یازماق اوچون داریخمیشام
همت شهبازی

بلکه ده دونیادا گله‌جک نسیل اوچون بیر سیرا گویاکی مکتوبلاشمیش اوخوجوسوز کیتابلار قویان تکجه ملت بیزیک. دونیانین اکثر دیللرینده یازیلان هر بیر اثر، ایلک اؤنجه یاشادیغی چاغین اوخوجو نسلینی نظره آلاراق یازیرلار. بیزده ایسه بونون عکسی اولور. چاغیمیزین اوخوجوسو، واختیندا اوخومادیغی اوچون هارداسا بیرگون اؤز دیلینده اوخویان بیر ملت اولاجاغیق دئیه اثرلر اورتایا قویوروق. یئنه بو حاقدا دونیادا نادر اولان بیر ملت بلکه ده بیزیک.
.
«بیز یالنیز اؤز معاصرلریمیزی تانییریق» (#اومبئرتو‌ـ‌ائکو). بو سؤزده معین گئرچکلیک اولماسینا باخمایاراق، بیزیم یازیچی‌لیق شرایطیمیز معین معنادا اؤزوموزدن آسیلی اولمادیغی کیمی، اوخوجولوق شرایطیمیز ده بونا تایدیر. بیز هئچ، معاصریمیزی ده تانیمیریق. هله‌ بلکه یازارلاریمیز دریدن-قابیقدان چیخاراق اؤزلرینی دونیانین کیچیک بیر گوشه‌سینده سیخیلیب قالماقلارینی بیله‌رک یئنه ده دیل عشقینه، یورد عشقینه، ملت عشقینه، نه‌بیلیم هر نه‌یین عشقینه اولماسینی نظره آلماقلا یازیب یارادیرلار. یئنه ده دونیادا بلکه ده بیزیمکی‌لر یگانه یازارلاردیرلارکی اوخوجولاری اولمایاجاغینی بیله‌رک یازیرلار. فداکارلیق نئجه اولارمی؟
آنجاق اومبئرتو ائکویا سوال وئرمک اولار: سنین دئدیین چاغداش اوخوجو، بیزیم دئدییمیز چاغداش اوخوجو ایله برابر امکانلاردان فایدالانا بیلمیر. دانیشدیغی دیلینی، یازی اوزرینده اوخویا بیلمیر. چونکی اونا عادت ائتمه‌ییبدیر. تعلیم، گؤرمه‌ییبدیر. تعلیم، تکرار اولماق واسیطه‌سی ایله اؤز بهره‌سینی وئریر. ائله ائکونون اوخوجوسو اؤزونون تعلیم آلدیغی دیلی تکرار ائتمه‌سه، او دا بیزیم کیمی «باخار کور» اولاردی. او دا ائله ائکونون یازدیغینی اوخویا بیلمه‌یه‌جکدیر. ائکو، بیلمه‌لیدیرکی دونیادا باخار کور اولان اوخوجو وارسا او دا بیزیک.
.
#اورهان‌پاموک نوبئل نطقینده آتاسی‌نین اونا اؤزونون یازی‌لاری، فرانسا ادبیاتیندان ترجمه‌لری ایله دولو بیر چمداندان دانیشیر. بیر یازیچی اوچون چمدان او قدر ده اؤنملی دئییل. بونو پاریس محیطینی گؤروب، فرانسا ادبیاتیندان تورکجه‌یه چئویرن پاموکون آتاسی دا یاخشیجا بیلیردی. آهیل‌لیق یاشیناجاق اؤزو ایله گزدیردییی چمدانین ایچینده اونون بؤیوک حسرتی یاشاییردی. اونون ایچینده واختی ایله پاریسده، یالقیزلیغیندا یازدیغی اوره‌ک دؤیونتولری وار ایدی.
هئچ بیر شئی -حتتا یازارلیق لذتی ده بئله- یازی‌نین دینله‌ییجیسی اولماسی قدر شیرین دئییل. آتاسی‌نین یازدیقلاری ایله عکس حالدا دورماسینی ظن ائدن پاموک، بورادا آتاسی ایله عکس دوشونجه‌ده اولماسینا یانیخیر. اونون یانیخدیغی مسئله بیر یازیچی و شاعیرین ایللرله بوکولوب صاندیق ایچینده قالاراق اوخوجو اوزو گؤرمه‌مه‌سی‌دیر.
بوتون بونلاری اونا گؤره دئییرم کی آرتیق بیزیم ده یازدیقلاریمیز پاموکون آتاسی‌نین چمدانیندا بوکولوب قاتلاری آچیلمایان شعر دفترلرینه بنزه‌ییر. بو قدر «پیچاتدی(= باغلی) پاکاتین باغلی قالماسی» قالان ادبیاتیمیزین دورومو هئچ ده اوره‌ییمجه دئییل. بیز ایللرله یازیلاریمیزلا تک قالیریق. هردن اؤزوموزه اورک-دیرک وئریرک‌کی پاموکون آتاسی‌نین چمدانینداکی دفترلری کیمی هارداسا بیر گون بیزی ده زامانین، تاریخین چورویوب قوجالدیغی چاغیندا اوخویاجاقلار. آنجاق اوندا دونیانین مرکزینده قالان ادبیات، دوردوغو یئرده قالاجاقمی؟ یقین کی یوخ. اوندا دا پاموکون آتاسی‌نین ایللرله گؤزو قنشرینده یازاراق آنجاق پاموک (دینله‌ییجی) طرفیندن اونا هئچ بیر محل قویمادان آهیل‌لیق دؤورونده او یازیلارا بیر «حسرت قوتوسو» کیمی باخیلاجاغینی دویورام ایندیدن. پاموکون آتاسی بیر هفته سونرا اوتاغا گلدیکده، چمدانین یئریندن ترپندیینی گؤرور. دئمک بیریسی اونو اوخویاجاق. بو حیس اونو دویغولاندیریر. اؤزونو خوشبخت گؤرور و «همیشه‌کی کیمی گولدو» سؤزو ایله اؤزونو راحاتلاییر. باخ بئله‌دیر اوخوجونون یازیچییا وئردییی ان بؤیوک خوشبخت‌لیک.
.
بونلاری بیله‌رک یئنه ده یازیرام. اونا گؤره‌کی تاریخ بویو یازمادیغیمیزین اوتانجینی یاشاییرام. اوخوماق، یازماق منه ساکیت‌لشدیریجی بیر هَب کیمی‌دیر. اونلاری کنارا قویدوقدا هَببین ده تأثیری یوخا چیخیر. سون زامانلار یئنه ده یازماق اوچون داریخمیشام.
.
https://t.me/dusharge1

