давлатлардан фақат шу миқдордагина божсиз товар олиб кириш мумкин эди. Бечора ўзбекистонликлар табиийки, Ўш, Қорасув ё Чимкентдан каррасига арзон кондиционер, телевизор, ҳатто дазмол олиб кира олишмасди. Чегарада пальтонинг ичидан кийиб олинганиям (сотиб олинган янги пальто, куртка ёки жемпер) ечтириларди.

Чунки 10 доллар қонуни ишларди.

Мана энди “божсиз товар олиб кириш лимитидан фойдаланиш учун фуқаро пиёда ёки автомобилда кириб келаётган пайтда камида 2 кун, самолётда келаётганида эса камида 3 кун Ўзбекистон ҳудудидан ташқарида бўлиши” керак. Кийим-кечак олиш ё кондиционер олиб қайтиш учун Ўшга ё Чимкентга 2 ё 3 кунга бормайсиз-ку, меҳмонхонада қолиш ва еб-ичиш билан эшагидан тушови қиммат тушади. Табиийки, энди каррасига арзон бозор (шоппинг) қилгани қўшни давлатларга ўтиб келиш тўхтайди.

Ўтган йили шунақа режалар борлиги айтилганида,
рости унча ишонқирамагандик. Бунчаликка боришмас, деган умид бор эди.

Қилса бўлар эканку мана.

Имконият икки карра қисқаради

2025 йил 1 майдан бошлаб жисмоний шахслар томонидан шахсий эҳтиёжлари учун нотижорат мақсадларида республикага олиб кириладиган товарларнинг божсиз нормалари ҳаво ва темир йўл транспортида киришда 2 карра қисқаради.

Янги дунё. Янги Ўзбекистон.

Шокиржонов “Ўзбекчилиги”

Журналист Шокиржонов “Ўзбекчилик” номида подкаст бошлаган. Подкастнинг илк сони меҳмони ўзбек жамоатчилигига икки йилдан бери туркий исмлар рўйхатини ваъда қилиб келаётган олим Элдор Асанов бўлган.

Асанов ва Шокиржонов суҳбати асосан жафокаш ўзбек тили ҳақида кетган.

Ўтказиб юборманг.

Ўзбек капитализми янги босқичга интилмоқда

Сўнгги вақтларда ўзбек хусусий секторида кузатилаётган энг муҳим тенденция – бу бирлашишга бўлган реал эҳтиёж ва амалий ҳаракатлардир. Яқингача ҳар ким ўз йўли билан юраётган, ресурс, бозор ва билим билан ягона экотизим сифатида алоқаси заиф бўлган бизнес тўпламлари бугун ўз ичида кооперация маданиятини шакллантира бошлади.

Айни пайтда бир қатор йирик тадбиркорлар чет элдаги ҳамкорлар билан
музокаралар ўтказишмоқда, қўшма лойиҳалар ҳақида фикр алмашишмоқда ва буни давлат эмас, балки ўз ташаббуси билан амалга оширмоқда. Қисқаси, “бизга ёрдам беринг” деган давр ортда қолди.

Маҳалла банкирлиги фақат давлат банклари орасида тақсимланади

Тизим хато қилишга ҳақли, лекин унинг самарадорлиги ўз хатоларини вақтида, токи зарар етмай тўғирлай олиш қобилияти билан чамбарчас боғлиқ.

Билгич Давлетовўз’нинг ёзишича, маҳалла банкирлиги мажбурияти қайта тақсимланган ва рўйхатда фақат давлат банклари қолган.

Бу дегани “маҳалла банкирлари” ишини йўлга қўйишга “ихтиёрий-мажбурий” равишда қўшилган хусусий банклар уларнинг бўйнига тушган мажбуриятлардан озод бўлиши мумкин.

Банк хизматларидан фойдаланувчи оддий истеъмолчилар учун бу фоизларнинг арзонлашиши, комиссияларнинг пасайиши дегани.

Қирғизистон рақамли сом чиқаради

Қирғизистон Миллий банки тўғрисидаги қонунга киритилган ўзгартиришларга кўра, энди миллий регулятор рақамли сом эмиссияси бўйича мутлақ ҳуқуққа эга бўлади.

Рақамли сомнинг оператори ҳам Қирғизистон Миллий банки бўлади. Рақамли сом анъанавий нақд ва нақдсиз сом муомаласини чекламайди, қайтанга тўлдиради. Хабарларга кўра, рақамли сом 2027 йилдан муомалага чиқарилади. Айтиш керакки, сиёсатдан масофаланган ва мустақил Қирғизистон Миллий банки турли тажрибаларда доим авангардда туради (Марказий Осиёда илк миллий валютани ҳам қирғиз қардошлар чиқарган ва сом 32 йилдан буён минтақада энг барқарор валюта бўлиб қолмоқда). Қирғиз соми чиқарилишига Ислом Каримов ва Нурсултон Назарбоев қандай муносабатда бўлишгани ҳақида бу ерда ўқишингиз мумкин.

Миллий регуляторларнинг Рақамли валютани тажриба тариқасида муомалага чиқариши тобора урф бўлиб бормоқда. Рақамли валюта технологик қулайлиги, трансакцион харажатларнинг камлиги, рақамли из қолдириши ва шаффофлиги нуқтаи назаридан афзалликларга эга деб ҳисобланилади. Бу восита хусусан, келажакда бюджет маблағларининг самарадорлигини ҳам кескин яхшилаши ва коррупцион омилларни қисқартириши мумкин.

Автомобил эгасининг фуқаролик жавобгарлиги суғуртаси ҳақида

Тармоқда автомобил эгаларининг мажбурий (ОСАГО) ва ихтиёрий (КАСКО) суғуртаси ҳақида ёзишмоқда. Daryo нашридаги суҳбатда ва ўтказилган кичик сўровномада мутахассислар ва одамлар мажбурий суғурта мукофоти ва тўлаб бериладиган суғурта миқдори иқтисодий жиҳатдан номутаносиб эганлиги, умуман олганда мазкур тизимни қайта кўриб чиқиш кераклиги ҳақида айтишган.

Мен аввал ҳам ёзгандим — ҳайдовчиларнинг мажбурий суғурта қилиш тизими аллқачон ислоҳотларга муҳтож. Бундан 5-6 йил аввал ўрнатилган меъёрлар: 56 мингга сотиб олинадиган полис билан 40 млнлик зарар суммасини қоплаш (шундан 14 млн сўми автомобилга етказилган зарар, 26 млн сўми ЙТҲ жабранувчисига) суғурта компаниялари учун ҳам иқтисодий мантиғини йўқотиб бўлган.

Яна эслатаман, мажбурий суғурта мукофотининг миқдори ва тўлов бериладиган суғурта бадали миқдори ҳам қайта кўриб чиқилиши, турли омилларга қараб табақалантирилиши зарур! Мунтазам қоидабузар ҳайдовчи билан қонунга доим риоя қилиб юрадиган ҳайдовчи учун мажбурий суғурта миқдорлари бошқа бошқа бўлиши керак. Яъни, ҳайдовчининг ЙТҲ содир қилиш эҳтимоли юқори бўлса, у етказадиган эҳтимолий зарар миқдори ҳам шунча юқори бўлади, тартибли, қоидасевар ҳайдовчининг эҳтимолий зарар миқдори эса табиийки кам бўлади.

Видеода фуқароларимиздан бири ҳам айнан шу ҳақида гапирган, яъни бу каби ўзгаришлар одамларимизнинг ўзига ҳам мақбул бўлиши мумкин.

Памперс чекловлари бекор қилинади

Ўзбекистонда юқори хавфли товарлар, жумладан, тиш чўткалари, тагликлар, болалар кийимларини давлат рўйхатидан ўтказиш амалиёти бекор қилинади.

Бугунги йиғилишда Давлат раҳбари хавф даражаси юқори бўлган 7 та товар гуруҳидаги маҳсулотларни давлат рўйхатидан ўтказиш амалиёти бекор қилиниши ҳақида маълум қилганди.

🇺🇿UZTELECOM – 12 миллион ватандошларимиз ишонч билдирган тармоқ

Ўзбекистон телекоммуникациясида UZTELECOM – замонавий рақамли инфратузилманинг асосий таянчи ва энг йирик оператор.

🛜UZTELECOM мамлакатнинг рақамли харитасини ўзгартиришга қаратилган лойиҳаларни амалга оширмоқда:

•2024 йилга келиб 290 000 км дан ортиқ оптик толали тармоқ қурилди (Ерни 7 марта айланишга тенг).

•96% дан ортиқ хонадон оптик интернет билан қамраб олинди (4K видео, видеоқўнғироқлар, «ақлли» уйлар).

•UZTELECOM – МДҲда биринчи бўлиб бутун мамлакат бўйлаб 5G жорий қилган оператор.

•2024 йилда 5.5G технологияси синовдан ўтказилди (дунёдаги топ-3 оператор қаторида).

UZTELECOM – Ўзбекистоннинг рақамли ривожланишининг локомотивидир.
Реклама

“Мопеднинг ўзи 300 доллар турса, уни стандартдан ўтказиб, сертификат олишга яна шунча маблағ кетади”

Давлат раҳбари курьерлик хизмати корхоналари мопед олиб келиб, одамларни ишли қилаётгани, лекин мопеднинг ўзи 300 доллар турса, уни стандартдан ўтказиб, сертификат олишга яна шунча маблағ кетаётганини кўрсатиб ўтган.

Витринали совуткичларни сертификациялаш жараёни 3 ойгача чўзилаётгани, айрим тиббий ускуналарни Фармқўмитада рўйхатдан ўтказиш харажати уларнинг нархидан 10 карра қимматлиги танқид қилинган.

Стандартлаштириш ва сертификатлаштиришда
манфаатлар тўқнашуви ва коррупцион оқибатлар

Давлат раҳбари Стандартлаштириш ва сертификатлаштириш тизимидаги эскирган талаблар ва бюрократия тадбиркорларнинг “қўлини боғлаётгани”, соҳада коррупцияни келтириб чиқараётганини кўрсатиб ўтган.

Тизимда сертификатлаш органлари бир пайтнинг ўзида бозор назоратини ҳам олиб бораётгани, бу эса манфаатлар тўқнашувига олиб келаётгани қайд этилган.

“Пандемия даврида бўлгани каби дунё бўйлаб таъминот ва қиймат яратиш занжирларида узилишлар пайдо бўлиши мумкин”

Юқори тарифлар оқибатида халқаро савдо ҳажми 3,5 триллион долларга қисқариб, дунёдаги инфляция даражаси 7,5-8 фоизга кўтарилиши ҳақида прогнозлар берилмоқда.

Давлат раҳбари янги чақириқлар шароитида пандемия даврида бўлгани каби дунё бўйлаб таъминот ва қиймат яратиш занжирларида узилишлар пайдо бўлиши мумкинлигига эътибор қаратган.

Айниқса, бундай ҳолат жаҳон экспортида юқори улушга эга тўқимачилик, электротехника, автомобилсозлик, озиқ-овқат саноати каби “драйвер” тармоқларга катта зарба бериши мумкин.

“Аҳолининг ҳаддан ташқари қарздорлиги хатари мавжуд”

Fitch Ўзбекистонда чакана секторда ўсиб бораётган қарз хатарлари ҳақида огоҳлантирмоқда.

“Шубҳасиз, бу ерда паст база кўрсаткичи таъсири бор, бу эса юқори ўсишни изоҳлайди. Шу билан бирга, биз аҳолининг ҳаддан ташқари қарздорлик хатари мавжудлигини тан оламиз. Шу сабабли, яқин келажакда Марказий банк томонидан потенциал хатарларни олдини олиш бўйича навбатдаги чора-тадбирлар кўрилишини кутмоқдамиз”.

Агентлик вакилининг фикрича, чакана кредитлаш бозорида қизиш хавфи мавжуд бўлиб, бу келгусида активлар сифати билан боғлиқ муаммоларга олиб келиши мумкин.

Кўп марта такрорлаганимиздек, омонатлар бозорида кузатилган қизиб кетишнинг илдизлари чакана кредитлаш, айниқса микроқарзлар ажратишнинг атипик ўсишига, микроқарзлар айрим банкларнинг мономаҳсулотига айланиб қолгани билан боғлиқ.

Пул массасининг ўсиши тезлашган

Март ойи давомида Кенг маънодаги пул массаси 6,6 трлн.сўмга ўсган ва 281,5 трлн.сўмга етган. Миллий валютадаги пул массаси янада тезроқ, 8,4 трлн.сўмга кенгайиб 22,5 трлн..сўмдан иборат бўлган.

Ой давомида муомаладаги нақд пуллар қолдиғи 2,8 трлн.сўмга кўпайган ва 52,5 трлн.сўмни ташкил этган.

Қишдаги инертликдан кейин март ойида иқтисодий фаолликнинг тикланиши ҳисобига бўлса керак, пул массасининг йиллик ўсиш суръатлари жуда юқорилигича қолмоқда: хусусан, миллий валютадаги пул массасининг ўсиши 39%га етган.

Ликвидлик кенгайиб бормоқда. Вакиллик ҳисобварақларидаги маблағлар қолдиғи ой охирида 1,2 трлн.сўмга ўсиб, 22,8 трлн.сўмни ташкил этган.

