"Мураббийнинг деганлари" сарлавҳали шеърим яна "Ватанпарвар"дек улуғ нашрнинг ҳам 1-саҳифасида гўзал тарзда босилибди! (Бунисидан бехабар эдим) Бунинг учун газета бош муҳаррири Аҳрор Очиловга ташаккурларим! 🙏

Дарвоқе, шундай оғир шароитда газета 33 376 нусхада чоп этилаётганининг ўзи жасоратдир!

"Мураббийнинг деганлари" сарлавҳали шеърим энди "Чирчиқ тонги" газетасининг 1-саҳифасида ажойиб тарзда босилди! Бунинг учун нашр бош муҳаррири Ирода опамга раҳмату ташаккурларим! 💐

"Мураббийнинг деганлари" сарлавҳали шеърим Республикамизнинг биринчи рақамли нашрида чоп этилди. Устоз Ўткир Раҳматга ва шунга сабабчилардан бўлган журналист Отабек Исроилга ташаккурларим!🙏🙏🙏

Ифтихор

МУРАББИЙНИНГ ДЕГАНЛАРИ

Футбол бўйича 17 ёшлилар ўртасида ўтказилган Осиё чемпионатида Ўзбекистон терма жамоаси финалда мезбонлар Саудия Арабистони ёшларига қарши тўп тепди. Ўйиннинг биринчи таймидаёқ ҳакамлар бизнинг икки нафар футболчимизни майдондан четлатди. Ўн беш дақиқалик танаффусга ёшларимиз руҳий оғриқ билан чиқди. Бироқ шундай ўта мураккаб паллада бош мураббий Исломбек Исмоилов барча юкни ўзига олиб, болаларни уйғотувчи сўзлар айтди.

Шикоят бефойда – бўлди бўлар иш,
Бу ёғига бардам турмоқлик керак.
Керакмас десангиз мабодо кумуш –
Гол ўтказишмас, гол урмоқлик керак!

Бандаси доимо бўлолмас холис,
Сотиб олиш мумкин барча одамни.
Каъбада турса ҳам Каъбадан олис
Ҳакамга эслатинг Олий Ҳакамни!

Тўққиз кишимиз деб сиқилманг зинҳор,
Ўқинг “Тарих” деган китобни бир-бир.
Ўн икки минг қўшин билан улуғвор
Юз минг аскарни ер тишлатган Бобур!

Ҳамон тўп юмалоқ – текисдир майдон,
Биттангиз, шубҳасиз, ўнга татийсиз!
Дарс бериб қўйинг арабга, зотан –
Ҳар бирингиз битта Замахшарийсиз!

Қонингизда оқар кўҳна жасорат,
Интилган инсонга толе ҳам ёрдир.
Уддалаб бўлмасдек кўринар гарчанд –
Ўлимдан бошқасин иложи бордир.

Бизга қадалгандир дунёнинг кўзи,
Ўйнанг ўзни босиб, жилмайиб-кулиб...
Шундай зафар қучинг – рақибнинг ўзи
Сизни табрикласин биринчи бўлиб!

Эй миллат кўксида унган лолалар,
Ҳақиқат синмагай, гарчи букилди.
Бу шунчаки кубок эмас, болалар,
Ўйинга ўзбекнинг ори тикилди!

Ҳа, айтганча, ўртоқ Неъматуллоҳжон,
Дарвозани ёпинг – қил ҳам сиғмасин.
Омад кулиб, агар бўлсак чемпион –
Қошни қимирлатиш эсдан чиқмасин!

Тақдирда бўлмайди эрта ёки кеч,
Бошида йиғлатса, охир кулдиргай.
Икки киши каммиз дея қўрқманг ҳеч –
Бирин халқ, бирини Худо тўлдиргай!

Ватан деб рақибни енгдингиз кўплаб,
Майли, ота-она, дўст-ёрни ўйланг.
Энди бир илтимос, бор кучни тўплаб,
Мураббийлар учун, мен учун ўйнанг!

Бирлашинг – бир бўлинг, бир жон – бир нафас,
Ҳеч кимни айбламанг, қилманг оҳу зор.
Ва охирги сўзим — сиз тўп тепинг, бас,
Худога ишонинг! У, албатта, бор!

Зоҳиджон ОЛОВ,
Ўзбекистон Ёзувчилар уюшмаси аъзоси.

21.04.2025


@zohidjon_olov

***
Қорнимас, қадрига жилайди бу эл,
Дунёга омонлик тилайди бу эл.
"Етимман", деб кўз ёш тўкиб турса гар —
Иблиснинг ҳам бошин силайди бу эл...

Assalomu alaykum!

Рамазон ҳикматлари

***
Ким бахтдан, ким эса дарддан фориғдир,
Дунё дарвешлардан қолган чориғдир.
Эртага бормисан, атрофингга боқ —
Кеча юрган одам бугун тарихдир.

***
Ўзи фақир — олийҳиммат одамлар —
Муҳаммадга асил уммат одамлар.
Оҳ, қанчалар ғариб, қанчалар юпун
Ўзидан пайпоғи қиммат одамлар.

