АКШнын президенти Дональд Трамп жакында 185 мамлекетке карата жаңы импорттук пошлина - бажы алымдарын киргизүү боюнча билдирүү жасады.

Бул жаңылык дүйнөлүк соода мейкиндигинде чоң резонанс жаратты.

Өзгөчө чакан жана Кыргызстан сыяктуу экономикасы тышкы соодага көз каранды мамлекеттер үчүн кандай коркунучтарды же мүмкүнчүлүктөрдү жаратышы мүмкүн?

“Детектор” берүүбүздүн алкагында анализдеп көрөбүз.👉

Кыргызгидромет борбору билдиргендей, 24-апрелде түнкүсүн Чүй, Ош, Жалал-Абад, Баткен, Ысык-Көл, Нарын облустарынын айрым жерлеринде жаан жаап, күн күркүрөйт.

Күндүз Ысык-Көл, Чүй, Нарын, Ош облустарында жаан жаайт, калган аймактарда жаан-чачын күтүлбөйт.

Батыштан келген шамалдын ылдамдыгы секундасына 4-9 метрге жетет.

АБАНЫН ТЕМПЕРАТУРАСЫ:

Чүйдө түнкүсүн +4…+9, күндүз +19…+24; Таласта түнкүсүн +2…+7, күндүз +17…+22; Баткен, Ош, Жалал-Абадда түнкүсүн +5…+10, күндүз +20…+25; Ысык-Көлдө түнкүсүн +1…+6, күндүз +11…+16;

Нарында түнкүсүн +1…+6, күндүз +9…+14; Бишкекте жаан-чачын болбойт. Түнкүсүн +7…+9, күндүз +21…+23 градус жылуу.

‼️Түркиянын Стамбул шаарында түштө катуу жер титирөө болгону кабарланды.

TRT Haber басылмасынын маалыматына ылайык, жер титирөө Мармара деңизинин бардык аймагында сезилди. Сейсмологдордун айтымында, күчү 6,2 баллга жеткен.

Жабыркагандар же башка кыйроолор тууралуу маалымат бериле элек.

Эске салсак, Түркияда 2023-жылдын февралында катуу жер титирөөлөр болгон. Анда каза болгондордун саны 45 миңден ашкан.

📍Патент системасы эки айдын аралыгында кайра иштей баштайт

Мамлекеттик салык кызматынын төрагасы Алмамбет Шыкмаматов салык төлөөдө патент системасы чакан жана орто бизнеске эки айдын аралыгында кайтарыларын билдирди.

Ал Талас облусунда салыкчылар менен жолугуп, президент Садыр Жапаров салык системасын жеңилдетүү тууралуу жарлыктарга кол койгонун, өкмөт эми мыйзам долбоорун даярдап, Жогорку Кеңешке киргизерин айтты. Андан кийин долбоор парламенттин кароосунан өтөт. Шыкмаматов кошумчалагандай, эки айда патент системасы кайтарылат.

Кыргызстанда 2024-жылдын 1-июлунан баштап патент жоюлуп, көзөмөл-кассалык машинаны (ККМ) колдонуу милдеттендирилген.

Жалдануу иши: Бишкектеги “Орус үйү” кызматкеринин кармалышы боюнча комментарий берди

Бишкектеги Орусиянын илим жана маданият борбору (Орус үйү) кызматкери Наталья Секеринанын кармалышы боюнча билдирүү таратты.

Уюмдун маалыматында айтылгандай, Наталья Секерина Кыргызстандын жараны, 2024-жылдын июль айынан бери «Орус үйүндө» иштейт. Ага коюлган айыптар боюнча так маалымат жок.

Орусиянын илим жана маданият борбору өкмөттөр аралык келишимде аныкталган алкакта гана иштей турганын кошумчалашты.

17-апрелде Улуттук коопсуздук мамлекеттик комитет Оштогу “Орус үйүнүн” кызматкери Наталья Секеринаны жалданма адамдарды тартуу боюнча иштин алкагында кармаган.

Бишкектин Биринчи Май райондук соту аны 17-июнга чейин камакка алган.

Бул иш боюнча жалпы төрт адам кармалганы, анын ичинде Ош шаардык мэриясынын басма сөз кызматынын кызматкери Сергей Лапушкин да бар экени маалымдалган.

🇹🇲🇰🇬Садыр Жапаров менен Гурбангулы Бердымухамедов жолугушту

Түркмөнстандын Халк Маслахатынын төрагасы Гурбангулы Бердымухамедов Борбор Азия өлкөлөрү боюнча сапарынын алкагында Кыргызстанга иш сапары менен 22-апрелде келди.

Бердымухамедовду "Ысык-Көл" эл аралык аэропортунан Кыргызстандын президенти Садыр Жапаров тосуп алды.

Сапардын алкагында Садыр Жапаров менен Гурбангулы Бердымухамедовдун эки тараптуу сүйлөшүүлөрү өттү.

Тараптар соода-экономикалык кызматташтыкты, маданий-гуманитардык байланыштарды жана аймактык демилгелерди талкуулашты.
Садыр Жапаров Кыргыз-Түркмөн өнүктүрүү фондун түзүүнү сунуштады.

Гурбангулы Бердымухамедов түркмөн тарап Кыргызстан менен соода, газ, энергетика, транспорт, маданият жана билим берүү тармагында жигердүү кызматташууга умтуларын айтты.

Депутат Камила Талиева министрлер кабинетинин төрагасынын орун басары, УКМКнын башчысы Камчыбек Ташиевге ыраазычылык билдирди.

Ал 23-апрелде Жогорку Кеңештин жыйынында ондогон аксакал Камчыбек Ташиевге парламентте ыраазычылык айтуусун суранышканын белгиледи.

УКМК төрагасы Камчыбек Ташиев өткөн аптанын соңунда Баткенде эл менен жолугушуп, чек аранын сызыгын чийүү иштери башталарын айткан.

Ал өзү да жакын арада Баткенге көчүп барып, ишти жеринен көзөмөлдөй турганын билдирген.

УКМК төрагасы Камчыбек Ташиевге 2022-жылы сентябрда президент Садыр Жапаров "Кыргызстандын баатыры" наамын ыйгарган.

📍Ипотекалык үй: Мугалим менен дарыгерлерге өзүнчө тизме түзүү сунушталды

Жогорку Кеңештин депутаты Элдар Абакиров мамлекеттик ипотекалык компаниядан үй алууда мугалимдер менен дарыгерлерге өзгөчө тизме түзүүнү сунуштады.

