گول کی، ای قونچه دوداقلیم کی باخیب من ده گولوم


گول کی، ای قونچه دوداقلیم، کی باخیب منده گولوم،
تانری بیر باشقا گؤزللیک یارادیب سنده، گولوم.

اویانیب ناز ایله هر صوبح دارارسان زولفون،
تئللرین عطرینی یئللر سَپَلَر کنده، گولوم.

سِیری-گولشنده چیخیب سِیر اِلَسن  ناز ایله،
باش اَیَر فخر ایله گوللر سنه گولشنده گولوم.

مورغی-دیل بُویلانار  هَردَن قارا خالین طرفه،
آج قوشون بیر گؤزو عادتدی قالار دَن‌ده، گولوم.

اؤز اَلیله بَزَییب حضرتی-معمار سنی،
سونرا گؤیدن یئره گؤندردی نُماینده، گولوم.

اِلَدیم زولفو-پریشانینه بیر دفعه نظر،
فیکریم اوندان سورا تا اولدو پراکنده، گولوم.

مرحمت اِیله، ووقار، بختی‌قاره‌نین گونونه،
بلکه، بیز ده چیخاریق بیر یانا ساینده، گولوم.


✍ووقار بیلجرلی


❤️

@qazvinturklari