Suzgil ey,
Mudragan moziyni chayqat,
Elt bizni najotga, Nuhning kemasi!
Feruzdan, Munisdan, Ogahiydan ayt,
Ey turkiy tilimning tirik shevasi!

Shahriyor Shavkat

Sal kengroq boʻlmabmiz, buning isboti –
Hov Kalta Minorning choʻgirmasi yoʻq…

Senga tor keldi bu koʻkrak
Sevinching toshdi qirgʻoqdan
Tilim charchar ajab gohi
Seni tarjima qilmoqdan…

Usmon Nosir

Kiprigi koʻksiga soya solgan qiz

​​​​BOGʻDA

Koʻzim toʻldi,
Yuragim toʻldi
Sogʻinchlardan va alamlardan,
Tomogʻimga nedir tiqildi
...Va baqirib yubordim birdan!

Qoʻshnim menga qaradi choʻchib,
Novdadagi qush ketdi uchib.
- Meni «tentak» deb oʻylar qoʻshnim,
Lek bilmadim fikrini qushning.

M.Solih

She'r o'qimaydigan odamchalik yomonsan.

ОЧЛАР ҚЎШИҒИ

Аъёнга аёндир: тик турмас бўш қоп,
Эл-у юрт оч бўлса чиқмас Муқанна.
Агар овлай олса бирор товушқон
Қорнини тўйдирган шул даштлар жаннат.
Бизга шеър керакмас,
гап кирмас токи
Кулча еярканмиз қулоққа ўлчаб.
Очлик хира қилган кўзлар-ла ёки
Қила оласизми юлдузни мўлжал?!
Токай биз амаллаб сақлаймиз жонни
Меҳнатда тинимсиз урсак-да жавлон.
Қайтара олурми,
айтинг,
Туронни
Қорнидан каттароқ ғами йўқ авлод?!
Кўзимиз қабрдай чўкиб боради,
Юзимиз тўртбурчак,
ғишт каби теринг.
Фақат эвазига бизга қора бир
Парча нон,
ичишга қултум сув беринг.
Пиёз пўстлоғидай юпқа қорнимиз
Қулоғимиз узра чертганда танбур
Бой бермайлик дея совуқ ўрнимиз
Мақтаб келганимиз ўшал Ватан бу.
Ҳўв, ланжгина халқим, ёнма гулханда,
Сўнгги шиддатингни исёнга сарф қил.
Бу энгак остида қурқшаб ўлгандан
Инсонга отилиб кетмоқ шарафдир.

Нурмуҳаммад Абдузоир

Boʻsa

Gunoh kular edi ikki koʻzida,
yuzida oy nuri kulib turardi.
Kular edi ikki koʻzida gunoh.
Ul sokin lablarning guzargohida
kulib turar edi shula bepanoh.

Uyatchan va gung bir istakka lim-lim
nigohin qatida mastlik yashirin.
Boqib uning ikki koʻzida dedim:
Koʻtarish kerakdir ishqning hosilin.

Soyaning ustiga egildi soya,
tunning sir asragan xilvati – qora.
Bir nafas sirgʻandi gunoh yuzida,
bir boʻsa porladi ikki lab ora.

Furugʻ Farruxzod

Lablaringni burma menga qilma tamanno,
Oʻzgadadur meni koʻnglim sendamas aslo.
Atay sening derazangga egilganim yoʻq,
Seni izlab kelganim yoʻq tikilganim yoʻq.


Zor emasman senga faqat bu oqshom behos
Oʻta turib boqqim keldi darchangdan holos.

Sergey Yesenin

gʻoya muallifi kamina:)

https://www.instagram.com/reel/DHqBEHrNBry/?igsh=c2U3eHMzemI3anZ5

Kirsangizlar she’rlashamiz

Muallif: Odil Ikrom
Shoirni oʻzi oʻqigan

Одил Икром, бир томчи қуйинг,
Дўстим, бунча қийин ҳаёт дегани.
Бир томчига арзимайди бу бало.