"Давлат банклари портфелидаги 90 кундан ортиқ муддати ўтган кредитлар улуши 9−10%га етади"

Fitch прогнозларига кўра, 2025 ёки 2026-йилларда тўлов муддати 90 кундан ортиқ кечиктирилган кредитлар даражаси (МҲХС бўйича 3-босқич) ўзининг энг юқори нуқтасига — агентлик ҳамкорлик қилаётган банкларнинг умумий кредит портфелининг 9−10%ига етади ва шундан сўнг муддати ўтган кредитларнинг ҳисобдан чиқарилиши ёки қайтарилишига қараб аста-секин пасая бошлайди.

“Муаммоли кредитларнинг энг юқори даражаси энг мураккаб сегмент — имтиёзли кредитлаш функциясини бажарувчи давлат банкларида қайд этилмоқда. Кўришимиз мумкинки, сўнгги йилларда ушбу банклар катта ҳажмдаги муаммоларни тан олишган ва шунга мос равишда улар учун катта ҳажмдаги захираларни яратишга мажбур бўлишган, бу эса уларнинг даромадларига таъсир кўрсатган. Давлат банкларининг баъзилари сўнгги бир неча йил ичида зарар кўрмоқда”, — деган Fitch вакили.

Сўнгги 5 йил ичида банк секторига ажратилган $2 млрдлик давлат ёрдамини “салмоқли” деб баҳоланган. Давлат томонидан кўрсатилаётган ёрдамнинг асосий қисми имтиёзли кредитлаш вазифасини бажарувчи банкларга йўналтирилган бўлиб, бу маблағлар зарарларни қоплаш, муаммоли кредитларни захиралаш ва банкларнинг капиталлашувини қўллаб-қувватлаш учун мўлжалланган.

Суғурта бозорининг регулятори ким? Қонун бўйича?

"Суғурта фаолияти тўғрисида"ги қонун, 5-модда: Ўзбекистон Республикаси Молия вазирлиги ҳузуридаги Суғурта бозорини ривожлантириш агентлиги ваколатли давлат органи.

02.09.2023 йилдаги 291-сонли қарор:

Истиқболли лойиҳалар миллий агентлиги ҳамда Иқтисодиёт ва молия вазирлигининг:

Иқтисодиёт ва молия вазирлигининг капитал бозорини, шу жумладан қимматли қоғозлар савдосининг ташкилотчилари ва Қимматли қоғозлар марказий депозитарийси фаолиятини тартибга солиш, корпоратив бошқарувни ривожлантириш, шунингдек, суғурта ташкилотлари фаолияти устидан назоратни амалга ошириш бўйича вазифа, функция ва ваколатларини Агентликка ўтказиш ва уни ушбу соҳаларда тартибга солиш, лицензиялаш ва рухсат бериш тартиб-таомилларини амалга ошириш бўйича ваколатли орган этиб белгилаш.

Яъни, камида 1 йилу 7,5 ойдан бери қонун бўйича қудратли Агентлик суғурта бозорининг регулятори эмас.

Агентликка нисбатан ишлатилган "Қонунсиз суперрегулятор" шунчаки ибора эмас, балки амалда ҳам шундай

Ўзбекистон Ресубликасининг "Электрон тижорат тўғрисида"ги қонуни 7- модда:

Ўзбекистон Республикаси Ахборот технологиялари ва коммуникацияларини ривожлантириш вазирлиги электрон тижорат соҳасидаги ваколатли давлат органидир.

30.11.2023 йилдаги 381-сонли қарор:

Рақамли технологиялар вазирлиги, Инвестициялар, саноат ва савдо вазирлигининг электрон тижоратни тартибга солиш ва ривожлантириш соҳасидаги ҳамда Иқтисодиёт ва молия вазирлигининг лотерея ташкил этиш ва букмекерлик фаолиятини тартибга солиш соҳасидаги вазифа, функция ва ваколатлари Истиқболли лойиҳалар миллий агентлигига ўтказилади.

"Норматив-ҳуқуқий ҳужжатлар тўғрисида"ги қонунга кўра, Қонуннинг қарордан устуворлиги белгиланган.

Яъни, Temu'ни тақиқлаш қарорини бераётган вақтда Истиқболли лойиҳалар миллий агентлиги қонун бўйича регулятор функциясига эга бўлмаган.

Бўпти, ҳалигача супер/мегарегулятор тўғрисидаги махсус қонун йўқлиги, қолган ёндош хатар ва масалалар ҳам майли. Наҳотки, шунақа қудратли агентликда қонун ва қарорлар устуворлигини аниқлайдиган юрист йўқ?

Қайсидир давлат банкига инвестор чиқса, ҳайрон бўлардим

Яъни ҳозирги реалликларда давлат банклари хусусийлаштирилишини яна ва яна кечиктиришда давом этиши бу норма. Бошқача бўлиши ҳам мумкин эмас. Парадокс шундаки, давлат банкларининг реал қиймати йилдан-йилга арзонлашишда давом этаверади. Масалан, ҳали иккита осмонўпар бино қурмаган шартли Х банкни 2019 йилда 2 баробар қимматроқ сотса бўларди, ҳозир номиналининг ярим нархига кетмайди. Ваҳоланки, ўтган 6 йилда бу банкларнинг капиталига давлат яна қанча триллион пул берди (яъни нафақат 2019 йилдаги банк қиймати қадрсизланди, кейинги йилларда капиталга киритилган триллионлаб маблағлар ҳам қадрсизланди). Чунки банкларга нисбатан қилинаётган ғирт тескари ишлар, нобанк вазифалардан тортиб маъмурий, зараркунанда қарорларгача, сифатсиз, лекин лоял менежментгача банклар нархини фақат арзонлаштиради.

Шахсан мен давлат банклари охир-оқибатда шу банкларнинг садоқатли менежменти (кураторлари) ёки уларга боғланган бизнес тузилмалар томонидан ўзбекча усулда, сопини ўзидан чиқариб “хусусийлаштириб” олиниши эҳтимолини юқори баҳолайман (балки давлат банкларининг аҳволини тинимсиз ёмонлаштирувчи амалиёт ва ҳаракатлардан асл мақсад ҳам шудир).

Зеро биронта ақли соғ хорижий инвестор бегоналар учун токсик бўлган ялтироқ банкларга яқинлашма кўрмайди. Пули бўлса, янги банк очади ёки эркин бозордаги хусусий банклар билан коллаборация қилади.

Давлат банкларини хусусийлаштириш навбатдаги марта кечикади (бу ҳам охири эмас)

Fitch Ratings агентлигининг базавий сценарийсига кўра, 2025 йилда сотилиши режалаштирилган 3та банкнинг (Алоқабанк, Асакабанк ва ЎзСҚБ) хусусийлаштирилиши яна 1-2 йилга чўзилади.

Қайд этилишича, давлат банклари хусусийлаштирилишининг муҳим шарти жаҳон молия бозорларидаги ноаниқликлар фонида Ўзбекистонга “хорижий инвесторлар қизиқишининг барқарор мавжудлиги” ҳисобланади.

Давлат банкларининг хусусийлаштирилиши бўйича 7 йилдан бери такрорланаётган риторикага қарамай, амалиётда давлат банклари тобора банкка хос бўлмаган, маъмурий ва юқори хатарли амалиётларга жалб қилинишда давом этмоқда (ҳатто кучаймоқда). Уларнинг сотувга тайёрлашдан аввалги даврда фаол тижорийлашуви, тозаланиши ва активларининг қайта таркибланиши кузатилаётгани йўқ. Муаммоли активлар юқорилигича қолмоқда. Инвестициявий муҳит ҳам кўтаринки эмас.

Garant bankдан махсус таклиф: 6 миллиард сўмгача кредит

Garant bank юридик шахсларга қулай «Оптима» кредитини таклиф қилмоқда:

• Миқдори: 6 миллиард сўмгача
• Мақсадсиз ажратиладиган кредит (ишлаб чиқаришни модернизация қилиш, ходимлар ёллаш, маркетинг, ва ҳоказо)
• Фоиз ставкаси: 28%
• Муддати: 36 ой
• Имтиёзли даври - 6 ойгача

Ушбу кредит сизга ишлаб чиқаришни модернизация қилиш, янги ходимлар ёллаш, маркетинг кампанияларини кучайтириш ва фаолиятингизни янги марраларга олиб чиқиш имкониятини беради!

Алоқа маркази: 1326
Батафсил маълумот
Реклама

Супер(мега)регуляторга қонун керак!

Истиқболли лойиҳалар миллий агентлиги даъвоси бўйича маҳкама қандай хулоса ва қарорга келади, билмайман.

Лекин агентлик фаолиятини тартибга солиш учун махсус қонун керак. Бу фикрда собитман! Temu кейси буни яққол кўрсатиб берди ва афсуски, бу охиргиси бўлмайди. Сизларни, сизларга қўшиб Ўзбекистондаги бизнес муҳитни обрўсизлантирса, шунақа бирёқлама кейслар обрўсизлантиради. Сизларга қонун керак, деган танқидий фикр учун аслида судга бериш эмас, балки раҳмат айтиш лозимдир?

Дунёнинг ҳеч бир мегарегулятори АҚШдан тортиб Норвегиягача, Украинадан тортиб Россиягача қонунсиз, қарорлар асосида (Executive order) фаолият кўрсатмайди. Мегарегулятор фаолиятини тартибга солувчи, шаффоф ва очиқ, холис ва адолатли ишини таъминловчи, нафақат ваколатлар, унинг мустақиллигини, мажбуриятлари ва ҳисобдорлигини ҳам ўз ичига олган махсус қонун Ўзбекистонга керак. Супер(мега)регулятор қарорлар ва ҳаволакилар асосида ишлаши нафақат бозор ўйинчилари ва инвесторлар, унинг ўзи учун ҳам тўғри эмас. Ҳатто хатарли.

Айтайлик, Ўзбекистонда кўп иқтисодий ислоҳотларда маслаҳатчи бўлган Жаҳон банки сизларнинг фаолиятингиз қарорлар билан эмас, алоҳида махсус қонун билан тартибга солиниши керак, бусиз сизлар назорат қилаётган суғурта ва капитал бозоридан тортиб криптоактивлар ва электрон тижорат сегментларигача барқарор ўсиш бўлмайди, инвесторлар қизиқмайди, бозорлар бир қўлли ва монопол тарзда қолади, кучли ўйинчилар кучсизларини маъмурий йўллар билан йўқ қилади, регуляторнинг мустақиллиги таъминланмайди деб хулоса берса, Агентлик уларниям мени обрўсизлантирдинг, деб маҳкамага берадими?

Истиқболли лойиҳалар миллий агентлиги танқидни "обрўсизлантириш" деб топиб шикоят киритган

Истиқболли лойиҳалар миллий агентлиги TEMU платформасининг тақиқланишига муносабат тарзида ёзилган "Қонунсиз суперрегулятор" постида агентликни обрўсизлантиришга уриниш бўлган деб топиб шикоят киритган.

Шикоятни Агентлик раҳбари биринчи ўринбосари В. Пак имзолаган. Шикоятга Агентлик ишончли вакилининг тушунтириш хати илова қилинган. Ариза ҳозирда пойтахт ИИБ Киберхавфсизлик бўлинмаси томонидан ўрганилмоқда. Кеча оқшом чақирув бўйича терговга дастлабки тушунтиришларни ёзма ва оғзаки тарзда тақдим этдим (иш бўйича ҳужжатлардан нусха ҳали берилмади).

"Қонунсиз суперрегулятор" пости TEMU электрон савдо платформаси фаолиятини чеклаш қарори эълон қилинган 2025 йил 4 март куни ёзилган ўзаро боғлиқ ва бир-бирини тўлдирадиган кетма-кет тўртта постнинг иккинчиси:

Биринчи пост: Регулятор холис бўлиши керак, майдондаги ўйинчи ё кимгадир ёнбосувчи эмас.

Иккинчи пост: Қонунсиз суперрегулятор.

Учинчи пост: Алиэкспресс ва амазон’ни нега ёпмадинглар, ҳурматли суперрегуляторлар?

Тўртинчи пост: Ўзингиз қабул қилган қоидаларга ўзингиз амал қилинг!

Лекин шикоятда шу постларнинг фақат биттасига эътироз ва норозилик билдирилган, қолган постлар мазмуни ва мундарижасига, шунингдек, постлар ёзилишига асос бўлган сабабларга тўхталинмаган.

Инфляция кузатувларида ОАВ иштирок этмоқда

Миллий статистика қўмитасининг март ойидаги инфляция даражасини ҳисоблаш бўйича бозорлар, супермаркетлар ва бошқа катта-кичик савдо тармоқларида нарх кузатувларида бир неча ОАВлар иштирок этган.

11 апрель куни “Эски жўва” деҳқон бозори ҳамда Шайхонтоҳур туманидаги савдо ва хизмат кўрсатиш объектларидаги кузатувларда Кун мухбирлари қатнашган.

18 март куни Миробод бозоридаги ўрганишларда эса Газета вакиллари статистика ходимлари ўтказган жараёнларни кузатган.

Инфляция кузатувларида ОАВлар иштироки нафақат жараённи ёритиш учун, шаффофлик ва ишончни таъминлашда ҳам муҳим аҳамиятга эга. Балки шу тажриба баҳона инфляцияни ойда 10 кун эмас, ҳар ҳафталик кесимда кузатишга ўтилар.

​Андижонга трамвай қайтадими?

