АНДИЖОНДА ФУҚАРОЛАР ҚАБУЛ ҚИЛИНМАЙДИГАН "ҚАБУЛ КУНЛАРИ"

Андижон тумани, Бутакара қишлоғидан бўлган фуқаро Ихтиёр Давроновнинг Элтузга маълум қилишича, у икки кун давомида Андижон вилояти Рақобатни ривожлантириш ва истеъмолчилар ҳуқуқларини ҳимоя қилиш бошқармасига қилган, бироқ мурожаати жавобсиз қолган.

Ихтиёр Давронов 21 ва 22 апрель кунлари бошқармага қайта-қайта борганини, аммо на ходимлар ва на раҳбар ўринбосарлари уни қабул қилмаганини билдирмоқда.

Ҳеч ким мурожаатимни ҳам эшитмади. Таништирмасдан бир ходим "туманларда сайёр қабул бўлади, шунда келасиз" дея жавоб берди. Аммо бошқарма кириш қисмида эса ҳар куни соат 9:00 дан 11:00 гача фуқароларни қабул қилиш жадвали илиб қўйилган, — дейди Ихтиёр Давронов.

Шу ўринда савол туғилади: Агар фуқаролар қабул қилинмаса, нега бу жадвал осиб қўйилган? Бу ҳам "ҳужжат учун" қилинадиган навбатдаги расмиятчиликми?

Ихтиёр Давроновнинг таъкидлашича, мазкур ташкилот номига монанд равишда истеъмолчилар ҳуқуқини ҳимоя қилиши керак. Аммо амалда на мурожаат эшитилмоқда ва на ёрдам кўрсатилмоқда.

У масъул идоралардан амалий ёрдам сўрамоқда.

"Илтимос, амалий ёрдам беринг! Агар фуқароларнинг мурожаатлари эшитилмаса, бундай ташкилотлар нега керак? — дейди Ихтиёр Давронов.

Ҳозирча бошқарма томонидан бу ҳолат юзасидан расмий изоҳ берилмади.


💬Telegram |📱Facebook |
🐦Twitter |📱Instagram | ▶️YouTube