Ал Кыргызстанда орточо айлык акы 40 миң сом болсо, мугалимдердин орточо айлыгы 26 миң сом экенин мисал келтирди.

Айлыктын аздыгынан көптөгөн мугалим жана дарыгерлер өз алдынча үй сатып алууга акча топтой албай жатышат.

Мамлекеттик ипотекалык компанияда узун кезек болгондуктан алар үчүн өзүнчө кезек түзүүнү суранышууда.

Каржы министрлиги 2025-жылы мугалимдердин айлыгы көтөрүлбөй турганын билдирген.

Жогорку Кеңештин депутаты Дастан Бекешев курулушту баштап коюп, аягына чыгарбай бирок элдин акчасын алган курулуш компанияларга тышкы башкаруу киргизүүнү сунуштады.

Ал акчасын берип, батири бүтпөй жаткан жарандардан кайрылуулар дагы деле көп түшүп жатканын билдирди.

Депутаттын пикиринде шылуун курулуш компанияларга тышкы башкаруу киргизсе, алардын жетекчилерин жоопко тартууга же маселени чечүүгө болот.

"ПолитКлиника" медиасы "Биздин көчөдө" подкастын сунуштайт.

Бул жолку коногубуз ишкер Эмил Үмөталиев болду.

Подкастты ютуб каналыбыздан көрүңүз. Шилтеме 👇

https://youtu.be/dEgr4fGCMTw?si=5FnI7YQDEos-PlBV

Нуржан Шайлдабекова Кыргызстандын Австриядагы элчиси болуп дайындалды.

Ошондой эле Европа кызматташтык жана коопсуздук уюмундагы Кыргызстандын туруктуу өкүлү кызматын аткарат.

Тиешелүү Жарлыккка президент Садыр Жапаров кол койду.

Нуржан Шайлдабекова буга чейин Борбордук шайлоо комиссиясын жетектеп келген. Бул кызматтан быйыл февралда бошотулган.

23-АПРЕЛДИН АБА ЫРАЙЫ

Кыргызгидромет борбору билдиргендей, 23-апрелде өлкөнүн көпчүлүк аймагында жаан жаап, күн күркүрөйт. Бийик тоолуу райондорго кар түшөт.

Батыштан келген шамалдын ылдамдыгы секундасына 4-9 метрге жетет.

‼️Ошто сүрдүрүлө турган 28 үйдүн ээлерине кенемте төлөнөт

Ош шаарында жаңы жолдун курулушуна байланыштуу үйлөрү бузула турган жарандарга кенемте төлөнөт. Тиешелүү буйрукка 21-апрелде министрлер кабинетинин төрагасы Адылбек Касымалиев кол койгонун «Эркин-Тоо» гезити билдирди.

Ош-Бишкек унаа жолун Т.Турсунбаев көчөсү менен байланыштырган 599 метр узундуктагы төрт тилкелүү жол салынат.

Долбоорду ишке ашыруу үчүн жолду кеңейтүү зонасында жайгашкан 28 жеке үй буздурулушу керек. Буга чейин менчик ээлеринин чыгымына көз карандысыз баа берилип, келтирилген зыяндын көлөмү аныкталган. Компенсациялык төлөмдөргө республикалык бюджеттен 69,8 миллион сом бөлүнөт.

Жусуп Баласагын атындагы Токмок лицейинин бүтүрүүчүсү Эмилбек Бакиров АКШ, Катар жана Канаданын алдыңкы университеттерине толук каржылоо менен кабыл алынды.

Бул тууралуу Билим берүү жана илим министрлиги билдирди.

Каржылоонун жалпы суммасы 476 миң долларды түзөт. Анын ичинде учуу жана жашоо чыгымдары да каралган.

Эмилбек Бакиров Carnegie Mellon University Qatar университетин тандаган.

Carnegie Mellon University Qatar — АКШнын эң мыкты изилдөө университеттеринин бири болгон, дүйнөгө таанымал Carnegie Mellon Universityнин эл аралык кампусу.

Университет компьютердик технологиялар жана бизнес тармагындагы жетишкендиктери менен белгилүү. Анын бүтүрүүчүлөрү дүйнөлүк ири компанияларда жогорку кызматтарды ээлеп келишет.

📢«ПолитКлиника» медиасы «Биздин көчөдө» аталышындагы подкаст чыгара баштайт.

Биринчи чыгарылыш бүгүн кечки саат 20:00дө биздин ютуб каналыбызга жарыяланат.

Подкастыбыздын алгачкы коногу ишкер Эмил Үмөталиев болмокчу.

Ютуб каналыбызга шилтеме��
https://youtube.com/@politklinika_kg?si=emP6YEPe96vBmN02

📌Уюлдук телефондорду каттоону бекер кылуу сунушталды

Мобилдик телефондорду каттоону мамлекет өзүнө алып, бекер болушу керек.

Мындай сунушту депутат Дастан Бекешев парламенттин тармактык комитетинин 22-апрелдеги жыйынында айтты.

Депутат азыр мобилдик телефондорду каттап жаткан менчик компания ар бир телефонду каттоодо 600 сомдон алып жатканын айтып, жарым жылда 180 млн сом киреше табышкан айтты.

21 млн сом киреше салыгын төлөшкөн. Бирок компания канча телефон жана жабдык катталганы тууралуу маалымат берген эмес.


Кыргызстанда 2024-жылдын июнь айынан баштап мобилдик телефондорду каттоо иши менен “Инмобайлс” компаниясы алектенет.

Аталган компания 2021-жылы каттоодон өткөн. Уюлдук телефонду каттатуу үчүн 600 сом төлөш керек.

Санариптик өнүктүрүү министри Азамат Жамангулов телефондорду каттоону министрлик өзүнө алууга даяр экенин, эгер ушундай тапшырма берилсе жасай алышарын билдирди.

Айжамал Жаныбекова аттуу жаран бир канча жыл мурун ажырашкан жолдошу балдарына зомбулук көрсөткөнүн Инстаграм баракчасына жарыялады.

"ПолитКлиника" медиасы бул боюнча эки тараптын жообун укту.👉

22-апрелде көпчүлүк аймакта жаан жаап, күн күркүрөйт.

Бийик тоолуу райондорго кар түшөт.

Батыштан келген шамалдын ылдамдыгы секундасына 4-9 метрге жетет. Кененирээк видеодо. 👉

Президент Садыр Жапаров расмий сапары менен Бахрейнге барды.

21-апрелде мамлекет башчынын учагы Манама шаарындагы «Бахрейн» эл аралык аэропортуна конду.