Рауф Парфи

Aziz Said

Oh men bu she’rni mana shu yerda eshitganimda suyak-suyagimgacha ta’sir qilgandi. She’r odamga qanchalik ta’sir qilishini shunda anglaganman.

shoirni oʻzi oʻqigan

​​Agar hayot shu boʻlsa...

Restoranlar...
Barlar...
Musiqa...
Sassiq uryon boldirlar...
Toslar...
irkanch lablar...
Sigaretalar...
Harom-harish oʻpishlar...
Nahslar...
Shu hayotmi!..
Xiyonatlar...
Hasadlar...
Kinlar...
Siyosatlar...
Fitnalar...
Qonlar...
Gʻijimlangan tund qosh-qabogʻlar...
Tirsillagan siynalar...
Raqslar...
Bu nokaslar...
Bu baland-pastlar...
Shu hayotmi!..
Yiltillagan yuzlar...
Hovuzlar...
Shir yalangʻoch shahvoniy qizlar...
“Valet”, “Dama”, “Korol”lar, “Tuz”lar...
Mulozimlar...
Harom jiz-bizlar
Shu hayotmi!..
Dangʻillagan saroylar, koʻshklar,
oʻrkach-oʻrkach yelkalar toʻshlar,
oʻrgatilgan koʻppaklar qushlar,
it yotishlar, mirzaturishlar...
Shu hayotmi?!
Bir qoʻshnisi ochidan oʻlgan,
bir qoʻshnisin tomi toʻkilgan,
birin qaddi yetmish bukilgan,
oʻzi qonlar ichib quturgan...
Shu hayotmi?!
Bir koʻchada gadolar lak-lak...
Bir koʻchada “Toʻylar muborak!”
Birin oshi - ushogʻu turshak...
Birida yoʻq na nonu namak...
Shu hayotmi?!
Birovining xotini ajdar...
Birovi xas-xashakdan battar...
Birovi bu dunyoni qargʻar...
Birovi bu dunyoni yamlar...
Shu hayotmi?!
Bilolmadim, ey gʻarib boshim,
Bilmam, qirqqa kirdiyu yoshim...
Agar hayot shu boʻlsa tikka
tupurdim men uning betiga...

Asqar Mahkam

Menga ogʻir boʻlar - sen oʻlsang...
senga nima - oʻlsam - oʻlmasam.
Menga ogʻir boʻlar - yoʻq boʻlsang…
senga nima - boʻlsam-boʻlmasam.
Menga ogʻir boʻlar - yigʻlasang
yohud yesang yurak-bagʻringni…
Senga nima - jinni boʻlmasang
tashlab ketsam hatto shahringni…
Menga ogʻir boʻlardi - zorlab
topolmasang biror ostona…
Senga nima - tovonim qonab
boshim olib ketsam - devona...
Menga ogʻir boʻlardi bir kun
yuragingni teshsa bir er - qurt...
Senga nima - u qurt men uchun
butun umr yasasa tobut...
Menga ogʻir boʻlar - bu sochlar
oyogʻiga ilashsa uning...
Senga nima - jim-jit ogʻochlar
joni boʻlib qolsa jismimning...
Senga nima - shoiri dilxun
ketsa butkul uzoq va uzoq...
Menga esa kerakmas bir zum
sendan keyin bir zum yashamoq...

© Asqar Mahkam

@valfajr_01

Ataka

Oʻqim yetib poʻlat sovuting
teshib oʻtsa…
Lekin men oʻlsam;
oʻlsam – bagʻring boʻlsa tobutim,
oʻlsam – soching kafaning boʻlsa.

Barrikadang qulasa chil-chil,
qulasa-yu…
Lekin men oʻlsam;
oʻlsam – labing boʻlsa Azroil,
oʻlsam – koʻzing madfanim boʻlsa.

Osmoningni aviazarbam
tor-mor etsa…
Lekin men oʻlsam;
oʻlsam – koʻksing boʻlsa maqrabam,
oʻlsam – koʻngling vatanim boʻlsa.