همت‌ شهبازی جنابلاریندان دوشوندورجو بیر یازی👇👇

فروردین‌ین ۳۰-جو گونو، علوم آزمایشگاهی گونو بوتون همکارلاریما موبارک اولسون💐

https://t.me/ruqayyekabiri

آیاق اوستو یازیلار

هر گون آددیملادیغیم پیادا یولدا بوداقلاری یئنی چیرتلامیش ایده آغاجلارینین اؤنوندن کئچیرکن عناب رنگینده، سیرغا کیمی بوداقدان آسیلمیش بیر جوت سیسقا ایده گؤزومه تاخیلماقدا، دایانیشما سؤزو ذهنیمده جانلاندی. پاییز و قیش فصیل‌لرینده، قار ایله شاختا-سازاقدا بوداقدان آسیلی قالیب، اؤزلرینی یاز فصلینه چاتدیران بو ایده‌لر، ندنسه آغیر اقتصادی دورومدا دایانماغا چالیشان اؤزوم کیمی امک‌لی‌لری منه خاطیرلاتدی.
بو دایانیشمانین شکیلینی چکمه‌دن یولوما دوام ائده بیلمزدیم.
ائوه ساری آددیملاییرکن، یولو باشاباش او ایده‌لرین نه زامان بوداقدان قوپاجاقلارینی دوشوندوم.