Садыр Жапаровду Бахрейн Королдугунун тышкы иштер министри Абдуллатиф бин Рашид Альзаяни жана башка расмий адамдар тосуп алышты.

Расмий сапардын алкагында президент Садыр Жапаров Бахрейндин башчысы Хамад бин Иса Аль Халифа жана башка расмий өкүлдөрү менен кызматташуу маселелерин талкуулоо үчүн сүйлөшүүлөрдү өткөрөт.

Тараптар кыргыз-бахрейн кызматташтыгын, соода-экономикалык, маданий-гуманитардык жана башка тармактардагы кызматташтыкты талкуулайт.

Бир катар документтерге кол коюлат.

Белгилей кетсек, бул Кыргызстандын президентинин Бахрейн королдугуна жасаган биринчи расмий сапары.

Жалпы республикалык тестирлөөнүн мөөнөтү белгилүү болду👉

📌2026-жылы бийик тоолуу шарттарда жашаган үй-бүлөлөргө кандай жөлөк пул берилет?

Жогорку Кеңештин Социалдык саясат боюнча комитетинин 21-апрелдеги жыйынында депутат Рустамбек Советбек уулу бийик тоолуу жана барууга кыйын аймактарда жашаган үй-бүлөлөрдүн 3 жашка чейинки балдарына жөлөк пул төлөнөбү деген суроону койду.

Эмгек министрлигинин өкүлүнүн айтымында, мамлекет жөлөк пулдун бул түрүн 2026-жылдан тарта төлөп берүүнү пландоодо.

Ал бийик тоолуу жана оор шарттарда жашаган 3 балалуу үй-бүлөлөргө кирешесине карабай төлөнөт. Төлөмдөр бала 3 жашка чыкканга чейин берилип, андан кийин токтотулат.

Алдын ала эсеп боюнча жөлөк пулдун өлчөмү 3000 сомду түзөт.
Депутат аны 5 миң сомго чыгарууну сунуштады.

Эмгек жана социалдык камсыздоо министри Равшан Сабиров 2027-жылдан тарта бийик тоолуу жана барууга кыйын аймактардагы көп балалуу үй-бүлөлөргө да жөлөк пул төлөнөрүн эскертти:
Төртүнчү бала төрөлгөндө – 100 миң сом, жетинчи балага – 1 миллион сом, онунчу балага – 2 миллион сом төлөнөт.

Бишкектин Биринчи Май райондук сотунун чечими менен активист Тилекмат Кудайберген уулу 19-майга чейин камакка алынды.

Соттун мындай чечими 21-апрелде чыгарылды.

Улуттук коопсуздук мамлекеттик комитети 19-апрелде эл аралык издөөдө жүргөн Кыргызстандын жараны Тилекмат Кудайберген уулун Бириккен Араб Эмираттарынан Кыргызстанга жеткирген.

Ал конституциялык түзүлүштүн негиздерине каршы бир катар оор кылмыштарды жасаган деп шектелүүдө.

УКМКнын маалыматына караганда, Тилекмат Кудайберген уулу чет өлкөдө жүргөндө өзүнүн шериктери менен бирге социалдык түйүндөрдөгү көптөгөн аккаунттар аркылуу
Кыргыз Республикасында бийликти басып алуу аракети менен массалык баш аламандык уюштурууга чакырган чагымчыл билдирүүлөрдү жана видео кайрылууларды такай жарыялап турган.

Учурда анын кылмыштуу байланыштарын аныктоо жана кармоо боюнча тиешелүү ыкчам-иликтөө иш-чаралары жүргүзүлүүдө.

Тергөө иштери Кыргыз Республикасынын аймагында да, өлкө чегинен тышкары жерлерде да жүрүүдө.

Мамлекеттик кызматкерлер кыргыз тили боюнча сынак тапшырат

Жакынкы эки жылда саламаттыкты сактоо жана билим берүү тармагынын кызматкерлери, мамлекеттик жана муниципалдык кызматкерлердин кыргыз тилин билүү деңгээли текшерилет.

Тиешелүү жарлыкка “Мамлекеттик тил жөнүндөгү” мыйзамдын негизинде Министрлер кабинетинин төрагасы Адылбек Касымалиев кол койду.

Мамлекеттик жана муниципалдык кызматкерлер быйыл кыргызчаны В1 (орто) деңгээл боюнча, 2027-жылы В2 деңгээлинде (ортодон жогору) билүүсү боюнча сынак берет.

Саламаттыкты сактоо жана билим берүү, илимий кызматкерлер 2026-жылы В1 деңгээли боюнча сынак тапшырат.
2028-жылы В2 деңгээлинде мамлекеттик тилди билүүсү текшерилет.

Кыргызстандын бокс боюнча улуттук курама командасынын мүчөлөрү Американын Колорадо штатынын Пуэбло шаарында өткөн мелдеште 6 медаль - 4 алтын, 1 күмүш, 1 коло утушту.

Алтын медалын ээлери:

🥇50 кг Анвар Ходжиев;
🥇55 кг Зафарбек Камилов;
🥇60 кг Мунарбек Сейитбек уулу;
🥇70 кг Ихтияр Нишанов

Күмүш медалдын ээси:
🥈70 кг Элдар Турдубаев;

Коло медалдын ээси:
🥉65 кг Алмаз Орозбеков;

Курама команда башкы машыктыруучу Данияр Төлөгөн уулу жана улук машыктыруучу Акыйкат Абаевдин жетекчилиги алдында мелдешке катышты.

‼️УКМК активист Тилекмат Күрөңов Кыргызстанга жеткирилгенин билдирди

Бүгүн, 19-апрелде Улуттук коопсуздук мамлекеттик комитети ыкчам-иликтөө иш-чараларынын натыйжасында эл аралык издөөдө жүргөн Кыргызстандын жараны Тилекмат Күрөңовду Бириккен Араб Эмираттарынан Кыргызстанга жеткирди.

Ал конституциялык түзүлүштүн негиздерине каршы бир катар оор кылмыштарды жасаган деп шектелүүдө.

УКМКнын маалыматына караганда, Тилекмат Күрөңов чет өлкөдө жүргөндө өзүнүн шериктери менен бирге социалдык түйүндөрдөгү көптөгөн аккаунттар аркылуу Кыргыз Республикасында бийликти басып алуу аракети менен массалык баш аламандык уюштурууга чакырган чагымчыл билдирүүлөрдү жана видео кайрылууларды такай жарыялап турган.