Кеча Давлат раҳбари Янги Андижонни Бобур шаҳри деб аташни таклиф этди. Бу барча андижонликларни қувонтиради. Энди Бобур янада ўзимизники: Бобур бизда, биз Бобурда яшаймиз.

Янги Андижон шаҳри қурилиши энди бошланган 2021 йилда Давлат раҳбари Андижонга трамвай олиб келган яна бир Андижон ўғлони Миркомилбойни эслаб ўтган эди:

“Миркомилбой хайр-саховат борасида ҳам бошқаларга ўрнак бўлган. Ўз ҳисобидан мактаб ва мадрасалар, масжид, шифохона, ҳаммомлар қуриш, боғ ва хиёбонлар ташкил этишга хайриялар ажратган…Бу инсон ҳатто Андижон шаҳрини қайта қуриш, бу ерда трамвай ҳаракатини йўлга қўйишга ҳаракат қилгани тарихий манбалардан яхши маълум”.

Шу ўринда, Андижон ва Бобурни боғлайдиган, Андижонда жамоат транспортини янги ва замонавий даражага кўтарадиган трамвай қуриш ҳақида ўйлаб кўриш керак, менимча (бир неча йил аввал қурилиши эълон қилинган ер усти метросидан кўра каррасига афзал ва арзон тушади).

Дарвоқе, Андижон шаҳрида трамвай линиясини қуриш ҳақидаги петиция “Менинг фикрим” порталида ҳам таклиф этилган, лекин эътиборсиз равишда таклифлигича қолиб кетганди.

Ўзбекистонда скутер миниш нечта скутер нархига тушади?

Мопед ва скутерни бошқариш учун тегишли тоифадаги ҳайдовчилик гувоҳномасига эга бўлиш талаби муддати 1 мартдан 1 октябргача узайтирилипти. Ҳартугул.

Лекин соғлом ақл бу осмондан тушган талабни бутунлай бекор қилиш керак дейди. Хўп, скутерларга скутер нархининг ярмига етадиган қиммат номерлар тақтирилди, қиммат техпаспорт берилди. Яъни, мақсад скутерларни идентификациялаш бўлса, қилинди. Энди ҳайдовчилик гувоҳномасига ўқиш ва имтиҳон топшириш талабидан муддао нима?

Барака топгурлар, шу курьерлар ва бошқа ўзининг тирикчилигини давлатга юкламай ўтказаётганларга бу товон қанчага тушмоқда, бир ўйлаб кўринглар. Битта скутерни миниш учун студент ё курьер скутер нархидан қиммат харажат қилишига тўғри келмоқдаку.

Инсоф билан-да.

Йирик солиқ тўловчилардан солиқ тушумлари яна эълон қилинмади

Март ойи якунлари бўйича ҳам Солиқ қўмитасининг Fiskal tahlillar канали топ-20 йирик солиқ тўловчилар (топ-10 давлат ва топ-10 хусусий, умумий ва тармоқлар қирқимида) тўғрисидаги маълумотларни тақдим этмади.

Маълумотларни эълон қилиш нима сабабдан тўхтаб қолгани номаълум (ўтган йилги маълумотлар эса ҳатто ўчириб юборилган). Балки айрим йирик солиқ тўловчилардан, айтайлик, энергетика компанияларидан тушумлар қисқаришда давом этаётгандир. Балки айрим ДХШ ёки пудратчи “хусусий” компанияларга нисбатан солиқ тушумларидан келиб чиқиб саволлар туғилаётгани ёқмаётгандир.

​Гўшт юқори даражада қимматлашган маҳсулот бўлиб қолмоқда

Март сўровларида нархларида юқори даражада ўсиш кузатилган маҳсулотлар рўйхатида яна гўшт ва сут етакчилик қилган. Сўровларда иштирок этганларнинг 64%и гўшт ва сут нархларининг юқори даражада ўсганини қайд этишган.

Сезилган инфляция 14,3%гача пасайган (-0,8%) Ҳудудлар орасида энг юқори даражада сезилган инфляция пойтахт Тошкентда кузатилган (16,2%).

Ўтган ойда даромадга эга бўлмаганларнинг сезган инфляцияси 15,1%гача кўтарилган (+1,0%). Қолган даромад гуруҳларида сезилган инфляция пасайган.

110 та корхона, 500 та маҳсулот – бир жойда

Савдо-саноат палатаси ҳамда Андижон вилояти ҳокимлиги ташаббуси билан Олтинкўл туманида “Андижон маҳсулотлари” кўргазма-савдоси ўз ишини бошлади.

Ушбу кенг кўламли ярмаркада мебель, қишлоқ хўжалиги, автомобилсозлик, электротехника, фармацевтика, озиқ-овқат, чарм, тўқимачилик, қурилиш материаллари саноатларида фаолият юритувчи 110 та маҳаллий корхона ўзининг 500 га яқин маҳсулотлари билан иштирок этмоқда.

Давлат раҳбарининг ўзи ҳам ушбу кўргазмага ташриф буюрди ва унинг аҳамиятини алоҳида таъкидлади.

Кўргазма апрель якунига қадар давом этади. Сиз ҳам ушбу кўргазмага ташриф буюринг ва сифатли, фойдали, ҳамёнбоп маҳаллий маҳсулотларни харид қилиш имконини қўлдан бой берманг.

​Энерготарифлар оширилишининг бир ойга кечиктирилиши инфляция кутилмаларни сезиларли пасайтирган

Март ойи якунлари бўйича сўровларда инфляцион кутилмалар аҳоли наздида 14,2%гача (-1,1%), бизнес наздида 13,0%гача (-0,8%). Мартнинг охирги кунида энерготарифларнинг оширилиши 1 ойга, 1 майгача қолдирилганди. Айни пайтда сўровларда коммунал хизматлар ва ёқилғи, энергия нархининг қимматлашиши инфляцион хавотирлар ўлароқ энг асосий омил бўлиб қолмоқда.

Ҳудудлар орасида энг ёмон инфляцион кутилмалар пойтахт Тошкентда сақланмоқда (аҳолида 17,1%, бизнесда 15,7%). Фарғона вилоятида 17% ва ундан юқори инфляция кутаётган улуши энг юқори - 46%ни ташкил этган.

Кутилмалар пасайиши барча даромад қатламларининг жавобларида акс этган.

Андижонда 5,7 млрд.долларлик инвестиция лойиҳалари амалга оширилади

Давлат раҳбари Андижонга ташрифи чоғида вилоятда 2025 йилда эришилиши режалаштирилган асосий мақсадларга оид тақдимот билан танишган.

Қайд этилишича, жорий йилнинг биринчи чорагида инвестиция лойиҳалари, 2025 йилда 5 миллиард 700 миллион  долларлик 166 та инвестиция лойиҳаси амалга оширилади. Бу орқали 31 мингта иш ўрни очилади. 31 турдаги янги маҳсулот олиш йўлга қўйилиб, 1,5 миллиард долларлик экспорт имконияти яратилади. Корхоналарни барқарор энергия билан таъминлаш учун 65 мегаватт янги қувватлар барпо этилади. 

Тақдимотда иқтисодиётни диверсификация қилиш, саноатни ривожлантириш, янги технологияларни жорий этиш ва ишлаб чиқариш қувватларини кенгайтириш масалаларига алоҳида эътибор қаратилган. 2025 йилда иқтисодий ўсиш суръати 5,5 фоизга етиши кутилмоқда.

Ўшликлар Андижондан учишни бошлайдими?

Ҳозирча тескариси, андижонликлар ва керак бўлса бутун водий аҳли кўпроқ Ўш аэропортидан учишмоқда. Масалан, бугунга Ўш аэропортидан 20та, эртага 24та авиақатнов режалаштирилган. Уларнинг орасида Ўзбекистонга киритилмайдиган машҳур Pegasus лоукостерининг Истамбулга, Flynas'нинг Жиддага, Jazeera'нинг Ал-Қувайтга рейслари бор. Пойтахт Бишкекка ҳар куни 10та қатнов бор (шимолга қатновларни саноғи йўқ). Битта Ўш аэропорти орқали водийдаги тўртта аэропортимизни қўшгандаям каррасига кўпроқ йўловчи ташилади ва бу ҳаммаси эмас: Ўш аэропорти йиллик ташиш қувватини 5 млн.йўловчига етказишмоқчи. Солиштириш учун, ўтган йили Наманган аэропорти орқали атига 760 минг, Фарғона аэропорти орқали 580 минг йўловчи ташилган холос (Андижон аэропорти ишламаган). Бошқача айтганда, қимматлаштирилган ёқилғидан пул ишлаш ва бозорга рақобатчиларни киритмасликдан иборат ўта тор манфаатлар устунлиги туфайли тайёр ва улкан бозоримизни бериб қўйганмиз.

Албатта, Андижон аэропортининг қайта таъмирланишдан кейин парвозлар сони ва хизмат қуввати ошиши бу жуда қувонарли хабар. Ëзилишича, Андижон аэропортида йўловчиларга хизмат кўрсатиш қуввати соатига 300 тадан 1000 тага, парвозлар сони йилига 584 тадан 3 минг 700 тага ортади. Ҳозирча Андижон аэропортидан ҳафтасига атига 2 марта Тошкентга қатнов бор холос.

Самарқанд вилоятида ASIA ALLIANCE BANK 25 та маҳаллада иш олиб бормоқда, ҳар бирига махсус банкирлар ва ёрдамчи агентлар тайинланган бўлиб, улар тадбиркорликни ривожлантириш ва ҳаёт шароитларини яхшилашда ёрдам бермоқда.

2025 йил давомида Нуробод ва Тойлоқ туманларида жойлашган 25 та маҳаллада банк томонидан 256 та микролойиҳалар амалга оширилди, бу эса кўплаб одамларни бандлигини таъминлашга ҳамда иш ўринлари яратишга хизмат қилди.

Бундан ташқари, маҳалла дастурлари доирасида банк томонидан жисмоний шахслар учун 200 миллион сўм ва юридик шахслар учун 2 миллиард сўмдан ортиқ миқдорда имтиёзли кредитлар ажратди.

Шунингдек ASIA ALLIANCE BANK томонидан ҳудудларни ривожлантириш ва тадбиркорликни қўллаб қувватлаш борасида юқорида кўрсатилган ишларни йил охиригача давомий кўринишда жадал суратларда давом эттириш режалаштирилган.

Реклама

Ўзбек венчур фондларида давлат берган сармоя устунлик қилмоқда

Pivot.uz лойиҳаси 2025 йил 1-чоракдаги Ўзбекистондаги маҳаллий венчур фондлари инвестициялари ва венчур фондлардаги капитал ҳолати билан бўлишмоқда.

Ҳозирча мазкур сегментда сармоя манбаи асосан давлат ёки давлат компаниялари ҳисобидан шаклланимоқда, Хусусан, United Ventures - 7 та давлат банки улушдор (Давлат), AloqaVentures - Алоқабанк улушдор (Давлат), UzVC - молия вазирлиги (Давлат), IT Park Ventures - IT Park улушдор (Давлат), Ëшлар тадбиркорлигини қўллаб қувватлаш венчур фонди - Ëшлар ишлари агентлиги (Давлат), Asaka Farm Ventures - Asakabank (Давлат), SQB ventures - Sanoat Qurilish banki (Давлат).

Таҳлилчи Давронбек Пармоновга кўра, 2025 йилдан бошлаб стартаплар учун мавжуд бўлган венчур молиялаштириш ҳажми маҳаллий венчур капитал маблағларининг кенгайиши ва хорижий ҳамсармоядорлар ҳисобига ошиши кутилмоқда.

Libero памперслари нима бўлди? Лифт ва холодильниклар Пискентда синовдан ўтадими?

Битта намуна синовдан ўтмади важида бутун бренд маҳсулотларини тақиқлаш давом этадими?

Бу усул ғирт коррупцион ва зараркунанда оқибатлар яратиши англаб етилдими?

Ё ўзбекистонликлар Қозоғистондан памперс ташишда давом этаверишсинми?

Агентлик ва UzTest риторикасидан бу кўрингани йўқ. Улар бизнесга, аҳолига ва иқтисодиётга етказаётган зиёнини ҳалигача англаб етишгани йўқ.

Энг кулгулиси, кеча Пискент полигонидан тарқаган сурат ва видеолардан кўриш мумкинки, импорт қилинган маиший техника синовлари ҳам Пискентда ўтказилади. Бутун 2024 йил давомида булар лифтдан тортиб кондиционер ва холодильникларгача энергосамарадорлик синовларини мажбурий қилган ҳолда, ускуналар йўқлиги баҳона синовларни ўтказмай, импортни чеклаш ва тақиқлаш усулини қўллашганди. Бу йил энди қандай кароматларни кўрсатишади?

Leapmotor UzTest’ синовларидан ўтгани муаммо қолмади, дегани эмас

Ўзбекистонда Хитойнинг Leapmotor автомобиллари савдосига рухсат берилди. Лекин компанияга 3та қўшимча шарт қўйилган.

Табиийки савол туғилади, нимага Leapmotor товар белгиси учун ўзи мавжуд ажобтовур талабларга нисбатан қўшимча шартлар киритилмоқда. Қўшимча шартлар мавжуд бўлишининг ўзи рақобатни бузмайдими? Нотенг имкониятларни юзага чиқармайдими?