۱۴۰۴.۰۱.۲۸

https://t.me/ruqayyekabiri

http://mugham-pub.com/%da%a9%d8%aa%d8%a7%d8%a8%d9%87%d8%a7%db%8c-%d8%b5%d9%88%d8%aa%db%8c/


کتاب‌های صوتی موغام و همکاران

آیاق اوستو یازیلار
میراثیمیز
قوناقلاریمیزا دئدیم: بویورون، بورا مظفرالدین میرزا فرمانی ایله تبریزین گؤزونده تیکلمیش دارالفنون‌ بیناسی‌دیر. سونرا بینانین آجیناجاقلی وضعیتیندن اوتانیب، گؤزومو یئره تیکدیم.‌ اما جامع مچیدینه آیاق قویدوغوموزدا بینانین محتشم گؤزللییی و اورا حاکیم اولان اتمسفردن، سانکی او بینانین تیکیلمه‌سینده منیم ده رولوم وار ایمش کیمی ایچیمده بیر دینجلیک و غرور دوغولدو و باشیمی دیک توتوب، قوناقلارلا بیرلیکده مچیدده آددیملادیق.
مچیددن چیخیرکن، قاپی اؤنونده ایلشن شخصدن قوناقلار اوچون بروشور ایسته‌دیم، تبریزین باشی‌اوجالیغی ساییلان بو عظمت‌ده تاریخی بینا حاقیندا توریست‌لر اوچون میراث فرهنگی طرفیندن بیر واراق بروشور بئله چاپ ائدیلمه‌میشدیر.  
یئنه میراث‌فرهنگی‌نین آخساقلیقلاریندان
دولایی اوتانیب، گؤزومو یئره تیکدیم.
بو گون قوناغیم دارلفنون‌دان چکدییی بیر عکسی منه گؤندریب و سئوینجک بیر لحن‌له  عکس‌ین ساغ‌طرفینده، برق دیره‌ییندن آسیلمیش اعلاندا یازیلان متنه دقت ائتمه‌ییمی ایسته‌ییب.
گؤزلویومو تاخیب، دقت ایله عکسین ساغ طرفینه باخدیم. اعلاندا دارلفنون‌ون مرمت اولاجاغی قید اولونموشدو.
اورا گئتدییمیزده هئچ بیریمیز او اعلانی گؤرمه‌میشدیک. عکس‌ین ساغینداکی اعلانی اوخویاندان سونرا اؤزلویومده دئدیم: ایندی باشیمی دیک توتمالییام یوخسا... //
۱۴۰۴.۰۱.۲۵
https://t.me/ruqayyekabiri

آیاق اوستو یازیلار
میراثیمیز
قوناقلاریمیزا دئدیم: بویورون، بورا مظفرالدین میرزا فرمانی ایله تبریزین گؤزونده تیکلمیش دارالفنون‌ بیناسی‌دیر. سونرا بینانین آجیناجاقلی وضعیتیندن اوتانیب، گؤزومو یئره تیکدیم.‌ اما جامع مچیدینه آیاق 👇👇👇

آیاق اوستو یازیلار

سحر چاغی نئتده ماریوبارگاس یوسا-نین وفات خبرینی اوخویورکن هئچ تعجب ائتمه‌دیم. دونیادان ال اوزمه‌سی‌نین واختی چاتمیشدی دئیه، دوشونورم. یوسا اؤز بورجونو ادبیاتا وئرمیش، دونیا چاپیندا بیر ادبی خزینه میراث قویموش و بو حیاتی ترک ائتمیش. بو سویه‌ده دونیانی ترک ائتمک اؤلوم آدلانا بیلمز. اؤلوم بیر یوللوق یوخ اولماق دئمکدیر. یوسا ایسه منیم کیتاب رف‌لریمده یاشاییر، من یاشادیقجا، یوسا دا بو رف‌لرده یاشاییب، بیر معلیم کیمی منه یول-یؤندم گؤستره‌جک.
یوسا اثرلری لاتین امریکا ادبیاتیندا چوخ سئودیییم و چوخ اؤیرندیییم اثرلردن اولوب. یازیچی‌‌لیق یولوندا اجتماعی مسئولیت داشیماق، ادبیاتدا سوسیال سورونلارا دقت یئتیرمک و رماندا سیاسی اتمسفر یاراتماغی ماریو بارگاس یوسا اثرلریندن اؤیرنمیشم. اونون اثرلری ادبیات یولومدا اؤنملی بیر یئر آلیب.
یوسانین اثرلرینی اوخومایان ادبیات یولچولاری بو ادبی خزینه‌دن محروم قالاجاقلار.
۱۴۰۴.۰۱.۲۵