Учурда анын кылмыштуу байланыштарын аныктоо жана кармоо боюнча тиешелүү ыкчам-иликтөө иш-чаралары жүргүзүлүүдө.

Тергөө иштери Кыргыз Республикасынын аймагында да, өлкө чегинен тышкары жерлерде да жүрүүдө.

#БулЖумада: Атамбаев күнөлүү деп табылды, башаламандык уюштурам дегендер кармалды, шайлоо күнү белгиленди.

Бул жана башка маанилүү окуялар тууралуу видеодо баяндалат. 👉

Улуттук коопсуздук мамлекеттик комитетинин төрагасы Камчыбек Ташиев Баткен облусунун тургундары менен жолугушту.

Анда кыргыз-тажик чек арасын делимитациялоо иштери жакында башталарын билдирип, өзү жакын арада Баткенге көчүп барарын кошумчалады.

“Альхамдулиллах” Telegram каналында "акча көбөйтүп алдым" деген адамдардын жүздөгөн видеолору жарыяланган, ал жерде азыр 9 миңге жакын катталуучу бар.

Видеодогу адамдар чын эле акчаларын көбөйтүп алаганбы? Бул видеодо айтып беребиз. 👉

Эртең Ош, Жалал-Абад, Баткен, Ысык-Көл, Нарын облустарынын көпчүлүк аймактарында, Чүй, Талас облустарынын айрым жерлеринде жаан жаап, күн күркүрөйт.

Абанын температурасы көпчүлүк аймакта төмөндөйт.

Толук маалымат видеодо.

Сириянын бийликтен кулатылган президенти Башар Асад Орусияга качып баратканда төрт учакка акча жана баалуу буюмдарды ала кеткен.

Бул тууралуу Reuters маалымат агенттиги билдирди.

Сириянын мурдагы лидерин эвакуациялоо боюнча атайын операциянын жүрүшүндө 500 миң долларга жакын накталай акча, маанилүү документтер, ошондой эле жашыруун маалыматтар камтылган ноутбуктар жана дисктер чыгарылганы айтылат.

Башар Асадды эвакуациялаган учак анын бийлигинин кулашына эки күн калганда Дамаск менен Абу-Даби ортосунда бир нече жолу каттам жасаган.

2024-жылдын 8-декабрына караган түнү Сирияда Башар Асаддын режими кулаган. Ал Сириядан чыгып кетип, кийин үй-бүлөсү менен Москвада экени белгилүү болгон.

Быйыл март айында Сириянын убактылуу лидери Ахмед аш-Шараа Орусиядан Башар Асадды өткөрүп берүүнү талап кылган.

Бишкек мэриясынын муниципалдык инспекциясы "Ош базарынын" айланасындагы башалман соодага каршы текшерүүнү улантууда.

17-апрелде Бейшеналиева көчөсү менен Рыскулов көчөсүнөн Москва көчөсүнө чейин иштер жүргүзүлдү.

Рейддин жүрүшүндө туш келди жерге соода жайын куруп алгандарга протоколдор түзүлдү.

Айрым соодагерлер инспекциянын кызматкерлерине каршылык көрсөттү.

Салык кызматы 16-апрелден тарта айрым жеке ишкерлерди жана патент менен иштеген жарандарды Бирдиктүү салык декларациясын тапшыруудан бошотту.

Алар кимдер? Кененирээк сүрөттөрдө👉

‼️Сот журналист Канышай Мамыркулованын батирин камакка койду

Эркин журналист жана активист Канышай Мамыркулованын Бишкектеги батири камакка коюлду.

Мындай чечимди 17-апрелде Бишкектин Свердлов райондук соту чыгарды.

Жактоочу Нурбек Сыдыков “ПолитКлиникага” тастыктагандай, журналисттин батирин камакка коюу өтүнүчү сотко Ички иштер министрлигинин тергөөчүсү берген.

Канышай Мамыркулованы милиция 20-мартта кармап кеткен.

Ага фейсбуктагы баракчасына жазган билдирүүлөрүнө байланыштуу Кылмыш-жаза кодексинин 278-беренеси (“Массалык башаламандыктар”) жана 330-беренеси (“Расалык, этностук, улуттук, диний же региондор аралык кастыкты (араздашууну) козутуу”) менен айып коюлган.

Муратбек Азымбакиев Президенттин Администрациясынын тышкы саясат бөлүмүнүн башчысы кызматынан бошотулду.

Тийиштүү Жарлыккка президент Садыр Жапаров кол койду.

Муратбек Азымбакиев тышкы саясат бөлүмүн 2022-жылдын май айынан бери аркалап келди.

Анын ордуна өлкө башчынын дагы бир Жарлыгы менен Сагынбек Абдумуталип президенттин администрациясынын тышкы саясат бөлүмүнүн башчысы болуп дайындалды.

Мамлекетке жана бизнеске туура чечим кабыл алуу үчүн так маалымат керек. Мындай маалыматтарды чогултуу жана талдоо менен Evidence компаниясы алектенет.

Бул компания буга чейин 50дөн ашуун изилдөө жүргүзгөн.

Ал кандай изилдөө десеңиз, видеону толук көрүңүз 👉

@evidence

18-апрелде Чүй, Ош, Жалал-Абад, Баткен, Ысык-Көл, Нарын облустарынын көпчүлүк аймактарында, Талас облусунун айрым жерлеринде жаан жаайт.

Кененирээк видеодо. 👉

Саламаттыкты сактоо министрлиги Бишкектеги негизги ооруканаларды шаардын сыртына көчүрүүнү сунуштады.

Борбор калаанын түштүк-чыгышындагы Кара-Жыгач айылына жакын жердеги 106 гектар жерге жаңы медициналык шаарча куруу пландалууда.

Кайсы ооруканалар көчүрүлүшү мүмкүн?

Кененирээк сүрөттөрдө 👉

26-апрель күнү Чүй облусунун Беш-Күңгөй айылында курулган «Достук Арена» футбол стадионунун ачылышы болот.

Бул стадион өлкө эгемендик алгандан бери толугу менен жаңыдан курулган алгачкы стадион.

1-майдан 11-майга чейин Бишкек шаарынан «Ала-Арча» жаратылыш паркына чейин автобус каттамы уюштурулат.

Толук маалымат сүрөттөрдө. 👉

Бишкектеги №31 мектепте окуучунун өлүмү боюнча экспертиза дайындалды. Милиция окуяга күбө болгон мектеп окуучуларын жана мугалимдерди да суракка алууда.