Oʻlsam – kulging boʻlsa motamim,
boʻsang koʻmsa oʻng-u soʻlimni…
Menga,
jonim,
gulim,
hotamim,
ravo koʻrmaysanmi oʻlimni?!

Mansur Jumayev

Bir oʻtli tunlardan oʻtdi kunlarim,
bir oʻtli kunlarim kechdi kechamda…
Endi bosildimi u jununlarim?
Hecham-da!

U oʻtli kunlarni qoʻmsayman hanuz,
u yolqin oʻtlarda yongim keladi
va hanuz
hattoki sizga ham,
ey doʻst,
ishongim keladi.

Mansur Jumayev

taqlid etolmadim
senga vatanim
sen kabi
bardoshli boʻlolmadim hech
sapchib turgan boʻlsam
aybsitma meni
afu et
axir men bilolmadim hech
kechir sapchib turdim
ogʻir uyatdan
tarixidan judo boʻlgan
xalq kabi
kelajagi qora insoniyatday
eng soʻnggi lahzada turdim
men qalqib
turdim sapchib turdim
oʻzimga keldim
shakkok farzadingni
afu et Vatan
goʻzal kafanlarni
egnimdan yuldim
tushdim
sakrab tushdim
tilla tobutdan

Bir yonda ojizu
bir yonda kuchli
kurash boshlanarkan ta’rafma ta’raf
ojizning yonini olganing uchun
xoin deb nom olmoq
naqadar sharaf?
na sharafki
xalqini qul etgan podshoh
mening dushmanim deb
seni atasa
jazavaga tushsa
isming eshitgan chogʻ
kitobingni oʻqib yirtsa, toptasa
na sharafki
zulmga zulm deyolsang
boshingda har kuni
sinsada toʻqmoq
shaytondan qoʻrqmaslik
naqadar goʻzal
na goʻzal yagona allohdan qoʻrqmoq

shoirimizni bugun tugʻilgan kunlari edi

* * *
Қўшқўллаб тутаман сенга умримни,
юракни очаман шодлик ва ғамга.
«Мени севманг» дейсан ёниб, энтикиб,
сени севмоқликка маҳкум одамга...

Ошиқлик йўли бу - надомат йўли,
ошиқлик бахтидан умримда фусун.
Гоҳ шеърлар айтаман қаро кўзларинг,
гоҳида қоп-қора сочларинг учун...

Мен ёниб бораман, олдингга ёниб,
муҳаббат олови жондадир доим.
Нигоҳлар бир-бирин имлайди тинмай,
сўзлар бир-бирини топар мулойим.

Мен сени севаман, сени севаман!
борлиғим ўзингсан, ягонамсан, бас...
Меники эмасдир энди ҳаётим,
энди, бу юрагим ўзимникимас -
Сеники...
Сени севаман!

Раҳмат Бобожон

Kimgadir Muhammad Solihni kitobi kerak boʻlsa @misanthrope_boy ga yozishlariz mumkin. Bir tanishim iltimosiga binoan qoʻyyapman.

***
sevishgisi kelar shu on barchani
unga hamma tikilib qarar
qizcha “Begona”dan uzmas koʻzini

***
eshiklar yopildi
nigoh va sevgini
vagoniga qamadi metro

***
vagonlarga qamalgan
sevgi va nigoh
Beruniyda ketar ajralib

2025

Oʻylab qarasam kayfiyatimga mos she’r shu ekan hozir…

Afsus qoʻlim qonga botmagan
Lek oʻgʻirlik qilganman biroz
Bosh qahramon sizga yoqmagan
Raskolnikovga oʻxshayman oz-moz

Alyoshani sevmaysiz nechun
Axir arziydiku yillab oʻylashga
Men roziman mayli siz uchun
Alekseydek qimor oʻynashga

Yuxannes she’riga boʻlsamda iqror
Yuragim siqadi har kun qora tun
Kordeliya soʻzini qilsam gar takror
“Sevgim aytar soʻzimdan ustun”

Gaplashardik har kun siz bilan
Siz soʻraysiz Nitsshe rostmi deb
Bu dunyoda neki boʻlsa ham
Ikkimiz xudoni oʻldirmadik lek

Akbara bolasiz uyga qaytgandek
Yashang berib hayotga bardosh
“Qiyomatda” Avdiy aytgandek
Balki bizga xudo zamondosh

Ismoiliy

Labingdan òpaman, belingni qisib,
Sen esa jimgina sunasanku bòy...
Tanamga kiradi bir narsa sizib,
Gòyoki boshlanur vujudimda tòy...