https://t.me/ruqayyekabiri

آیاق اوستو یازیلار
دفینه و سایت ترافیکی
گون خبرلرینه گؤز دولاندیریرکن «کشوری بازنشسته‌»‌لر اوچون اللی میلیون تومن‌لیک وام خبری دقتیمی چکیر. وام خبری ترند اولماسا دا، اؤزونو دونیانین کلانتری سایان ترامپ‌‌‌ین تهدید خبرلریندن بئله اؤنه کئچمیش کیمی‌دیر.
اوجا سس ایله اؤزومله دانیشیرام: «دییه‌سن بو ایل صاندیق داها آرتیق کرامت گؤستریب، گون اوزو گؤرمه‌میش دفینه پایلایاجاق امکلی‌لره!!!»
بو اقتصادی دورومدا امکلی معاشی‌نین دؤرد قاتینی بیر یئرده الده ائتمک، بلکه ده امکلی‌لر اوچون دفینه ساییلیر.
اوزون ایللردیر دفینه ساییلان وامی الده ائدیب، سونرا دیزلرینی قوجاقلاییب، آی با آی، قیرتی-قیرتی معاشلاریندان قوپاریلان قیسط‌لاری سایماق، قیسط‌لارین اؤده‌نیشیندن همن سونرا یئنی بیر دفینه الده ائتمک اوچون اووجونو «بازنشستگی صاندیغینا» ساری اوزالتماق اؤلکه امکلی‌لر اوچون بیر حیات طرزینه دؤنوشوب.
لپ‌تاب اؤنونده دیرسکله‌نیب، هله الده ائتمه‌دیییم دفینه‌نی پای-بؤلوش ائدیرکن، اوچ ایل اؤنجه آلدیغیم اون‌بئش‌ میلیونلوق وام قیسط‌لارینین قورتولمادیغی یادیما دوشور. در حال وام‌دان نئچه قیسط قالدیغینی بیلمک اوچون موبایلیمدا صاندیغین صبا آدلی پلتفرومونو آچیرام. صبا «ترافیک سایت» آدلی بیر اعلان پایلاشیب. اعلانی اوخویورکن ندنسه ات-تویوق و «کالابرگ» صفینده بیربیرلریله دارتیشانلار، «من نوبت قویوب، گئتمیشدیم»دیین‌لر، دوست-تانیشی‌نین یئرینه زنبیل قویانلار، اقتصادی سورونلارین آجیغینی بیربیرلریندن چیخارانلار، حتی اللرینده پلاکارد اداره‌لرین اؤنونده حاقلارینی مطالیبه ائدن امک‌لی‌لر گؤزومون اؤنونه تیکیلیر.
پلتفورمدا «آیلیق» بؤلومونو آچیرام. هله آلتی آیلیق اؤده‌نیلمه‌میش قیسطیم قالیر. یئنه اوجا سس ایله دانیشیرام: «قیسمت اولسا ایلین ایکینجی یاریسیندا، بازنشستگی صاندیغی‌نین کرامتی منه ده شامیل اولاجاق.»
صندلیمین آرخاسینا یاسلانیب، گله‌جکده الده ائده‌جه‌ییم دفینه‌نی یئنیدن پای-بؤلوش ائدیرکن ندنسه یوز دؤرد تومن‌لیک دلار بیردن بیره بایراق سایاغی بئینیمه تاخیلیب، دالغالانماغا باشلاییر. بوتون نئشه‌ام پوزولور.
گؤره‌سن ایلین ایکینجی یاریسیندا، دفینه‌نی الده ائده‌جه‌ییم گونلر سیاست دالغالاری دلار قیمتینی هانسی سمته آپاراجاق؟!
۱۴۰۲.۰۱.۱۷

https://t.me/ruqayyekabiri

آیاق اوستو یازیلار
دفینه و سایت ترافیکی
👇👇👇