Бул тууралуу ички иштер министринин орун басары Октябрь Урмамбетов парламенттин 17-апрелдеги жыйынында айтты.

Ал эске салгандай, окуя 15-апрелде саат 17:35 чамасында болгон. Чырдашуунун кесепетинен 7-класстын окуучусу А.А классташын уруп жиберип, ал эсин жоготкон. Кыз дарыгерлер келгенге чейин каза болгон.

Кылмыш-жаза кодексинин “Ден соолукка оор залал келтирүү” беренеси менен кылмыш иши козголду.

Билим берүү жана илим министри Догдуркүл Кендирбаева билдиргендей, иликтөөнүн жыйынтыгында алар мыйзам чегинде жооп беришет.

«Пайдубалы урап калган». Депутат курулуп жаткан мектептердин сапатына нааразы

Жогорку Кеңештин депутаты Эрулан Көкүлов өлкөдө салынып жаткан мектептердин сапатын көрүп чыкканын парламенттин 17-апрелдеги жыйынында айтты.

Ал өзү тартып келген видеолорду көрсөтүп, курулуш министрлигинин ишин сындады.

Мисал катары, жакында спикер Нурланбек Тургунбек уулунун катышуусунда ачылган ФАПтын имараты демонтаждалып жатканын, ушундай эле окуя Караколдо да болгонун айтты.

Ал жерде эки кабаттуу мектептин имараты курулуп жаткан, бирок курулуш маалында кирпичтери түшүп, пайдубалы урай баштаган.

Ал эми Чүйдүн Беловодское айылында бир мектепти күйүп калган кирпичтен салып жатышканын айтып, ушундай курулуштар өлкө боюнча бар экенин өзү көрүп чыкканын билдирди.

Депутат өлкө башчыга кайрылып, Нурдан Орунтаев башында турган курулуш министрлигинин ишин сындады.

Бишкектеги №31 мектекте окуучу классташынын соккусунан улам каза болду. Ал кыз 7-класстын окуучусу болчу.

Бишкек шаарынын мэриясынын билим берүү департаментинин жетектөөчү адиси Мээрим Халиалдаева окуянын чоо-жайын айтып берди.

Толугу менен видеодон көрүңүз. 👉

Кыргызгидромет билдиргендей, 17-апрелде Баткендин көпчүлүк аймактарында, Ош, Жалал-Абад облустарынын айрым жерлеринде жаан жаайт. Бийик тоолуу райондордо кар жаайт.

«ҮЙ ЖАКТЫБЫ?» ПРЕЗИДЕНТ ИПОТЕКАЛЫК БАТИРЛЕРДИ КӨРҮП ЧЫКТЫ

Бүгүн, 16-апрелде дагы 476 үй-бүлөгө Мамлекеттик ипоткалык компания тарабынан салынган турак жайлар берилди.

Президент Садыр Жапаров Бишкекте эле эмес, бардык облус, райондордо ипотекалык үйлөр курулуп жатканын айтты. Сүйлөп бүткөндөн кийин ипоткага берилген батирлерди көрүп чыкты.

Май айынын ортосунда дагы 250 үй-бүлөгө ипотекалык батирлер тапшырылат.

Ушул күндө Кыргызстан боюнча мамлекеттик ипотекалык компаниянын алкагында 60 миңден ашуун батирдин курулушу жүрүп жатат.

17-апрелде түнкүсүн жана эртең менен Кыргызстандын түндүк аймактарында үшүк жүрөт. Бул тууралуу Кыргызгидромет борбору маалымдады.

Түнкүсүн жана эртең менен Чүй, Талас облустарынын тоо этектеринде, Ысык-Көл, Нарын облустарынын дыйканчылык аймактарында абанын температуасы 0…-2 градуска чейин төмөндөп, үшүк жүрүшү күтүлөт.

Мындай үшүк мөмө-жемиш өсүмдүктөрүнүн бүчүрлөрүнө, гүлдөрүнө жана мөмөлөрүнө, мөмө-жемиш өсүмдүктөрүнө кооптуу.

📌Бишкектеги "Ала-Арча" соода борбору сатыкка коюлду

Мамлекеттик мүлктү башкаруу боюнча агенттик Бишкек шаарындагы “Ала-Арча” соода-оюн-зоок борборун сатыкка чыгарды. Борбор 10 740 чарчы метр жери менен 1 млрд 244 млн 312 миң сомго аукционго коюлду.

Мындан тышкары, бир катар объектилер, анын ичинде, “Томми молл” соода борбору, Чүйдүн Беловодск айылындагы миң чарчы метр жер тилкеси, Бишкектеги Ажыбек Баатыр көчөсүндөгү батир, Галерея-миллениум объектиси электрондук сатыкка коюлду.

Борбордогу Чыңгыз Айтматов проспектисинде жайгашкан “Ала-Арча” соода борбору 2023-жылы Улуттук коопсуздук боюнча мамлекеттик комитет тарабынан кылмыш иши козголуп, мамлекетке алынган.

Жогорку Кеңештин депутаты Элдар Абакиров адам өлүмү катталган учурлар болгону менен тийиштүү тармактын жетекчилери жоопкерчилик тартпай жатканын сындады.

Ал 14 жаштагы окуучунун жана түрмөдө бир күндө эки кишинин өлүмү болгонун мисал келтирди.

Эске салсак, 15-апрелде Бишкектеги №31 мектепте 7-класстын окуучусу классташын уруп, окуучу кыз каза тапты.

Ошондой эле бир күндө түрмөлөрдө 62 жана 35 жаштагы эки адам каза болгон.

Жаза аткаруу кызматы алар узакка созулган оорудан улам көз жумганын билдирди.

Депутат бул тармактын жетекчилери парламентке келип ачык маалымат берүүсүн талап кылып, ишин аткара албагандар кызмат ордун бошотушу керектигин кошумчалады.

‼️Кыргызстандагы абактарда эки адам каза болду

Жазаларды аткаруу мамлекеттик кызматынын жабык мекемемелеринде жаза өтөп жаткан эки соттолуучу 14-апрелде узакка созулган оорудан улам көз жумду.

Алардын бири 62 жаштагы Ш.Т. аттуу соттолуучу. 2016-жылы Кылмыш жаза кодексинин 3 беренеси боюнча 16 жыл 6 айга эркинен ажыратылган.

Дагы бир соттолуучу 35 жаштагы А. уулу Т. жүрөктүн коронардык оорусу, инфаркт миокарда диагнозу менен көз жумган.

