Сахаларга үөрүүлээх күн үүннэ! Саха өркөн өйдөөхтөрө Маһары Бадьыакап, Соппуруон Сыраанап,
Сэһэн Ардьакыап саҕаттан үйэлэр тухары ис санааларыгар иитийэхтээн илдьэ сылдьыбыт баҕа санаалара туолбут күнэ!
Ол норуот баҕа санаата туолуута -
сүүрбэһис үйэ саҕаланыытын буккуурдаах кэмигэр инники күөҥҥэ сылдьыбыт саха омук бөлүһүөктэрэ Өксөкүлээх Өлөксөй, Күлүмнүүр, Ксенофонтов курдук дьон кэннилэриттэн оччотооҕуга саҥа былааһы, большевиктары өйөөн өрө тахсан кэлбит саха мургун ыччаттара Аммосов, Барахов, Ойуунускай уонна кинилэр хамаандаларын ситиһиитэ буолар. Хайдах Өктөөп революцията кыайыаҕыттан Ленин национальнай политикатыгар олоҕуран саха эдэр салайааччылара бука бары автономнай республика буоларга харса суох үлэлээн барбыттара.
Итиннэ биир мүччүргэннээх түгэҥҥэ, эппиккэ дылы "кии буолабыт дуу, киһи буолабыт дуу" диэн ыйытык тирээн кэлбитигэр атын омук уолаттара: Сергей Широких-Полянскай уонна Иван Строд биһиэхэ дурда-хахха буолбуттара. Ол хайдах буолбутун өссө кэпсиэҕим. Бу үөһээ баар хаартыскаҕа Үөһээ Бүлүүгэ Бараховка, Широких-Полянскайга уонна Стродка анаммыт памятник.
Республика олохтоохторун барыгытын Саха Республикатын Күнүнэн өссө төгүл ис сүрэхпиттэн эҕэрдэлиибин!