Зоҳиджон ОЛОВ

Toshkent viloyati, Parkent tumani Changi qishlogʻi ichki yo‘llarni ta’mirlashga ovoz bering! 🗳

Hurmatli hamqishloqlar

Parkent tumanining Olmazor MFY hududida ichki yo‘llarni ta’mirlash va asfaltlash ishlari rejalashtirilmoqda. Loyihaning maqsadi hududimizdagi quyidagi yo‘llarni yaxshilash va xalqimiz uchun qulay transport tizimini yaratish:

- 2777 m uzunlikdagi ichki yo‘llarni asfaltlash

Bu tashabbusni amalga oshirishda sizning ovozingiz muhim! Ochiq budjet loyihasidagi ushbu tashabbusni qo‘llab-quvvatlash uchun quyidagi havolaga o‘ting va ovoz bering:
[Ovoz berish uchun👇👇👇☝️ havola]https://openbudget.uz/boards/initiatives/initiative/50/7efe05e1-0ca4-4c58-b317-82d47bd1bad4.


Sizning ovozingiz Changi qishlogʻi yo‘llarni yaxshilash uchun katta hissa qo‘shadi. Keling, birgalikda shahrimizni yanada obod qilaylik!

Бир мухлиснинг илтимоси билан ёзилганди. Бугун топиб олдим. Ўқиб кўрсам, ёмон чиқмаган экан.

МУАЗЗАМХОН

Учрашувга келдим яна кўксимда чўғ,
Ногоҳ эсса шамолга ҳам урарман дўқ,
Дилга тугиб юрмайман ҳеч, кераги йўқ,
Келасизми-келмайсизми, Муаззамхон.

Гул узатсам қовоқ уйиб, қилманг араз,
Тингланг дилим изҳорини сиз бир нафас,
Тўкмасангиз бўлди кўз ёш, муҳим эмас,
Куласизми-кулмайсизми, Муаззамхон.

Кунда юз бор кўчангизда кезишимни,
Атрингизни юз чақримдан сезишимни,
Мен севаман, менга нима – севишимни
Биласизми-билмайсизми, Муаззамхон.

Хаёлингиз хаёлимни айлаган банд,
Кўнглим ҳам тўқ, ишқим ҳалол, бошим баланд,
Мен сиз билан! Қизиғи йўқ, сиз мен билан
Бўласизми-бўлмайсизми, Муаззамхон.

Йўлда қолсам ташналигим ҳаддан ошиб,
Эшитсангиз, дайди еллар хабар ташиб,
Бир дарёдай, Сирдарёдай шошиб-тошиб,
Тўласизми-тўлмайсизми, Муаззамон,
Келасизми-келмайсизми, Муаззамхон?

14.08.2017

ДИЛБАРИМ

Заҳириддин Муҳаммад Бобур ғазалига мухаммас

Дилбаримнинг оғзи игна кўзидин ҳақдор эмиш,
Ғунчадек бу дилчаси оғзидин ҳам тор эмиш,
Ул санамнинг ишқи ишқу, бизники бекор эмиш,
Олди кўнглумни, соғиндимким, манга дилдор эмиш,
Билмадим, бу навъ мендин ул пари безор эмиш.

Кўзи тушмасдан кўзимга ҳар дамим эрди сафо,
Ҳеч табиб билмас, ажаб, қай дардга бўлдим мубтало,
Бу жиноятларга, эй воҳ, йўқми қонунда жазо?!
Ошиқ ўлғоч кўрдум ул шамшод қаддин – юз бало,
Аллоҳ-Аллоҳ, ишқ аро мундоқ балолар бор эмиш!

Тингласа оҳимни, тинмай ҳасби ҳол айлар эдим,
Кутмайин кун ботишин, кундуз висол айлар эдим,
Телбаликда бир эмас, минг Қайсни лол айлар эдим,
Илтифот этмаслигин бози хаёл айлар эдим,
Эмди билдимким, анга мендин бу янглиғ ор эмиш.

Ўзидан тутмиш нари ул бизни бора-борае,
Сўзи ҳам оғу мисоли дилни этгай ёрае...
Кўзлари сочган қаҳрдан жисму жоним порае,
Ул пари ишқида йўқ ўлмоқдин ўзга чорае,
Чун ўзи – қотил, сўзи – муҳлик, кўзи – хунхор эмиш.

Гарчи истак-орзуси – дилрабо ишқ аҳлининг,
Топгани ҳижрону ғам, жабру жафо ишқ аҳлининг,
Шул сабаб толеи йўқ, тонги қаро ишқ аҳлининг,
Ҳусн аҳли, эй кўнгул, олам аро ишқ аҳлининг
Кўнглини сохлар эмиш, ҳар кимгаким, дилдор эмиш.

Ҳусни хулқ аҳлига талпин, қуллуқ айла дам-бадам,
Неники сирти музайян – билки, ёлғон унда жам,
Зоҳидо, фарқига бор ким муҳтарам, ким муттаҳам —
Ул вафосиз ёрдин чекмак не, яъни мунча ғам,
Ҳусн аҳли чунки, Бобур, дуняда бисёр эмиш.

2025 йил 12 февраль

Зоҳиджон ОЛОВ


@zohidjon_olov