Ал Кылмыш жаза кодексинин "киши өлтүрүү" беренеси менен 18 жыл 4 айга эркининен ажыратылган.

№10 мекемеге кабыл алынганда текшерилип, ден соолугуна байланыштуу даттанган эмес.

Бирок 14-апрелде өзүн жаман сезип, биринчи жардам көрсөтүлгөн.

Аны Базар-Коргон шаардык ооруканасына жеткиришкен, көрсөтүлгөн медициналык жардамга карабастан соттолуучу көз жумган.

Бул факты боюнча соттук-медициналык экспертиза дайындалган.
 
Жаза аткаруу кызматы билдиргендей, соттолуучу 2016 жылы жазасын өтөп баштагандан тарта, жүрөк оорусуна байланыштуу дарылануудан өтүп турган.

Кыргызгидромет билдиргендей, 16-апрелге караган түнү Чүй, Ош, Жалал-Абад, Баткен облустарынын айрым жерлеринде жаан жаап, күн күркүрөшү мүмкүн, калган аймактарда жаан-чачын күтүлбөйт.

Күндүз Ош, Жалал-Абад, Баткен, Ысык-Көл, Нарын облустарынын көпчүлүк аймактарында, Чүй облусунун айрым жерлеринде жаан жаап, күн күркүрөйт. Талас облусунда жаан-чачын күтүлбөйт.

Толугураак видеодо 👉

Сабырбек Жумабеков учурда курулуп жаткан Травматология жана ортопедия улуттук борборунун директору болуп дайындалды. Тиешелүү тескемеге Министрлер кабинетинин төрагасы Адылбек Касымалиев кол койду.

Борбор Бишкек шаарындагы тез жардам клиникалык ооруканасынын аймагында курулууда.

Сабырбек Жумабеков 2004-2022-жылдары Бишкек травматология жана ортопедия илим изилдөө борборун жетектеп келген.

2022-жылы аталган борбор тез жардам клиникалык ооруканасы болуп өзгөртүүлгөн.

Депутат Бакытбек Марипов Орусиядагы мигранттардын укугу боюнча башкы прокурор Максат Асаналиевге кайрылып, алардын укугун ким коргойт деген суроо койду.

Башкы прокурор Орусияга нота берилгенин, жарандардын укуктары бузулганы боюнча кайрылуу болсо, чара көрүлөрүн айтты.

Тышкы саясатты Тышкы иштер министрлиги жүргүзгөндүктөн, укук коргоо органдары өз алдынча чара көрө албай турганын билдирди.

Тышкы иштер министри Жээнбек Кулубаев Москвада ур-токмокко кабылган кыргызстандыктар коопсуздуктан улам сабалган кыргызстандыктар арыз жазуудан баш тартканын айткан.

Эске салсак, 12-апрелде Москвадагы мончолордун биринде кыргызстандыктар сабалганы тууралуу видео тараган.

14-апрелде Орусиянын Кыргызстандагы элчичи Сергей Вакунов Тышкы иштер министрлигине чакырылып, бул окуяга байланыштуу нота тапшырылды.

21–27-апрель күндөрү Стамбул шаарында Кыргызстандын хоккей боюнча улуттук курама командасы дүйнө чемпионатына катышат.

Бул тууралуу Кыргызстандын хоккей федерациясынан кабарлашты.

Курама команда III дивизион боюнча А тайпасында Түштүк Африка, Люксембург, Босния жана Герцеговина, Түркмөнстан, Түркиянын командалары менен ойнойт.

Быйылкы жылдын алгачкы эки айында Кыргызстандагы орточо айлык акы 39 миң 456 сомду түздү.

Бул тууралуу Улуттук статистикалык комитеттин төрагасы Бактыбек Кудайбергенов 15-апрелде маалымат жыйынында билдирди.

Өткөн жылдын ушул мезгилине салыштырмалуу өлкөдө орточо айлык акы 17,8 пайызга өскөн.

Эмгек акы курулуш, тоо-кен өндүрүшү, маалымат жана коммуникациялар сыяктуу тармактарда өскөнү байкалган.

Мындан тышкары кыймылсыз мүлк менен операция жүргүзүү, ресторан жана мейманкана кызматтары, кесиптик, илимий-техникалык ишмердүүлүк багыттарында да эмгек акы көбөйгөнү айтылды.

Сиз бул көрсөткүч менен макулсузбу?

БАЛЫКЧЫДАГЫ ЭКОЛОГИЯЛЫК ПОСТ БУЗДУРУЛДУ

Балыкчы шаарына кире бериштеги Ысыккөл биосфералык коругунун экологиялык посту буздурулганы айтылууда. Спутник Кыргызстан маалымат агенттиги дрон менен тартылган видео жарыялады.

Шаардын кире беришинде “Кыргыз дүйнөсү” туристтик комплексин түзүү иштери башталган. Шаардын инфраструктурасын өнүктүрүүнүн алкагында кире бериштеги экопост буздурулду.

Балыкчы шаарынын кире беришинде жайгашкан экопостту алуу тууралуу сөздөр 2013-жылы эле айтылган. Ошол кездеги өкмөт экопостту алып салууну сунуштаган.

Бишкекте 9-майда “Өлбөс полк” жүрүшү өтөт. Бул тууралуу акциянын уюштуруучулары брифингде кабарлашты.

Катышууну каалагандар Түштүк магистраль менен Байтик Баатыр көчөсүнүн кесилишинде саат 8:00дө жолугат. Саат 9:00дө “Өлбөс полк” кыймылы башталат.

Жүрүш мурункудай эле Бишкек шаарындагы Масалиев жана Абдрахманов көчөлөрүнүн кесилишиндеги Түштүк дарбазадан башталып, Жеңиш аянтына чейин уланат. Иш-чара маалында бир катар көчөлөр жабык болот.

“Өлбөс полк” жүрүшү Кыргызстандын башка шаарларында да өтөт. Ош, Жалал-Абад, Кант, Кара-Балта шаарларында жана Ивановка айылында уюштурулат.

2020-жылы "Өлбөс полк" акциясы пандемиядан улам өткөн эмес. 2022 жана 2024-жылдары коомдук коопсуздукка байланыштуу бул иш-чара өткөрүлбөй келген.

Абхаз, армян номурлуу автоунааларды легалдаштыруунун баасы төмөндөдү. Тийиштүү токтомго Министрлер кабинетинин төрагасы Адылбек Касымалиев кол койду.

Эми кыймылдаткычынын көлөмү 2 литрге чейинки унаалардын ээлери 50 миң сом, 2 литрден жогору болгондор 100 миң сом төлөйт. Буга чейин бардыгы 100 миң сомдон төлөшү керек болгон.