Айни пайтда аввалги синовда нима учун Leapmotor товар белгили C16 автотранспорт воситасида аниқланган номувофиқликлар бор деб эълон қилинганди? Бу бўйича мустақил хизмат текшируви ўтказиладими? Ким билади балки бу чайқовчи монополистларнинг буюртмаси бўлгандир, балки агентлик ё синовчи ходимларининг коррупцион ёки ўзбошимчалиги ва балки малакасиз ҳаракатлари сабабчидир? Ëпиғлиқ қозон ёпиғлиқ қолмаслиги керак.

Ва ўзи умуман Техник тартибга солиш агентлиги тўлиқ ислоҳ қилиниши зарур (UzTest'ни агентликдан ажратган ҳолда). Агар бу иш юз бермаса, лўлича куф-суф муолажалардан ва эчки қасамлардан фойда йўқ, бугун электромобиллар билан юз бераётган можаролар эртага бошқа тадбиркор ёки маҳсулот билан содир бўлаверади.

Электр энергиясини ишлаб чиқарувчилардан сотиб олиш тарифларини энди ким белгилайди? Ҳукумат комиссиясими ё Регулятор?

Ўтган йилгача ишлаб чиқарувчилардан электр энергиясини қанчадан сотиб олишни Вазирлар Маҳкамаси ҳузуридаги идоралараро тариф комиссияси белгилаб келган.

Лекин бу йилдан бошлаб Президент фармонида белгиланганидек, «Икки томонлама шартномалар асосидаги харидлар» босқичи ишга тушиши керак. Бу босқичда электр энергиясини ишлаб чиқарувчи барча энергетика корхоналари электр энергиясини ягона харид қилувчи Ўзэнергосотиш АЖга Регулятор томонидан тасдиқланган тарифларда сотиши керак.

Лекин ҳозирча харид тарифларини Регулятор белгилаши бўйича бирон ишора кўринмаяпти. Балки ҳаммаси эскича давом этар (аҳоли ва бизнес учун тарифларни ҳар йили ошириб борилиши осмондан тушмагандир?).

Ўтган йили кузда Ўзбекистон 2027 йилда электр энергияси бўйича улгуржи бозорга ўтишни режалаштираётгани эълон қилинганди. Гарчи Давлат раҳбари имзолаган фармонга кўра, улгуржи бозор 2026 йилдан ишлашни бошлаши керак (катта йиғилишларда ҳам шу талаб ва шу муддат кўрсатиб келинган).

Ҳурматли ташқи иқтисодий фаолият иштирокчилари!

Бу муҳим янгиликдан хабардормисиз?

Ўзбекистон Республикаси Президентининг «Маҳсулотлар экспорти тартиб-таомилларини такомиллаштириш ва қўшилган қийматга эга тайёр маҳсулотлар ишлаб чиқаришни рағбатлантириш чора-тадбирлари тўғрисида» 2025 йил 14 мартдаги ПФ-47-сон Фармони билан 2025 йил 1 июлдан бошлаб 86 турдаги товарларга экспорт божхона божлари жорий этилди ва уларнинг ставкалари тасдиқланди.

Ҳўш, бу қайси турдаги товарларга нисбатан ва қай тартибда амалга оширилади?

Барча муҳим маълумотлар ва тавсифлар қуйидаги видеолавҳада.

Ўзэнергосотиш биринчи марта электр энергияси сотиб олиш бўйича муҳим фактни эълон қилди (спойлер: ахборот тўлиқ эмас)

Электр энергиясини ягона харид қилувчиси бўлган Ўзэнергосотиш АЖ 2025 йил 10 апрель куни "O'zbekgidroenergo" АЖ 3,3 трлн.сўмлик электр энергияси сотиб олиш тўғрисида битим тузган. Эълон қилинган муҳим фактдан ягона бассейн электр энергиясини қанчадан, қанча муддат давомида ва қанча ҳажмда сотиб олаётганини ёки тўлов шакли ва усулини англай олмайсиз, яъни муҳим фактнинг ўзи чала. Ўтган йилги баёнотида "O'zbekgidroenergo" АЖ ишлаб чиқарган электр энергияси 2023 йил 1 ноябрдан бошлаб 501 сўмдан сотилганини қайд этганди (ундан кейинги даврда Тариф комиссияси қарори ўзгарган ё ўзгармагани ҳаиқда маълумот йўқ).

Қизиқ тарафи, 3,3 трлн.сўмлик битимга асос бўлган Кузатув кенгаши қарори 2024 йил 29 ноябрда қабул қилинган (эълон қилинмаган).

Энг катта бюджет субсидияхўрларидан бўлган Ўзэнергосотиш АЖ шу пайтгача бирон марта молиявий натижаларини очиқламаган. Йирик битимлари ҳақида маълумот бермаган (буниси чала бўлса ҳам биринчиси).

Об-ҳаво маълумотиниям бир қўлли қилишадими?

Бу кетишда об-ҳаво маълумотиниям фақат “Safe Weather” иловасидан оладиган қилишади.

Кун, Газета, Дарё ва ҳатто ЎзА билан ҳам об-ҳаво тўғрисида маълумот алмашиниши батамом тўхтатилади.

Пўрим эшитилиши учун буни Давлат-хусусий шериклик деб номлашади.

Жиддий айтганда, нима учун Ўзбекистонда бизнес муҳит кимдир бир зумда миллиардер бўлиши учун қолганларни хонавайрон қилишдан иборат бўлиб бормоқда?

Ахир эски замонда шундай эмасмиди?

Бу худди янги ҳоким келиб ҳамма ўрганган бозорни бузишига ўхшайди

Йўл ҳаракати хавфсизлиги хизмати томонидан “Safe Road” иловаси тавсия ва тарғиб қилинмоқда. Ҳамма ўрганган Road24 энди ишламасмуш. Road 24 ва ЙҲХХ ўртасидаги йўл ҳаракати қоидаларини бузганлик учун белгиланган жарималар тўғрисида маълумот алмашинуви батамом тўхталипти.

Бу худди янги ва қўлинг ўргулсин замонда ҳокимлар тайинланиши билан тадбиркор-у, аҳоли ўрганган эски бозорни буздириб, янгисини қурдириш ва ёқадими, йўқми, ихтиёран-мажбуран кўчиришга ўхшайди.

Қўйинглар, худобехабар бозор бузади, майли, янги бозор қурмоқчи бўлсанг, унисиям ишлайворсин, бунисиям ишласин, рақобат ва танлов бўлсин дейдиган топилмайди, афсуски (Қўйлиқ бозорининг бузилишидан тортиб, Денов ва Узунгача шу аҳвол).

Ҳозир ҳам миллионта эътироз бўлаётган янги Safe Road иловасиям ишлайверсин, Road24 ҳам ишлайверсин, дейдиган бирон соғлом ақл эгаси топилмаганидан ҳайрон бўлманг.

Мен ҳатто ҳайрон бўлардим, агар айтайлик, Антикоррупция агентлиги вазирлик ва идораларнинг “илова ясаш ва илова буюртма қилиш” каби антиқа ва ажойиб кейсларига эътибор қаратишни бошласа.

The world according to Trump, Putin and Xi

Newsweek нашри Трамп, Путин ва Си дунёни таъсир доиралари бўйича қандай бўлиб олиши мумкинлигини кўрсатган.

Қайта тақсимланаётган дунё (юқоридагиси) худди Оруэллнинг 1984 антиутопиясида тасвирланган дунё харитасини (қуйидагиси) эслатади: Тоталитар Океания (яшил), Необольшевистик Евразия (қизил) ва Шахссизлантирилган Остазия (сариқ)

UzCharmExpo–EurAsia–2025: Марказий Осиё — чарм саноатининг марказида

Жорий йил 16–18 апрель кунлари Тошкентда жойлашган “Ўзэкспомарказ”да UzCharmExpo–EurAsia–2025 халқаро кўргазмаси бўлиб ўтиши кутиляпти. Бу тадбир нафақат соҳадаги янги ишланмалар ва ечимларни тақдим этиш, балки минтақавий ҳамкорликни ривожлантиришга ҳам қаратилган.

Кўргазма доирасида кўплаб чарм маҳсулотлари, замонавий технологиялар ҳамда инвестиция лойиҳалари намойиш этилади. Унда дунёдаги етакчи компаниялар ва мутахассислар иштирок этиши кутилмоқда.

Ўзбекистон борган сари саноат маркази сифатида кўп эътироф этилаётгани айни шу каби тадбирларда янада яққол кўриняпти.

Кўргазмада иштирок этиш учун рўйхатдан ўтиш: https://forms.gle/ukuXfvE9JZmqNKzR8

Реклама

Бу нарсани биз кўрган эдик, давоминиям кўрамиз

Беҳзод Ҳошимов:

"Трамп божлари мантиғи. Истиснолар киритилиш натижасида, агар сиз смартфон ишлаб чиқариш учун эҳтиёт қисмларини олиб кирсангиз, катта бож тўлайсиз. Лекин тайёр смартфон олиб кирсангиз - бож тўламайсиз. Бу нарсани биз албатта кўрган эдик, лекин АҚШда кўришимизни кутмаган эдим".

Агар параллелларни ҳисобга олсак, бу тўлиқ картина эмаслиги жума куниёқ аён эди. Кеча, якшанба куни смартфонлардан тортиб компьютерларгача тайёр электроникага алоҳида бож киритилиши анонс қилинди.

Ҳали истисноларниям кўрамиз.

Трамп Ўзбекистонга келадими?

Lolazor'нинг янги мавсумдаги илк сонида Европа Иттифоқи - Марказий Осиё саммити бизга нима бериши, Трампнинг Марказий Осиёга ташриф буюриши эҳтимоллари, глобал тариф урушларидан тортиб Ўзбекистонда авж олаётган нотариф чекловларларга бўлган мавзуларда фикр алмашдик.

Аҳоли ва бизнесга муаммо яратаётган UzTest қолиб, шикоят қилаётганлар текшириладими?

UzTest “жамоатчилик фикрини чалғитишга қаратилган мазкур лавҳани нотўғри талқин қилган ҳолда кенг жамоатчиликка тарқатган блогер ишига тегишли тартибда ҳуқуқий баҳо берилишини” маълум қилмоқда.

Икки кун аввал Autodeklarant лойиҳаси Пискент полигонидаги синовларга киритилган электромобилларга ўрнатилган камералар қайд этган тасвирларни эълон қилганди.

Пискентдаги синовларда шаффофлик йўқлиги, импортчиларнинг мақомига қараб икки стандартлардаги ёндашувларнинг мавжудлиги, синовларнинг маъно ва мундарижаси очиқланмаслиги, синовга ёзилишдаги ярим тунда очиладиган дарча торлиги, синов учун тўловларнинг калькуляцияси эълон қилинмагани, Uztest ва Техник тартибга солиш агентлиги фаолиятида манфаатлар тўқнашуви мавжудлиги ҳақида ноябрдан бери гапириб келинади. UzTest ва агентликнинг бутун ўтган йил давомида лифтдан тортиб кондиционерларгача техника импортчиларига яратган сунъий тўсиқ ва чекловлари алоҳида суриштирув талаб қилади. Лекин на агентлик томонидан, на UzTest томонидан қаноатли жавоб ва очиқ муносабатни кўрмадик. Ўтган ҳафтада Kun.uz студиясидаги берилган саволларнинг деярли барчаси очиқ қолди.

Энди ёқимсиз саволларга жавоб бериш, иш услубини мижозбай ўзгартириш (ахир мижозларга текинга хизмат кўрсатилаётгани йўқ, отнинг калласидек пул тўлаяпти), Агентлик фаолиятини тубдан ислоҳ қилиш, UzTest бўйсинувини бошқа боғланмаган давлат органига ўтказиш ўрнига, шикоят қилганларни текшириш сўралмоқда.

Бу қанақадир янги сюр.

Аҳоли ўсиши секинлашишда давом этмоқда

Ўзбекистон аҳолиси 2025 йил бошидан буён 154,6 минг кишига кўпайган. Аҳоли ўсишининг секинлашуви кетма-кет бешинчи чорак қайд этилмоқда.

Солиштириш учун, мамлакатимиз аҳолиси 2024 йилнинг биринчи чорагида 163,5 мингга, 2023 йилнинг биринчи чорагида эса 172,8 минг кишига кўпайган.

Нуфусимиз ўсиши секинлашуви 90- йиллар ва нолинчи йиллар бошидаги демографик чуқурликлар, фаоллашган урбанизация, шунингдек, аёлларнинг иқтисодий-ижтимоий ҳаётдаги ўрни кенгаётгани каби омиллар ҳисобига юз бермоқда.

UzTest синовлари ҳақида: “ичкарида ҳеч нима текширилмайди ва вақт ўтказиб чиқариб юборилади”

Автодекларант лойиҳаси
Пискент полигонидаги синовларга киритилган электромобилларга ўрнатилган камералар қайд этган тасвирларга асосланиб ёзмоқда:

“Ичкарида ҳеч нима текширилмайди ва вақт ўтказиб чиқариб юборилади. Лекин бозори яхши юраётган автомобиллар балки ҳақиқатда жуда кучли текширувдан ҳам ўтказилса керак. Техник жиҳатдан тартибга солиш агентлигидан ҳеч қайси автомобил импортчиси ҳимояланмаган, улар хоҳлашса айнан битта моделингиздан "камчилик" аниқлаб, бутун брендингизни таъқиқлаб юборишлари ҳам мумкин”.

Ҳаммасини сотувга қўйишса, Mercedes ва Land Cruiser'лар арзонлаб кетадими?

