کئفلی

بیر یوْلچویام بو یوْل اۆسته
ساغیم کئفلی، سوْلوم کئفلی،
بوشا قویسام بیرآن دوْلماز
بوْشوم کئفلی، دوْلوم کئفلی.

بویوْلدا چوْخلو ناکسلر
منیم چۆن کین نه دن بسلر
بویوْل منی نره سسلر
قیچیم کئفلی، قوْلوم کئفلی.

گیریشده گۆلدۆم آغلار کن
آلیشدیم کؤکسۆ داغلار کن
چاپیلدیم چاغدا چاغلارکن
اؤزۆم کئفلی، یوْلوم کئفلی.

اوْلوم اوْلدو،  اؤلۆم قالدی
ایچیم اوچدو، چؤلۆم قالدی
سوْنوج بؤلۆم- بؤلۆم قالدی
چاییم کئفلی، گؤلۆم کئفلی

یازیق اوْلدوم، قوچاق اوْلدوم
سۆمۆک اوْلدوم، پیجاق اوْلدوم
اوْدونسوز بیر اوجاق اوْلدوم
اوْدوم کئفلی، کۆلۆم کئفلی.

یوْلوْن یار کؤنلۆمه سالسین
منی مندن منم آلسین
گئدرسم بس کیمه قالسین
باغیم، باغچام، کۆلۆم کئفلی.

چینار قددیم یاشیل لاشدی
اوجالدیقجا آشیب داشدی
گۆلۆم کؤلگه م، واریم یاشدی
دالیم بارسیز، کوْلوم کئفلی.

بویوْلدا چوخ یوزان دویدوم
آشیق گؤردۆم، اوْزان دویدوم
نامازسیز بیر اذان دویدوم
یوْخوم کئفلی، بوْلوم کئفلی!

چارام کیمده، نیاز قیلدیم
خوشام« خوْشنام» لا یاز قیلدیم
اذان سیز بیر ناماز قیلدیم
اؤلۆم کئفلی، اوْلوم کئفلی!

یوْل کئچدیم بیلر، بیلمز
گؤزۆم قان یاش الر، سیلمز
مه لر، آغلار، گۆلر، گۆلمز
اؤزۆم دالقین، یوْلوم کئفلی!...


م. خوْشنام

@qazvinturklari