Мындан тышкары автоунааны чек арадан алып өткөн учурдагы документи жок болсо 2024-жылдын 30-декабрында өткөн деп эсептелет.

Мыйзамдаштырылган унаалар 10-аймактын мамлекеттик каттоо белгисин алышат.

Бул өнөктүк 1-октябрда аяктайт.

Укук коргоочу Рита Карасартованы милицияга суракка алып кетишкенин кызы кабарлады.

Анын үйүндө бүгүн тинтүү болгон. Карасартова өзү тинтүү Тилекмат Күрөңов жиберген катка байланыштуу болушу мүмкүн экенин айткан. Күч органдары расмий маалымат бере элек.

Рита Карасартова буга чейин фейсбукка активист Тилекмат Күрөңовго таандык делген катты жарыялаган.

14-апрелде Тилекмат Күрөңов менен байланышы бар делген эки адам кармалган. Күрөңов өзү өлкөнүн сыртында.

Социалдык тармактарда камаз менен картөшкөнү талаага таштандыга төгүп жаткан видео тарап жатат.

Интернет колдонуучулары бул көрүнүштү ачкөздүк деп сыпаттап, нааразы болушууда.

Бул видео Кыргызстанда тартылганбы? Текшерип көрдүк.

15-апрелде өлкөнүн көпчүлүк аймагында жаан жаап, күн күркүрөйт. Бийик тоолуу райондордо карга айланат.

Батыштан соккон шамалдын ылдамдыгы секундасына 4-9 метрден, күндүн экинчи жарымында айрым жерлерде 15-20 метрге жетиши күтүлөт.

Бүгүн, 14-апрелде Тышкы иштер министрлиги Орусиянын Кыргызстандагы элчиси Сергей Вакуновду министрликке чакырды.

Бул тууралуу аталган мекемеден кабарлашты. Элчи менен 11-апрелде Москва шаарындагы "Бодрость" мончосунда Кыргызстандын жарандарын массалык кармоого байланыштуу сүйлөшүү жүргүзүлгөн.

Орус элчиси Сергей Вакунов менен министрдин орун басары Алмаз Имангазиев сүйлөшүп, Орусия бийлигине мончодогу операциянын мыйзамдуулугу, андагы жарандарга күч колдонуунун себептери боюнча маалымат берүү жана күч колдонуу негизсиз болсо, укук коргоо органдарынын өкүлдөрүнө тиешелүү чараларды көрүү өтүнүчү менен расмий нота тапшырылды.

Ошондой эле Кыргызстандын жарандарынын укуктарын коргоо боюнча натыйжалуу чараларды көрүү жана келечекте кыргыз-орус союздаштык жана стратегиялык өнөктөштүк мамилелерине доо кетире турган ушул сыяктуу жагдайларга жол бербөө өтүнүчү айтылды.

Эске салсак, 12-апрелде Москвадагы мончолордун биринде кыргызстандыктар сабалганы тууралуу видео тараган.

‼️Ош шаарында аялды өз үйүндө муунтуп өлтүрүүгө шектелип 19 жаштагы бала кармалды.
Бул тууралуу 14-апрелде шаардык ички иштер башкармалыгы кабарлады.

Милицияга Ак-Тилек кичи районунун 1987-жылы туулган жашоочусу өлтүрүлгөндүгү тууралуу маалымат түшкөн.

Окуя болгон жерге ыкчам топ жана Ош шаардык ички иштер башкармалыгынын жетекчилиги жөнөтүлгөн. Анда аял муунтуп өлтүрүлгөнү аныкталган.

Тергөөнүн маалыматы боюнча шектүү аялдын үйүнө уурулук максатында кирип, аны муунтуп өлтүрүп, андан соң унаасын уурдап кеткен. Ал мурда бул үйдө квартирант катары жашап келгени маалымдалган.

Адам өлтүрүүгө шектүү катары Жапалак айылынын 2006-жылы туулган тургуну кармалган.

❗️Москвадагы мончодо кармалган 24 кыргызстандыктын төртөө Орусиядан чыгарылат.

Бул тууралуу Эмгек, социалдык камсыздоо жана миграция министрлиги билдирди. Ал эми 20сы бошотулган.

Эмгек министрлигинин Москвадагы өкүлчүлүгү кыргызстандыктардын укугун коргоо иштерине кошулду. Алар Кыргызстандын Орусиядагы элчилиги менен бирге бул кырдаалды көзөмөлгө алып, Түндүк административдик аймак боюнча ички иштер башкармалыгына кайрылышкан.

Эске салсак, 12-апрелде Москвадагы мончолордун биринде кыргызстандыктар сабалганы тууралуу видео тараган.

Кыргызстандын Тышкы иштер министрлиги бул окуя териштирилип жатканын билдирген.

Эмгек министрлигинин маалыматына караганда, үстүбүздөгү жылдын алгачкы эки айында Москвадагы полиция бөлүмдөрүнө жана убактылуу кармоо борборлоруна 135 жарандын кызыкчылыгын коргоп 116дан ашык чыгуу болгон. Ошондой эле 9 соттук процесске катышкан.

Массалык башаламандык уюштурууга шектелгендер кармалды.

Бул тууралуу Чүй облустук ички иштер башкы башкармалыгы билдирди.

Милиция массалык баш аламандык уюштурууга шек саналган эки адам чет өлкөдө жүргөн активист Тилекмат Кудайберген уулу (Күрөңов) менен байланышы бар экенин билдирди.

Милициянын маалыматына караганда, уюшкан кылмыштуу топтордун мүчөлөрү жана жарандык активисттер биригип, Чүй облусунда жана өлкөнүн башка аймактарында массалык башаламандыктарды, нааразылык акцияларды өткөрүүгө даярдык көргөн.

Ыкчам-иликтөө иш-чараларынын жүрүшүндө Жалал-Абад облусунун Токтогул районунун 47 жаштагы тургуну (С.Ф.) кармалды.

Андан тышкары Ош облусунун Кара-Суу районунун 27 жаштагы (М.О.) жашоочусу кармалып, убактылуу кармоочу жайга киргизилди.

Ага “кылмыштуу топтун мүчөлөрүнө каражатты легалдаштырууга, банктык операцияларды жүргүзүүгө жардам берген жана Тилекмат Кудайберген уулунун, башка адамдардын чагымчыл видеолорун социалдык тармактарда фейк аккаунттар менен жайылткан” деген айып тагылууда.