Албатта, сотувга қўйилган Mercedes ва Land Cruiser'лар бу ҳаммаси эмас. Ўзбекнефтегазда бунақа Mercedes'дан 5та ва Land Cruiser'дан нақ 7та бор. Бутун бошли коллекция (энергетиклар Land Cruiser'ни бунчалар севишмаса?).

Ҳозирча автоколлекциянинг фақат бир қисмини сотишмоқда (TAHOE'ни не сотмоқдасизлар, ахир у "Ўзбекистонда ишлаб чиқарилган", TAHOE сўраган ҳокимларга берворинглар).

Қолган Mercedes ва Land Cruiser’ларни ҳам сотувга қўйишадими ё йўқми, бир нарса дейиш қийин, балки ҳаммасини баравар сотувга чиқаришса, нарх тушиб кетишидан хавотир олишаётгандир.

Leapmotor: Бизда текширув натижаларига нисбатан эътирозлар мавжуд

UzTest тақиқига учраган Leapmotor ҳолат юзасидан расмий муносабат билдирган:

“Аввалроқ Leapmotor автомобили Ўзбекистонда электрон мослашувчанлик тестидан ўта олмагани тўғрисида хабарлар тарқалди. Компаниямиз бунга жавобан Ўзбекистон вакиллари билан боғланди. Текширувдан ўтказилган Leapmotor автомобили биз томонимиздан юборилмаган, шунингдек текширув шартлари ва танланган автомобилнинг ҳолати ҳақида аниқ маълумотлар мавжуд эмас. Бизда текширув натижаларига нисбатан эътирозлар мавжуд. Ташкилотимиз шаффоф ва объектив қайта текширув ўтказиш орқали Leapmotor билан боғлиқ вазиятни тиклашга умид қилади”.

92 бензин 10 кунда 500 сўмдан кўпга қимматлаган

Қўшни Қозоғистон нефтни қайта ишлаш заводлари ишлаб чиқарилган бензинни нима қилишни билмай боши қотган бир пайтда Ўзбекистонда бензин қимматлашишда давом этмоқда.

Кеча 92 бензиннинг тоннаси 13 044 минг сўмга етган. Бу 1 апрелдагидан 528 минг сўмга қимматроқ дегани. Сотув ҳажми деярли 5 карра қисқарган.

Ахир олигарх ва монополистлар назоратидаги энергетика бозорида бошқача бўлиши мумкинми?

Тошкентга Чимкент бензини келадими? Олигархлар қаршилик қилмайдими?

Тошкентнинг шундоқ биқинида, 100 км нарида Марказий Осиёдаги энг йирик Чимкент нефтни қайта ишлаш заводи фаолият кўрсатади.

Ëзилишича, етарли талаб йўқлиги учун Чимкент заводи резервуарлари бензинга тўлиб кетган. Шу ҳафтада 92 маркали бензин экспортига рухсат берилиши мумкин.

Албатта, Ўзбекистон энергетикасини пароканда қилиб, 3 минг километрдан келтириладиган шимолликларнинг бензинига қарам қилган олигарх ва монополистлар учун бу жуда ёмон хабар. Улар барибир нимадир қилиб Чимкент бензинини Тошкентга киритмаслик чорасини кўришади ёки шундай қилишадики, 5 минг сўмлик Чимкент 92 бензини 11 минг сўмга айланади.

Маълумот учун, охирги 2 ҳафтада нефть нархлари кескин қулаганига қарамай, Ўзбекистонда 92 бензин нархи ўртача 10 500 сўмдан 10 800 сўмгача қимматлаган. Бир йил аввал Энергетика вазирлиги 92 бензинни оммалаштириш ва 9 500 сўмгача пасайиши кутилмаларини эълон қилганди.

Ҳар бир жаҳон кўргазмаси — бу мамлакатнинг визиткаси. Expo 2025’да Ўзбекистон ўзини бутунлай янгича ёндашув билан намоён этди. Ҳеч қандай клише, ҳеч қандай сунъийлик — аксинча, чуқур ўйланган концепция, экологик ечимлар, қайта фойдаланиладиган архитектура ва бой маданий мерос билан уйғунликда яратилган павильон.

Ҳар бир деталда фикр, ҳар бир элементда тарих ва замонавийлик уйғунлиги сезилади. Айниқса, устунлар, миллий усталарнинг иштироки, Фарғона водийси, Хива ва Бухоронинг руҳини олиб киргани — бу ўзбек маданияти ва табиий бойликларига бўлган ҳурматни ифодалайди. Япон ёғочи билан қурилган ва кейинчалик Ўзбекистонга қайтариладиган павильон — бу ўз-ўзидан катта рамз.

Бу ёндашув кўрсатиб турибди: маданият ва экология — Ўзбекистоннинг келажагидаги энг муҳим қадриятларидан.

Идеалда камида 5та аэропорт очиқ танлов орқали глобал лоукостерларга берилиши керак эди

Биз Россия Украинага бостириб кирган вақтда юзага келган бўшлиқни тўлдириш орқали Шарқ ва Ғарбни боғловчи уникал авиабозорга айланиш имкониятига эга бўлгандик.

Лекин авиабозоримизни биқиқ ва соғин сигир ҳолатида ушлаб туриш мақсадидаги очофат олигархия ва уларнинг боқувидаги шотир амалдорларнинг тор манфаатлари ва худбинлиги туфайли уникал вазиятдан фойдалана олмадик.

Ҳа, Тошкент, Термиз, Андижон ва Нукус аэропортлари ҳозирги реалликларда стратегик аҳамиятга эга ва улар давлатнинг қўлида бўлиши керак. Лекин соф бозор яратиш учун, Урганч ва Қаршидан тортиб Наманган ва Фарғонагача бўлган аэропортларни очиқ танлов орқали ўзаро боғланмаган глобал лоукостерларга очиқ танлов ўтказиш орқали топшириш керак эди. Арзон ёқилғисиниям ўзи топиб келарди, сервисни ҳам яратишарди, ҳудудлардан Тошкентга доимий маҳаллий қатновлар сеткаси ҳам пайдо бўларди. Ўзбекистон нафақат ўзбеклар учун, Глобал жанубдан Шимолгача, Шарқий Европадан Узоқ Шарққача етадиган ва элтадиган тугунга айланарди. Бозоримиз 2 карра эмас, 10 карра кенгайган бўларди.

Биз нима қилдик? Каррасига қимматлаштирилган ва сопини давлат буюртмаларидан чиқариб берадиган йўллар билан аэропортларни "хусусий шерикларга" топшириш йўлини тутдик (Самарқанд) ва тутмоқдамиз (Бухоро). Қолган аэропортларни советча усулда битта монополист компанияга вертикал бўйсундирдик ва шунинг учун улар ҳали ҳам ғирт совет аэропортлари бўлиб қолмоқда. Битта вертикалдаги аэропортлар ўзаро рақобатда бўлмаслиги ва бизнес фаолиятни кенгайтиришга уринмаслигини билишмади, деб ўйлайсизми? Билишарди, лекин уларга шу йўл афзал эдида. Доимий ва кафолатланган давлат буюртмаси, таъмирлаб пул ўзлаштириш, қимматлаштирилган ёқилғидан бошқаси қизиқ бўлмаса, қизил директорлар нима қилишсин?

Дарвоқе, аввал бошда режалар ёмон эмас эди. Ҳозир масалан, 2020 йилда 10та аэропортда "очиқ осмон" режими эълон қилинганини биров эсламайди (бугунги етиб келган жойимиздаги кўзда қаралса, кўз кўрди учун қилингандек, айниқса бу пандемия пайтида юз бергани инобатга олинса).

Ўзбекистон болаларга нисбатан зўравонликни бартараф этишга қаратилган глобал ҳаракатга қўшилмоқчи

Болаларга нисбатан зўравонлик дунё миқёсида жиддий ижтимоий муаммо сифатида қоляпти. Бу масала бўйича ИҲМА ва ЮНИСЕФ ҳамкорлигида ўтказилган давра-суҳбатида Ўзбекистон расмий равишда Богота Чақириғига қўшилиши ва бу борадаги глобал ташаббусларни қўллаб-қувватлашга тайёр эканлиги билдирилди.

Ижтимоий ҳимоя миллий агентлиги директорининг биринчи ўринбосари таъкидлашича, Ўзбекистонда 13 миллиондан ортиқ бола яшайди ва бу рақам мамлакат аҳолисининг 35 фоизини ташкил этади.

“Афсуски, кўплаб оилаларда тарбияда зўравонлик элементлари мавжуд. Болаларга нисбатан зўравонлик муаммоси ҳанузгача жамиятдаги энг долзарб ижтимоий муаммолардан бўлиб қолмоқда”.

Шунингдек, суҳбатда Янги қабул қилинган “Болаларни зўравонликнинг барча шаклларидан ҳимоя қилиш тўғрисида”ги Қонун май ойида кучга кириши айтилди. Бу Қонун болаларни ҳимоя қилиш бўйича амалга ошириладиган йирик ишларга туртки бўлиши кутиляпти. Албатта, бунда қонуннинг амалиётга татбиқ этилиши ва самарали ҳимоя механизмларини жорий қилиш масаласи ҳам актуал.

Болалар ўзи яшайдиган оила, маҳалла, ўқийдиган боғча-мактабида, умуман, ўз ватанида қўрқмай бемалол юра оладиган даражага етиб бориш фақат орзулигича қолиб кетмаслиги керак. Ҳаётнинг энг ширин неъмати бўлган болаларни доимо, ҳаммамиз асраб-авайлашимиз, уларни соғлом ва эркин, бахтли вояга етказишимиз керак.

Олигархнинг қиммат ёқилғиси маҳаллий қатновларни "невыгодно" қилиб қўйган

Нима учун маҳаллий қатновлар хорижий қатновлардан кмга чаққанда каррасига қиммат, нима учун авиакомпаниялар Урганчга ва Бухорога қатнашдан кўра, Дубайга ва Алматига учишни маъқул кўради?

Курбанов ёзғираётганидек, Урганчга учиш Дубайга учишдан қиммат, худди шунингдек, масалан, юқоридаги скриншотларда кўраётганингиздек, айни тоифаларда ва мос саналарга 600 кмлик Бухорога бориб келиш (Ҳавошка), 800 кмлик Алматига (Centrum) бориб келишдан қиммат тушаверади. Чунки четга учганда ва рақобатли хорижий аэропортга қўнганда, ҳеч қурса бир марта арзон ёқилғи қуйиб олинади.

Бутун Ўзбекистон битта олигархга товон тўлашда давом этар экан, маҳаллий туризмни қўя турайлик, оддий кундалик қатновларни кўпайтириш ва имконли қилиш ҳам маънога эга эмас (минг хил субсидия бериш ҳам). Ҳатто хорижий компанияларни маҳаллий қатнов бозорига киритиш ҳам, агар ёқилғи таъминоти ва аэропорт монополияси таг томири билан бузиб ташланмаса, фойда бермайди.

THE ABLE TECHNOLOGIES - биометрик идентификация бозорида янги ўйинчи

Кеча Анҳор Локомотив боғида Commerce Central Asia Expo 2025 кўргазмаси очилди. Кўргазмада бутун Марказий Осиёдан e-commerce сегментида фаол бўлган компаниялар, экспертлар ва мутахассислар иштирок этишмоқда.

Тадбир fitech ечимлар ва технологияларни қамраб олган йирик кўргазмадир. Бу тадбирда кўплаб таниқли компаниялар қаторида THE ABLE TECHNOLOGIES ҳам ўзининг янги биометрик идентификация ечимлари билан иштирок этмоқда.

THE ABLE TECHNOLOGIES компанияси Able ID номли биометрик идентификация тизимини тақдим этмоқда. Бу тизим фойдаланувчининг юзини компьютер ёки мобиль қурилма камераси орқали сканерлаб, унинг шахсини тез ва хавфсиз тасдиқлайди. Able ID технологияси Liveness Detection функцияси орқали юзнинг реал вақтдаги ҳаракатларини аниқлаб, фирибгарлик хавфини камайтиради.

Айни вақтда Ўзбекистонда биометрик идентификация технологиялари бозорида рақобат ҳали жуда кучли эмас. Шу сабабли янги компанияларнинг бозорга кириб келиши рақобат муҳитини шакллантириб, соҳанинг янада ривожланишига хизмат қилади деб ўйлайман.

Технологик янгиликлар билан қизиқувчиларга кўргазмани албатта томоша қилишни тавсия қиламан!

Кўргазма бугун ҳам давом этади.

Ўғитлар ва кимёвий воситалар ҳам мажбурий маркировкаланади

1 майдан бошлаб минерал ўғитлар ва ўсимликларни ҳимоя қилиш учун фойдаланиладиган кимёвий воситаларни рақамли маркировкалаш тажрибаси бошланади. Келаси йил 1 майдан эса 100 га яқин турдаги ўғитлар ва кимёвий воситаларни маркировкалаш мажбурий бўлади. Шу билан мажбурий маркировкалаш жорий қилинган маҳсулотлар рўйхати 7тага етади.

