ای بشر عالمه سلطان اولاسان گئتمه لی سن
مالک  مُلک سلیمان اولاسان گئتمه لی سن

بیر تَفَکُّر ایله گور خلقتیوین سِرّی ندی
خاک تیره مه تابان اولاسان گئتمه لی سن

عُمر نوح اولسا نصیبون بو فنا دونیاده
شُهره ی  عالم امکان اولاسان  گئتمه لی سن

حسنووه ناز ائلمه عمری بئش اون گونلوکدو
بونو بیل یوسف کنعان اولاسان گئتمه لی سن

قالمادی حضرت موسایه ده فانی دنیا
طور سیناده نگهبان اولاسان گئتمه لی سن

گلسه عیساده اوزو پیرو اسلام اولاجاق
ارمنی یا که مسلمان اولاسان گئتمه لی سن

مصطفی تک بشره  دونیا وفا ایلمدی
بیت پیغمبره دربان اولاسان گئتمه لی سن

هانی گور  فاتح خیبر کیمی شیر غزوات
سر سپاه شه مردان اولاسان گئتمه لی سن

عرصه ده ائتمه تفاخر قولووین قدرتینه
دهریده رستم دستان اولاسان گئتمه لی سن

قویما مغرور ایلیه چوخدا  سنی  پُست و مقام
آمر  و تابع فرمان اولاسان گئتمه لی سن
 
گور یزیدی اولوسان یا که طرفدار حسین
دشمن و حامی قرآن اولاسان گئتمه لی سن

عیش و نوشیله باشا وئرمه گوزل گونلریوی
باغ عشرتده غزلخوان اولاسان گئتمه لی سن

 چوخلارین چرخ فلک گولدوروب آغلار قویدو
یتمیش ایل عمریده خندان اولاسان  گئتمه لی سن

ایندی که حقدی اولوم محشره سرمایه قازان
صاحب مال فراوان اولاسان گئتمه لی سن

کاخ و ویلاده اوتور قبر ائوینی یادیوه سال
عاقبت  خاکیله یکسان اولاسان گئتمه لی سن

اجلین وقتی یئتیشسه قاچاجاقسان هایانا
عازم دشت و بیابان اولاسان گئتمه لی سن

هارا گیتسون سنی بیرگون تاپاجاق عزرائیل
یرین آلتیندا دا پنهان اولاسان گئتمه لی سن

سنده فرهادی قیامت گونونون فکرینه قال
حافظ و سعدی دوران اولاسان گئتمه لی سن

@qazvinturklari