Men uchun bittasan tanho, yagona,
Sendan hech kecholmam-kecholmam sira.
Izingda men bòlib gohi devona,
Chòntakda qolmaydi ba'zan yòlkira.

Kòp òtmay tanamga humor qilasan,
Beiloj men seni qilaman harid.
Meni sen òzinga tumor qilasan,
Padaringa ming la'nat asli sigaret.

Ismoiliy

@valfajr_01

Бахтсиз шаҳар юпун ухлайди,
Чанглар ютиб ухлар бояқиш,
Кир-чир, сочлари тўзғиган бола.

Рауф Парфи

Jomadoning tayyor edi.
Oʻlim esa … yonimda turib
Nafasimni sanardi tinmay.

Shams Langarudiy

Oʻlim degani bu –
Eng zarur paytda
Seni sevishimga
Imkom yoʻqligi.

Rasul Yunon

***

Ruhimda
Yashaydi qandaydir Qorbola,
U Quyoshni sevar begidir…
Va bu – hamma sevgi qissalarining
Eng qisqa tarixidir.

***
Qo‘g‘irchoqlar
Qarib qolmaydi.
Qizaloqlar –
Eng yaxshi onadir dunyoda.

***
Chizolmasdim shamol suratin,
Bo‘lmasaydi
Sening sochlaring.

***

Har safar
Tug‘ilgan kunimda
Sha’mlar ko‘proq
Yig‘lar men uchun.

Ehson PORSO

"Biroz jilmay" - deding...
Suratga tushirding,
indamay ketding.
Men esa...
yuribman
hanuz jilmayib.

Ehson Porso

1
Мен қўрқиб
Ортимга тисариламан,
Сенсиз узун умримни кўриб.
2
Силадилар гулнинг бошидан,
Ҳидладилар... Эркаладилар...
Сўнгра... Уздилар... авайлаб.
3
Лойда ўйнама, ўғлим,
Кўрмаяпсанми,
Онанг кир ювяпти.
4
Нега қушлар сайрамас,
Нега япроқлар шивирламайди,
Нега мен пальто кийиб олибман?

M.Solih

Бунда лойқа эмас сукунат –
Саслар чўкиб ётар қаърида.
Бунда мутлақ шаффоф табиат,
Мен ҳам софман унинг бағрида.
Ерлар тоза, осмонлар тоза,
Ёмғир ювган чангли майсани.
Қуртлар тоза, илонлар тоза –
Ўпиш мумкин ҳамма нарсани

@valfajr_01

Мен бунга ўзимни кўришга келдим,
Аммо мен йўқ эдим жийда тагида.
У пайт эртакларга ишонар эдим,
Учиб кетдиммикин эртакдагидай?
Балки мен ҳали ҳам ўша баҳорда
Юрибман қушларга егулик ташиб.
Балки "ҳалок" бўлдим қоронғи ғорда
Ўн бошли аждаҳо билан олишиб?...
Оҳ, учгим келади
Болалик томон,
Лекин на кўролдим, на унга тўйдим.
Учмоққа қанот ҳам йўқдир бу замон,
Чунки мен эртакка ишонмай қўйдим

@valfajr_01

Bir vaqtlar shunchaki qaygʻurardim, oh,
Bir vaqtlar shunchaki uhlamasdim men.
Shunchaki tun boʻyi yigʻlardim, ammo
Yoshligim, sen uchun yigʻlamasdim men…
Men endi, men endi shunday aftoda,
Na sajda qilgayman, na duoyibad.
Qoʻlimda porlaydi argʻuvon boda,
Yoshligim, yoshligim, sen unda faqat.

Rauf Parfi