Гарчи рақамли маркировкалашдан мақсад бозорларни оқлашга қаратилгани ҳақида қайта ва қайта такрорлашсада, амалдаги натижалар ишлаб чиқарувчилар учун қўшимча харажатларнинг ошиши, харажатларни истеъмолчилар бўйнига юкланиши билан якун топмоқда (охирги мисол сув ва салқин ичимликларнинг кескин қимматлашиши). Шунингдек, маркировкалаш мажбурий бўлган тамаки контрабандаси ёки ноқонуний алкоголь савдоси потираб кенгайишдан тўхтагани йўқ. Ўзи умуман мажбурий маркировкалаш ва бозорнинг оқариши ўртасидаги боғлиқлик ҳақида, мажбурий маркировкалар ва нархларининг ўсиши борасида мустақил ўрганишлар керак.

Ўзбекистонда мажбурий маркировкалаш ҳеч бир танлов ва тендерсиз «CRPT TURON» МЧЖга топшириб қўйилган. Мазкур компания эксклюзив ҳуқуқ эгаси ҳисобланади. Амалда мажбурий маркировкаланган ҳар бир маҳсулот учун импорт қилувччилар ва ишлаб чиқарувчилар «CRPT TURON» МЧЖга моҳияти бўйича мажбурий йиғим бўлган тўлов тўлайди.

Энерготарифларнинг кейинги йилларда ҳам ошишда давом этиши инфляция прогнозларини ўзгартирадими?

“Пул-кредит сиёсатининг 2025 йил ва 2026-2027 йиллар даврига мўлжалланган асосий йўналишлари”га кўра,
2025 йилда асосий сценарийда инфляция 6,0-7,0 фоизгача пасайиши, 2026-2027 йилларда 5,0 фоизлик таргетга яқин даражада шаклланиши қайд этилган эди. Албатта, мазкур прогнозларда 2026 йилдан кейин ҳам энерготарифлар ошишда давом этиши кўзда тутилмаган бўлиши керак.

31 мартдаги қарор жорий ва келаси йилларда инфляция кутилмаларига таъсир ўтказмаслиги мумкинмас (ўзи аҳоли ҳам, бизнес ҳам безиллаб қолган), инфляция босиминиям ошириши табиий. Демак, инфляция бўйича мақсадли таргет кўрсаткичлари ва муддатлари яна қайта кўриб чиқилиши мумкин.

Фақат қарғаш чораси қолдими?

“Болаларнинг памперсига ёпишган тиррақилар илоё чи*олмай қолсин”, – деб қўйдим. Бу қарғиш дўкончига ҳам маъқул келди, шекилли. Кўнгиллар бироз ёришди. Ахир бу шарафсиз очофатлар, уларнинг раҳнамолари ва техник кўмакчиларига қарши бошқа чора йўқ. Тешиб чиқса керак қачондир.

Венесуэлада ҳам памперс муаммоси бор, дейишади. Лекин Венесуэлага қарши АҚШ ва унинг шериклари сон-мингта санкция қўйган, импортини чеклаб ташлаган. Хуллас, у ердаги болаларнинг сифатли памперссиз қолиб кетишига сабабчи “ҳақиқий душман” бор. Ташқи душман у. “Мана шуларни деб биз шу аҳволдамиз”, деб халқни чалғитса бўлади (чунки аслида муаммо АҚШда эмас, автобус ҳайдовчисида).

Бизнинг аҳвол эса оғирроқ — чалғитиш учун фойдаланса бўладиган ташқи душманимиз ҳам йўқ. Ҳамма душманларимиз — ичимизда”.

UzTest Libero памперслари импортини тақиқлаган

Гарчи 7 апрель куни бўлиб ўтган мулоқотда Техник тартибга солиш агентлиги вакили ҳали тагликларнинг синовдан ўтмаганлик ҳолати бўлмади, деганига қарамай, агентлик боласи UzTest’нинг 4 апрель куни Божхона қўмитасига чиқарилган хатида Libero памперслари импортини тақиқлаш чораларини кўриш қайд этилган.

Бу охири эмас. Автомобиль импортини тақиқлаш орқали рақобатни ва рақобатчиларни ўлдириш мумкин бўлган жойда навбат нафақат кондиционер ва памперсга, ҳатто картошка ва гўштга ҳам етади. Чунки улкан маъмурий ва молиявий ресурсларга эга олигархик гуруҳлар агентлик ва UzTest’дан қандай фойдаланиш мумкинлигини кўриб, билиб туришипти.

Бу Антиреформа. Энди қўштирноқсиз. “Реформа” эса қўштирноқда

Фақат кўчирмаси эълон қилинган қарорнинг очиқланмаган қисмида яна қанақа сюрпризлар борлигини билмаймиз. Лекин унинг энерготарифлар ошишда давом этишига оид иккинчи бандиёқ “реформа” деб бошланган жараёнларнинг аслида фақат нархларни кескин ошириш ва яна оширишдан бўлак мақсад кўзланмаган қип-қизил антиреформа (қўштирноқсиз) эканини ойдинлаштиради.

Биз эвазига нима олдик ўзи, деган саволга ҳеч қандай жавоб йўқ.

“Реформа” бузуқ субсидиялашни тўхтатиши керак эди. Лекин субсидиялаш тўхтагани йўқ. Бюджетдан олигархлар чўнтагига оқаётган триллионлаб субсидия тўхтатилиб, таълим, медицина ва пенсия учун қайта тақсимлангани йўқ. Бечора ўқитувчи ва пенсионер свет ва газ учун энди ҳам чўнтагидан, ҳам солиғидан тўламоқда.

“Реформа” энергетиканинг барча занжирларида шаффофлик ва ҳисобдорликни таъминлаши керак эди. Лекин биз ҳалигача билмаймиз, газ ва свет қанчадан сотиб олинаяпти, қанчадан импорт қилинаяпти, қанчадан экспорт қилинаяпти, соф таннарх қанча, қанчага шиширилган, бу кетишда яна қанчага шиширилади.

“Реформа” энергетика бозори фақат режаларда эмас, амалда имконли эканини амалда кўрсатиши, охири кўринмаётган энергокризисга барҳам берилишига ишонч яратиши керак эди. Лекин амалда биз бозорга тескари томонга қараб юрдик ва юрмоқдамиз. Энди сизларга, сўзларга, ваъдаларга ҳеч ким ишонмайди. Фарқи йўқ, Тарихда шундай қоласизлар. Қилган ишларингиз учун раҳмат айтса, ўзбек энергетикасини талаб пароканда қилган ва қилаётган олигархлар айтади. Чунки улар мақсадига эришди.

Қарор йўқ, кўчирма бор

Энг қизиғи, тарифларнинг кейинги йилларда ҳам ошишда давом этиши қайд этилган қарорнинг тўлиқ матни эмас, фақат КЎЧИРМА эълон қилинган.

800 сўмлик оралиқ шкала кейинги йилларда тарифлар оширилишини "ўтказиб олиш учун" шунчаки "хўрак" сифатида қўшилганга ўхшайди.

Ҳеч бўлмаганда, вазир Мирзамаҳмудов ўзи ваъда қилган "газлаштирилмаган ҳовлиларда яшовчиларга электр энергияси учун 50% чегирма" қўшилгандаям майлийди.

Ярим кечаси яхши қарорлар эълон қилинмайди ўзи

Тарифларнинг келгуси йилларда ҳам ошишда давом этиши бу энергетика ислоҳоти деб ном олган жараёнлар маъно-мазмунини буткул йўқотганини англатади.

Ўзбек иқтисодиёти ўзи бусиз ҳам юқори бўлмаган рақобатбардошлилигини йўқотишда давом этаверади, энди тарифлар эркин бозорга ўтишдан аввалги кўприк эмас, самарасиз ва қимматлаштирилган лойиҳалар учун товон, тинимсиз ўсаётган қарзларга хизмат кўрсатиш учун аҳоли ва бизнес чўнтагидан маблағларни суғуриб олинадиган воситага айланиб қолди.

Ëқимсиз хабар: Тарифлар келгуси йилларда ҳам ошишда давом этади

Энергетика вазирлиги ҳали тўлиқ эълон қилинмаган ҳукумат қарорига таяниб ёзишича, электр энергияси ва табиий газ нархлари ҳар йили 1 майдан бир маротаба йиллик инфляция даражасидан келиб чиққан ҳолда 10 фоиздан юқори бўлмаган миқдорда ошириб борилади.

Демак, тасдиқланган тарифлар уч йилдан кам бўлмаган муддатга амал қилиши ҳақидаги ҳукумат ўзи белгилаган қоидалар яна унутиб турилади. Гумон қилинганидек, таннархни шишириш давом этади.

Тарифларга 800 сўмлик оралиқ шкала киритилмоқда

Ҳукумат қарори билан, 201 кВт·соатдан 1000 кВт·соатгача бўлган дифференциаллашган тариф бўйича истеъмол миқдори орасига янги миқдор киритилмоқда.

2025 йил 1 майдан эътиборан аҳоли истеъмолчилари 201 кВт·соатдан 500 кВт·соатгача бўлган янги миқдор оралиғида ҳар бир киловатт·соат учун 800 сўмдан тўланади.

График бўйича свет ўчириш бошландими?

"Трансформаторда таъмирлаш ишлари ва линияни дарахт шохларидан тозалаш ишлари олиб борилиши" сабабли Тошкент туманининг ўнлаб маҳаллаларида эртага свет бўлмайди.

Қизиқ тарафи худди шу подстанция бир ой аввал таъмирланган ва дарахт шохларидан тозаланган эди.

Ўтган 2024 ва аввалги 2023 йилда баҳордан кузгача таъмирлаш баҳона Тошкент шаҳри ва бошқа ҳудудларда ҳам свет ўчириш графиги ишлаганди. Ҳатто ўтган йили ўзи энг кўп свет ўчириладиган туманимиз ҳокимига "светни тежамагансан" деган важ билан ҳайфсан берилганди.

Болтиқбўйи ва Москва регионини ҳисобга олмаганда бутун собиқ советдаги энг қиммат тарифларга ўтсак ҳам, свет ўчирилаверишини нима билан ва қандай изоҳлаш керак?

Ëки шонли энергетиклар таъмирлаш баҳона свет ўчириш методичкасини қўллашаверадими?

BMB HOLDING — Халқаро бозорни забт этган Ўзбекистон миллий брендларидан бири

BMB HOLDING бугун ўзининг 8 ёшга тўлишини нишонлаб, ушбу сана муносабати билан оммавий ахборот воситалари учун матбуот анжумани ташкил қилди. Ҳолдинг бугунги кунда 31 корхона, 6 500 нафар доимий ва 80 000 мавсумий иш ўринлари билан Ўзбекистоннинг энг йирик бизнес тузилмаларидан бирига айланган.

Эътиборли томони, қишлоқ хўжалигида маҳсулот етиштиришдан тортиб, уни чуқур қайта ишлаш орқали қўшилган қийматга эга тайёр маҳсулот ҳосил бўлгунга қадар бўлган яхлит цикл йўлга қўйилиб, мазкур маҳсулотлар халқаро бозорларда мустаҳкам ўрин эгалламоқда.

Бугунги кунда Холдингнинг лойиҳалари умумий қиймати 1,5 миллиард доллардан зиёд бўлиб, халқаро ҳамкорлик доирасида 40 дан ортиқ мамлакатга маҳсулот экспорт қилмоқда. Шу ютуқлари билан BMB HOLDING халқаро бозорга кириб борган Ўзбекистон миллий брендлари TOP-10 талигида эътироф этилди.

Реклама

“Ташаббусли бюджет”нинг 2025 йилги 2-мавсумини 826 та маҳалла ўтказиб юборади

“Ташаббусли бюджет” жараёнларининг жорий йилги 1-мавсуми якунларига кўра, 2 011 та маҳалла (жами маҳалла сонига нисбатан 21 фоиз) ғолиб деб топилган.

Бунда 2024 йилги 2-мавсум доирасида ғолиб бўлган 826 та маҳалла ушбу мавсумда ҳам такроран ғолиб деб топилди. Шу муносабат билан ушбу маҳаллалар учун жорий йилги 2-мавсум ҳамда 2026 йилги 1-мавсумларда танаффус берилади.

Мазкур маҳаллалар (шунингдек, ушбу маҳаллаларда жойлашган мактаб, боғча, тиббиёт муассасалари ва бошқа ташкилотлар) навбатдаги икки мавсум доирасида ўз лойиҳалари билан иштирок эта олмайди.

Кетма-кет 2 марта ғолиб бўлган ва кейинги икки мавсумни ўтказиб юборадиган маҳаллалар рўйхати билан мана бу ерда танишиш мумкин.

Ташаббусли бюджетда кетма-кет ғолиб бўлган маҳаллалар кейинги икки мавсумда қатнашмаслиги қоидаси ўтган йили Сенат кенгаши қарори билан белгиланган.

Афғонистон бозори янги экспорт йўналишларини излаётган тадбиркорлар учун муҳим имкониятларни очяпти.

Ҳозирги кунда бу бозорда ўзбек маҳсулотлари ва хизматларига бўлган талаб ўсиб боряпти. Бу эса ўзбекистонлик тадбиркорлар учун янги ҳамкорликлар, узоқ муддатли келишувлар ва экспорт ҳажмини янада ошириш имконини яратади.

Агар сиз ҳам шу йўналишда фаолият бошлашни режалаштираётган бўлсангиз, Ўзбекистон Савдо-саноат палатаси ва Экспортчилар уюшмаси амалий ёрдам ва маслаҳатларга тайёр.

Мурожаат учун:

📞 +998 78 150 60 06
📞 +998 99 152 58 66
📞 +998 97 877 00 58 (@NZF1985)

Евроиттифоқ Трамп тарифларига қарши жавоб божларини киритади

Европа иттифоқи Трампнинг 20%лик божларига нисбатан жавоб божлари киритишни мўлжалламоқда. Музокаралар эртага 9 апрель куни бўлиб ўтади. Бу иттифоқнинг тариф урушлари бошланган буён иккинчи жавоби бўлади.

Айтиш керакки, Трампнинг 20%лик тарифлари Евроиттифоқнинг 380 млрд.евролик товарларига тааллуқли бўлади.

25% даражасида дейилаётган жавоб божлари тухум ва гўштдан тортиб туалет қоғозигача рўйхатни қамраб олиши мумкин (умумий рўйхат ва қамров ҳажми ҳали аниқмас). Тарифларнинг бир қисми 15 апрелдан, иккинчи қисми 15 майдан кучга кириши айтилмоқда.

Ўтган ҳафтада Хитой Трамп тарифларига қарши жавоб божларини эълон қилганди (10 апрелдан кучга киради). Трамп тарифлари ва унга қарши эълон қилинаётган жавоб чоралари глобал биржаларда 2008 йилдан бери кузатилмаган қалтироқ ва қулашларни яратмоқда.

Амалдори камтар мамлакат бой бўлурми?

“Нода Ёшиҳико бош вазирлиги даврида Ҳукумат бош котиби ўринбосари бўлиб ишлаган бир инсон келарди. Япония сиёсий тизимида Ҳукумат бош котиби (内閣官房長官) ниҳоятда обрўли ва масъулиятли лавозим—уни эгаллаб турган инсон вазирлик ва агентликлар фаолиятини тартибга солиб туради, айни пайтда ҳукумат сиёсатини матбуотга етказиш вазифасини ҳам ўтайди. Унинг ўринбосарлари ҳам анчайин катта мавқега эга.

Қисқаси, ана шу бир вақтлар бош котиб ўринбосари бўлган инсон биз билан дарсдан сўнг овқатланишга чиқарди, кейин эса поездда (Токионинг энг кенг тарқалган жамоат транспорти) уйига кетарди. Аслида Японияда бу жуда оддий ҳол бўлмасада, кўп учраб туради. Аммо ўша даврда мен бунга ҳайрон қолардим: майли, ҳайдовчиси йўқдир, ўзи машинада юрса бўлмасмикин, деб”.

Албатта, амалдорлар камтарлиги сохта мажбурият учун эмас, Япониядаги каби ички маданият, сиёсий зарурият бўлиши зарур. Агар бу кўзкўрдига айланса, халққа контрактацияни ёпиб қўйиб, амалдорларга АҚШ ва Хитойда ишлаб чиқарилган “маҳаллий Tahoe ва Malibu” етказиб бериш каби кулгули иккиюзламачиликка айланиб кетади.

Ўзбек чиновниклари ҳашамати қимматга тушганидек, энди уларнинг сохта камтарлиги ҳам яна халққа қимматга тушмоқда. Ўзи камбағал мамлакатлар амалдорлари бебилиска ва ҳашаматли ҳаётга ўчлиги, бой мамлакатлар амалдорлари камтар ҳаёт тарзини танлаши ҳайратга солмаслиги керак. Битта маъмурий топшириқ билан бу бузуқ тарозини ўзгартириб бўлмайди, қайтанга яна тескари натижалар бераверади. Сиёсий эркинликлар, соғлом сиёсий рақобат, эркин сайловлар, халққа ва тийиб турувчи парламентга ҳисобдорлик, мустақил суд, сайловлар орқали доимий алмашинадиган ҳукумат ва эркин матбуотгина амалдор синфини камтар қилади.

АҚШ ва Хитойда ишлаб чиқариладиган “маҳаллий мошинларимиз” сотувда қолмаган

Миллий монополист чайқовчимиз Malibu (Хитой ва Кореяда ишлаб чиқарилади), Traverse ва Tahoe’га (АҚШда ишлаб чиқарилади) контрактацияни тўхтатипти.

Ҳозирда savdo.uzavtosanoat.uz платформасида тўрт русумдаги автомобиль таклифи қолган холос (Captiva ҳам божсиз чайқовчилик йўли билан келтириб сотилади).

Хорижий автомобиллардан воз кечиб, “маҳаллий” автомобилларга ўтираётган чиновникларга АҚШ ва Хитойда ишлаб чиқарилган “миллий мошин” етказа олишмаяптими? Бир ой аввал вазифа топширилганида гараждаги ва мавжуд автомобиллардан фойдаланишга ўтилади дейилмаганмиди?

Лекин амалда худди совет дефицити ва ёмон ўтмиш замонларидаги каби ҳокимтўралар мошинвазирига Tahoe ажратишни сўраб мурожаатлар йўллашмоқда.

Қимматлашаётган олтин захираларимиз ҳажмини оширишда давом этмоқда

Март ойида халқаро захираларимиз қолдиғи 2 910,2 млн.долларга ўсиб, 1 апрель ҳолатига 47,9 млрд.долларга етган.

Захираларнинг ўсиши яна олтин котировкалари ошиши билан боғлиқ ҳолда кечмоқда. Ой давомида захираларнинг олтин қисми физик ҳажмда 360 минг унцияга, 11,8 млн.унцияга қисқарганига қарамай, молиявий қийматда 2 019 млн.долларга, 36,9 млрд.долларгача ўсган. Ўтган ойда маҳаллий ишлаб чиқарувчилардан сотиб олинган олтин ҳам ҳисобга олинса, яна 650-700 минг унция олтин (2 млрд.доллар атрофида) сотилган бўлиши мумкин.

Айни вақтда захираларнинг валюта қисми камтарроқ - 883,1 млн.долларга ўсган холос (эҳтимолки, импорт юқорироқ даражада ўсган ёки бошқа камайтирувчи транзакциялар рўй берган) ва ҳисобот санасига 10,4 млрд.долларни ташкил этган.

Захираларимиз таркибига қўшиб кўрсатилаётган ва аллақачон бюджет таркибига кириб кетган ФРРУнинг активлари қолдиғи ҳалигача алоҳидалаштирилгани йўқ.

Афғонистон бозори — экспортёрлар учун катта имкониятлар майдони

Савдо-саноат палатаси делегацияси Афғонистонда бўлиб турибди. Ушбу ташриф давомида улар маҳаллий бозор шароитларини, қоидаларни ҳамда экспортёрлар учун мавжуд имкониятларни ўрганмоқда.

Эътиборлиси шундаки, мамлакатдаги ишлаб чиқариш ҳали етарлича ривожланмаган. Бу эса бозордаги асосий эҳтиёжларни импорт маҳсулотлар орқали қоплашга мажбур қилмоқда.

Яъни, бозор катта, талаб бор, рақобат кам — бундай имкониятни қўлдан чиқариш мумкин эмас.

Ўзбекистон маҳсулотлари сифати, нархи ва тури жиҳатдан Афғонистон бозори учун жуда мос келади. Бу нафақат тайёр маҳсулот етказиб бериш, балки ҳамкорликда ишлаб чиқариш лойиҳаларини амалга ошириш учун ҳам катта майдон яратади.

Бундан ташқари, маълум бўлишича, 2024 йил якунлари бўйича Ўзбекистон ва Афғонистон ўртасидаги товар айланмаси 1,1 миллиард АҚШ долларини ташкил этган.

Айтилишича, Кобул шаҳрида Ўзбекистон қурилиш материаллари, электротехника, озиқ-овқат ва тўқимачик маҳсулотлари учун савдо уйи ташкил этилган. Савдо уйи 570 кв.м шоурум ва 500 кв.м омборхонадан иборат. Бу ерда маҳсулотларингизни намойиш қилиш, сақлаш ва сотиш имконияти яратилди.

Яна бир яхши хабар, май ойидан бошлаб Афғонистон ҳудудида Савдо-саноат палатасининг 4 нафар вакили ўз фаолиятини бошлайди.

Агар сизда экспорт қилиш нияти бўлса, бу имкониятдан фойдаланинг.

Батафсил маълумот учун:
+998 78 150 60 06
+998 97 877 00 58

Saudi Aramco қарори нефть нархини 62 долларгача қулатди: рубль ҳам қийматини йўқота бошлади

Трамп тарифлари ва ОПЕК+ гуруҳининг қазиб олишни кескин ошириши бўйича резолюцияси фонида ўтган ҳафтада кескин арзонлашган нефть нархи янги бошланган ҳафтада ҳам қуйига инмоқда.

Дунёнинг энг йирик нефть қазиб олувчиси Saudi Aramco Осиёдаги улгуржи харидорлари учун Arab Light маркали нефтга кутилганидан ортиқ чегирма бера бошлаган.

Табиийки, бу турли минтақавий бозорлардаги котировкаларга жиддий таъсир ўтказмоқда. Саудияликларнинг қарори 1980- йиллар охирида Совет иттифоқи қулаши арафасидаги ҳаракатларни эслатади.

Нима бўлгандаям, нефть ортидан унга юқори даражада боғланган рубль ҳам қадрсизлана бошлаган. Рублнинг қулай курси, кутилганидек, узоқ сақланмади.

Ўзсаноатқурилишбанк коррупцияга қарши курашиш бўйича амалга оширилаётган ишлар ҳақида маълумот берди

Ўтган ҳафта "Ўзсаноатқурилишбанк тизимида рақамлаштириш, очиқлик ва шаффофликни таъминлашга оид ишлар" мавзусида матбуот анжумани бўлиб ўтди. Тадбирда ушбу йўналишда эришилган натижалар, ўзгаришлар ва истиқболдаги режалар ҳақида сўз борди. Хусусан, банкда Коррупцияга қарши курашиш хизмати ташкил этилиб, унга мустақил назорат ваколати берилди, банк халқаро стандартларга мувофиқ антикоррупция сертификатига эга бўлди.

Маълум қилинишича, банкнинг 30 нафар ходими Халқаро комплаенс ассоциацияси (ICA, Буюк Британия) курсларини тугатиб, халқаро даражадаги сертификат олган. Банкда харид жараёни шаффофлаштирилган бўлиб, бунинг натижасида банк манфаатларига жами 66,7 млрд. сўм зарар етказилишининг олди олинган. Тадбиркорлик субъектлари билан боғлиқликни аниқлаш бўйича махсус дастур (модул) яратилиб, бу орқали банк ходимларининг корхоналар устав капитали ва бошқарувидаги иштироки доимий мониторинги йўлга қўйилган. Банкда 3,7 минг нафар ходим манфаатлар тўқнашуви бўйича текширувдан ўтказилган ва аниқланган ҳолатлар бартараф этилган.

Шунингдек, кредит ажратиш жараёнини рақамлаштириш ҳисобига коррупцион ҳолатлар олди олиниб, бюрократик тўсиқлар бартараф этилгани қайд этилди. Тадбирда журналистлар ва жамоатчилик фаоллари ўзларини қизиқтирган барча масалалар бўйича маълумотларга эга бўлдилар.

Реклама

ХВЖ миссияси билан Ер ислоҳоти муҳокама қилинган, Ер ислоҳоти ҳақида нималар маълум?

Халқаро валюта жамғармаси (ХВЖ) миссияси ҳар йилги анъанавий Маслаҳатлашувлар доирасида Иқтисодиёт ва молия вазирлигида иқтисодий блок раҳбарияти билан учрашувлар ўтказган.

Томонлар мамлакатимизда иқтисодий ривожланиш тенденсиялари, амалга оширилаётган ижтимоий-иқтисодий ислоҳотлар, эришилган натижалар ҳамда келгусидаги режалар юзасидан муҳокамалар олиб боришган. Эътиборлиси, муҳокама қилинган масалалар орасида Ер ислоҳотлари мавзуси ҳам бўлган.

Жорий йил бошида қишлоқ хўжалиги ерларини аукцион савдоларига чиқариш бўйича тажриба-синовлар бошланган эди. Тажриба доирасида фермер хўжаликларининг ер майдонларининг 80%ини ўз ихтиёри билан топшириши ва қолган ернинг 20%ини фермерга ижарада қолдириш механизмлари ҳам акс этган. Мазкур тажриба куздан бошлаб бутун Ўзбекистонга қўлланилиши мумкин.

Нима бўлгандаям, узуқ-юлуқ, эътирозли ва саволли тажрибаларни айтмаса, Ер ислоҳотларининг на мақсадлари, на концепцияси, на стратегияси эълон қилинган.

"Ўзбекистонда жуда кўп одамлар немис тилини ўрганаётгани мени жуда хурсанд қилади"

Германиянинг Ўзбекитсондаги элчиси Манфред Хутерер Самарқанд саммити арафасида Anhor.uz учун интервью (видео) берган.

Айрим иқтисбослар:

Децентрализация ҳақида:

Яъни, савол шундан иборатки, бу жараённи қандай тезлаштириш ва Ўзбекистон реалияларида амалга ошириш мумкин? Яъни децентрализация жараёни, қарорлар қабул қилиш ва бу жараённи қуйи даражаларга тақсимлаш, қарорлар биринчи навбатда ўша ерда қабул қилиниши учун.

Тил ўрганиш ҳақида:

Ўзбекистонда жуда кўп одамлар немис тилини ўрганаётгани мени жуда хурсанд қилади. Менимча, бутун Осиёда энг кўп одамлар. Тахминан 400 000 киши Ўзбекистонда немис тилини ўрганади.

ЖСТга аъзолик ҳақида:

"Менимча, протекционистик кайфиятлар узоқ муддатли истиқболда барча миллатлар қашшоқлашишига олиб келади, холос. Ва эркин савдо ҳар бир миллатнинг фаровонлиги ошишига ҳисса қўшади. Шунинг учун менимча, ЖСТ ташкилот сифатида ўз қоидалар тизимини ривожлантиришда давом этиши керак. Ва Ўзбекистон бу йўналишда жуда муҳим қадамларни қўйди".

Германия-Ўзбекистон муносабатлари ҳақида:

"Мен аллақачон айтганимдек, бугунги кунда бизнинг муносабатларимиз ҳеч қачон бўлмаганидек яхши даражада. Ва, албатта, элчи сифатида мен, биринчи навбатда, бутун энергиямни мамлакатларимиз ўртасидаги икки томонлама муносабатларни яхшилашга бағишламоқчиман. Уларни янада чуқурлаштиришни ва бунга ҳисса қўшишни истардим".

Навбатдаги иситиш мавсумида ҳам эҳтиёжмандларга бир марталик ёрдам кўрсатилади

2025/2026 йилги иситиш мавсумида аҳолининг эҳтиёжманд қатламини қўшимча моддий жиҳатдан қўллаб-қувватлаш мақсадида жорий йилнинг ноябрь ойида қуйидаги оилаларга 1 миллион сўмдан бир марталик моддий ёрдам ажратилади:

(а) Реестрларга киритилган оилаларга; 

(б) “маҳалла еттилиги” хулосаси асосида Реестрларга киритилмаган, бироқ ёрдамга муҳтож оилаларга. Бунда:
(в) “маҳалла еттилиги” томонидан қўшимча рўйхат шакллантирилишида биринчи навбатда, боқувчисини йўқотган оилалар, аъзолари I ёки II гуруҳ ногирони бўлган шахслардан иборат оилалар, ногиронлиги бўлган болаларни парваришлаётган оилалар, узоқ муддатли даволанишни талаб этадиган касалликлар билан касалланган шахслар яшовчи оилалар, ўзгалар парваришига муҳтож бўлган ёлғиз яшовчи шахслар ҳамда ёлғиз яшовчи кексалар ва ногиронлиги бўлган шахслар, уч ва ундан ортиқ оила яшайдиган хонадонларда ҳамда газ таъминоти бўлмаган ва марказлаштирилган тартибда иситилмайдиган кўп қаватли уйларда яшовчи оилалар инобатга олинади;
(г) қўшимча равишда шакллантириладиган рўйхатдаги оилалар сони Реестрларга киритилган оилалар сонининг 40 фоизидан ошмаслиги лозим.

Базавий меъёрдан ортиқ истеъмол учун эҳтиёжманд аҳолига ёрдам кўрсатиш давом этади

Президент қарори билан, 2025 йил 1 майдан 2027 йил 1 апрелга қадар “Ижтимоий ҳимоя ягона реестри” ахборот тизими орқали болалар нафақаси ва моддий ёрдам олувчи ҳамда Камбағал оилалар реестрига (кейинги ўринларда – Реестрлар) киритилган, шунингдек, Реестрларга киритилмаган, бироқ моддий аҳволи бўйича кам таъминланган оилалар мезонларига тўғри келувчи, оиладаги жон бошига даромади минимал истеъмол харажатларининг 1,5 баробаридан ошмайдиган оилаларга:

(а) электр энергияси истеъмоли бўйича – ойига базавий меъёрдан 150 кВт соатгача;

(б) табиий газ истеъмоли бўйича – иситиш мавсумида ойига базавий меъёрдан 250 куб метргача, бошқа даврларда ойига базавий меъёрдан 150 куб метргача ортиқ фойдаланилган қисми учун базавий меъёр доирасидаги ҳамда базавий меъёрдан ошган нархлар ўртасидаги фарқ компенсация қилиб берилади.

Соққа-синовлар ортидан Таглик импорти қулашда давом этмоқда

Муттаҳам монополист чайқовчилар фойдасига ўйлаб топилган соққа-синовлар ортидан таглик ва прокладкалар импорти қисқаришда давом этмоқда. Тагликларга талаб юқори даражада бўладиган март ойида импорт деярли икки каррага қисқарган.

Бошини қумга тиқиб олган Техник жиҳатдан тартибга солиш агентлиги “мажбурий давлат рўйхатидан ўтказиш” дея ном олган лаборатория синовлари ким томонидан ва қаерда амалга оширилаётгани, маҳаллий ишлаб чиқарувчи (чайқовчилар) маҳсулотлари синовга тортилмаётгани борасидаги саволларни очиқ қолдирмоқда.

Бозорда нархлар ошмоқда, энг талабгир ассортиментда дефицит яққол кўрина бошлаган.

Албатта, бу каби халқни танловсиз талаш орқали бойишни кўзлаган зараркунанда ишларнинг ортида турган жажманларнинг қулоғи кўриниб тургани билан, уларга бўйича расмий идоралар суриштирув ва ўрганишлар олиб бормаса бефойда.

​Чеклов ва тақиқ остида: мошин импорти қулашда давом этмоқда

Март ойи якунлари бўйича енгил автомобиллар импорти ўтган йилнинг шу даврига нисбатан 2,7 каррага қулаган. Лекин бу расмий рақамлар реал қулаш чуқурлигини акс эттирмаслиги мумкин.

Чунки ўтган йили ҳақиқатда Ўзбекистонга олиб кирилган, лекин Пискентдаги “соққа-синовларга” киришга улгурмаган ўнминглаб мошинлар ҳали расман импорт қаторига киритилмаган бўлиши табиий.

Нима бўлгандаям, монополист чайқовчилар фойдасига жорий қилинган чеклов ва тақиқлар ортидан мошин импортининг каррасига қисқариши 2025 йилнинг қолган даврида ҳам давом этади.

​Мартда 40 млн.доллардан кўпроқ қийматда қорамол гўшти импорт қилинган: бу янги рекорд

Гўшт кескин қимматлашган ўтган март ойида гўшт ва гўшт маҳсулотлари импортининг ўсиш суръати янада тезлашган. Хусусан, қорамол гўшти импорти 2,2 карра ўсган ва 40,2 млн.долларни ташкил этган. Бу Божхона қўмитаси тегишли маълумотлар очиқлашни бошлаган давр учун мутлақо янги рекорд.

Эҳтимолки, айнан катта ҳажмдаги гўшт импорти нархлар ўсишини секинлаштирган (январда ҳам шундай бўлганди).

Товуқ гўшти импорти ҳам ошишда давом этган. Лекин қўй гўшти импорти деярли 2 карра қисқарган.

Божхона маълумотларига кўра, мол гўшти килоси 4,3 доллардан импорт қилинган (ўтган йилнинг шу даврида 4,0 доллардан). Товуқ гўшти ўртача 1,3 доллардан, қўй гўшти 3,2 доллардан импорт бўлган (ўтган йилнинг шу даврида мос равишда 1,1 ва 2,8 доллар).

Маълумот учун, Ўзбекистонда гўшт импорти учун божлар ё ноль ставкада ёки ноллаштирилган.

​Евроиттифоқ Марказий Осиё учун 12 млрд.евролик инвестиция пакети эълон қилди

Самарқанд саммитининг сиёсий якуни ўлароқ, Марказий Осиё ва Европа Иттифоқи ўртасида стратегик шериклик ўрнатиш ҳақида тарихий қарор қабул қилингани бўлса, музокараларнинг иқтисодий натижалари унданда бой бўлди.

Евроиттифоқ Global Gateway дастури доирасида 12 млрд.евро ҳажмидаги инвестиция пакетини эълон қилди. Инвестиция пакети минтақа учну муҳим бўлган тўртта соҳага йўналтирилади: транспорт (3 млрд евро), камёб муҳим минераллар (2,5 млрд евро), гидроэнергетика ва иқлим (6,4 млрд евро) ҳамда сунъий йўлдош интернети (100 млн евро).

Шунингдек, Европа тикланиш ва тараққиёт банки 2027 йилгача муҳим минераллар ва қайта тикланувчи энергия каби соҳаларни ўз ичига олган тахминан 7−8 млрд евролик лойиҳалар пакетини ишлаб чиқмоқда.

Ҳар доимгидек: Бутун дунёда нефть нархи қуламоқда, Ўзбекистонда бензин қимматламоқда

Трамп тарифлари глобал талабни кескин қисқартириши эҳтимолларини яратади, бу нефть бозорига, кеча тарифлар эълон қилиниши биланоқ зарба бера бошлади. Кеча кун давомида брент типидаги нефть 5 доллардан кўпга арзонлаган бўлса, бугун ҳам бу жараён давом этмоқда ва Хитойнинг жавоб тарифларидан кейин минимумларда нефть котировкалари яна 5 долларга, 64 долларгача арзонлаган (тўрт йиллик минимум). Бунинг устига ОПЕК+ кеча оқшом май ойида қазиб олишни режаланганидан 3 баробардан кўпроққа оширишини эълон қилди (суткасига +411 минг баррель), демак нефть арзонлашишда давом этади.

Лекин бу хабарларнинг эркин энергетика бозори томон ҳаркатланмаётган, ёғли қўлда ва ёпиқ кабинетлардан туриб нархлар бошқариладиган Ўзбекистонга алоқаси йўқ.

Бензин нархи қишин-ёзин қандай ошган бўлса, шундай ошишда давом этмоқда.

Хусусан, апрелнинг дастлабки 3 кунида биржа савдоларида 80 шиптир 107 сўмга, 92 бензин эса бирданига 546 сўмга қимматлаган.

Шохобчалардаги чакана нархлар ҳам ошишда давом этмоқда. 1 апрелдан кейин бензин нархларига камида 100 сўмдан қўшиб олинган.

Бу охири эмас. Хавотир олаётганимиздек, метан газ нархининг 1 майдан кескин кўтарилиши яна бензин нархларини ошириб олишга навбатдаги баҳона бўлади. Бу пайтда нефть нархи 50 долларга тушиб кетса ҳам фарқи йўқ, тийиқсиз монополист ва олигархлар нархларни оширишда давом этишади.

InfinBANK "Корпоратив бошқарувда комплаенснинг ўрни" мавзусидаги давра суҳбатида иштирок этди

InfinBANK бошқаруви раисининг биринчи ўринбосари Равшан Кадиров KPMG ҳамда Америка Савдо Палатаси (AmCham) билан ҳамкорликда ташкил этилган "Корпоратив бошқарув: комплаенс ва ички аудитнинг долзарб масалалари" мавзусидаги давра суҳбатида қатнашди.

Тадбирда йирик халқаро компаниялар, банк сектори ва бошқа ташкилотларнинг мутахассислари ҳамда вакиллари ички назорат, хатарларни бошқариш ва меъёрий талабларга риоя этиш соҳасидаги замонавий муаммоларни муҳокама қилдилар. Шунингдек, иштирокчилар корпоратив бошқарувнинг шаффофлиги ва самарадорлигини оширишга қаратилган тажриба ва амалиётлари борасида ўзаро фикр алмашдилар.

Реклама

"АҚШ божларида Ўзбекистон қиёсий устунликка эга тармоқларнинг ривожланишига имкониятни кўриш мумкин"

ЖСТ бўйича махсус вакил Азизбек Урунов АҚШ томонидан кенг кўламли божлар жорий этилишига нисбатан мулоҳазаларини очиқлаган.

Азизбек Урунов "ЖСТ ҳалок бўлди" ва "Ўзбекистон учун экспорт имкониятлари ёпиқ" деган фикрларга қўшилмайди. АҚШнинг янги божлари таркибида Ўзбекистон қиёсий устунликларга эга бўлган тармоқларни — биринчи навбатда, тўқимачилик ва тикувчилик саноатини ривожлантириш имкониятларини кўриш мумкин.

Махсус вакилга кўра, АҚШ ёндашуви ЖСТни инқирозга олиб келиш эмас, балки ўз таъсир доираси орқали ислоҳ қилишга ундаш ва ҳар бир муаммо янги имкониятлар яратади.

APEX INSURANCE: 2024-йилги фактлар ва натижалар

2024 йил якунига кўра, APEX INSURANCE асосий йўналишларнинг барчасида барқарор ўсишни намоён этди. Фойда, капитал ва активлар кўрсаткичлари ўсди. Шу билан бирга, суғурта мукофотлари бўйича тушумлар ва тўловлар ҳажми ҳам ортиб борди. Қаноатлантирилган суғурта даъволарининг даражаси етарлича юқори шаклланди.

Компания ўзининг ҳудудий тармоғини кенгайтиришни ва мижозлар базасини оширишни давом эттирди — бу ҳам чакана, ҳам корпоратив сегментларда кузатилди.

Кучли операцион ва молиявий натижалар рейтинг агентликлари томонидан ҳам тасдиқланди. "Ahbor-Reyting" ва "SNS RATINGS" компанияни “Барқарор” прогнози билан миллий шкала бўйича энг юқори рейтинглар билан эътироф этди. Шунингдек, халқаро рейтинг агентлиги S&P Global Ratings компания рейтингини мамлакатнинг суверен даражасигача оширди — бундай даража ҳозирча фақат саноқли суғурта компанияларда мавжуд.

Ушбу натижалар компания томонидан танланган стратегиянинг самарали эканлигини ва унинг суғурта бозорида мустаҳкам мавқега эгалигини тасдиқлайди.

Янада батафсил — ҳаволада.
Реклама