Кыргызстандын Тышкы иштер министрлиги Москвадагы мончо комплекстеринин биринде Кыргыз Республикасынын жарандары тартылган видеотасма жарыяланганына байланыштуу билдирүү таратты.

Кыргызстандыктарды документтери бар-жоктугун жана мыйзамдуулугун текшерүү үчүн Орусиянын Ички иштер министрлигинин Москва шаарынын Тимирязевский району боюнча башкармалыгына алып барышкан.

Кыргызстандын Орусиядагы элчилиги ал жерге барган жана абалды тактоо үчүн кыргызстандыктарга укуктук конституциялык жардам көрсөтүлүп жатканы кабарланды.

Ошол эле учурда рейд учурунда Орусиянын укук коргоо органдарынын мыйзамсыз аракеттери тууралуу маалымат такталып жатат.

12-апрелде депутат Жанар Акаев Орусияда мончолордун биринде кыргызстандыктарга күч колдонулганы жөнүндө сүрөт, видеолорду фейсбукка жарыялады.

#БулЖумада: Бакиев келиши мүмкүн, Бабанов мүлкүн легалдаштырган, аткаминерлер пиар менен алек болбошу керек.

Бул жана башка орчундуу окуялар тууралуу видеодо👉

📌Шаардык сот журналист Канышай Мамыркулованы абакта калтырды;

📌Апрель революциясына 15 жыл;

📌Беш жылга кесилген активист Азамат Ишенбеков абактан чыкты;

📌Ташиев Бакиев Кыргызстанга келсе камаларын айтты;

📌Аида Салянова Елисеевдин иши боюнча акталганын билдирди;

📌Пенсиянын өлчөмү жогорулайт. Канчага? 

Өткөн аптада болгон маанилүү окуялар тууралуу сүрөттөрдө.👉

Бул тестте дүйнөнүн ар кайсы бурчундагы кызыктуу фактылар, уникалдуу өлкөлөр, белгилүү шаарлар жана табигый кереметтер боюнча билимиңди сынап көрө аласыз.

Тестке шилтеме 👇

https://pk.kg/news/inner/testten-t-p-d-jn-taany-yz-lk-l-r-bojuncha-10-suroo/

Мамлекеттик ипотекалык компания курган батирлерди алуу жеңилдегенин президент Садыр Жапаров 11-апрелде Бишкектеги Чыңгыз Айтматов проспектине тургузулган ипотекалык батирлерди ээлерине тапшыруу учурунда айтты.

Анын маалыматына караганда, мамлекеттик иште иштегендерге 4 пайызга, ал эми жеке жактарга 8 пайызга чейин төмөндөдү, алдын ала төлөмү жок 25 жылга бериле баштады.

1-2 бөлмөлүү батир бала-чакалуу болгон сайын тар боло баштаса аны кененирээк батирге алмаштыруунун жолу да сунушталып жатат.

Ал жакынкы күндөрү борбордун Маликов көчөсүндөгү 600гө жакын батир жана ошондой эле Жалал-Абад шаарында салынган 1,5 миң бартир кезекте турган жарандарыбызга тапшырыларын кошумчалады.

Ал ошондой эле бүгүнкү күндө Мамлекеттик ипотекалык компаниянын уставдык капиталы 80 миллиард сомдон ашканын, бул аны Кыргызстандагы мындай ири капиталы бар жападан жалгыз мамлекеттик ишканага айлантканын белгиледи.

❗️УКМКнын төрагасы Камчыбек Ташиев Курманбек Бакиев боюнча Конституциялык соттун чечими тууралуу Фейсбук баракчасына билдирүү жазды.

“Кечээ Конституциялык соттун Бакиев боюнча чыгарган чечимине бүгүнкү бийликтин эч кандай тиешеси жок.

Конституциялык сот көз карандысыз.

Бакиев боюнча Жогорку соттун өкүмү күчүндө турат.

Ошондуктан эгер Бакиев Кыргызстанга келе турган болсо чек арадан өтөөрү менен камалат”, — деди Ташиев.
Конституциялык сот 2010-жылы Апрель ыңкылабында бийликтен кулатылган Курманбек Бакиев боюнча чыккан сот өкүмү кайра каралууга жатат деген чечим чыгарды.

Жогорку Кеңештин депутаты Бактыбек Сыдыков майыптыгы бар балдардын саны өсүп жатканын белгилеп, мындай учурларда «төрөлбөй жатып алдын алуу үчүн мамлекеттик программа» керек экенин айтты.

Анын маалыматына караганда, Даун синдрому, ДЦП жана аутизм менен төрөлгөн балдардын саны өсүп жатат жана бул мамлекетке да, үй-бүлөгө да оорчулук жаратат.

“ПолитКлиника” медиасы бул маселе боюнча фактыларды, эл аралык тажрыйбаларды карап, талдап көрдү.

Толугу менен видеодо👆

📌Пенсиянын өлчөмү жогорулайт. Канчага?

Кыргызстанда 780 миңден ашык пенсионер бар жана жыл сайын алардын саны 3-4 пайызга көбөйөт.

Социалдык фонддун төрагасы Бактияр Алиев, пенсияны эсептөөдө орточо эмгек акы менен инфляциянын көрсөткүчү эске алынарын билдирди.

Жалпысынан быйыл пенсия 7 пайызга көтөрүү пландалган. Ошол эле учурда быйылкы жарым жылдагы камсыздандыруу төгүмдөрүн эсептеп, пенсияны 7 пайыздан да көбүрөөк көтөрүү пландалып жатат.

11-апрелде түнкүсүн жана күндүз Ысык-Көлдүн чыгыш тарабында, Нарын облусунда жаан жаап, күн күркүрөйт. Калган аймактарда жаан-чачын болбойт.

Батыштан келген шамалдын ылдамдыгы секундасына 4-9 метр, Ысык-Көл, Нарын облустарынын айрым жерлеринде 15-20 метрге жетет.
Кененирээк видеодо👉

Жогорку Кеңеш Кылмыш-жаза кодексине 109-беренени “Жалган (анык эмес) маалымат таратуу” деген беренени мыйзамга киргизүүнү сунуштаган өзгөртүүлөрдү биринчи окууда кабыл алды.

Интернетте жана жалпыга маалымдоо каражаттарында так эмес, жалган маалымат тараткандарга айып салуу каралган.

Сот тарабынан маалыматтын жалган же анык эмес экенин аныкталса, жеке жактарга 20 миң сом, андай маалыматты чыгарган медиага 65 миң сом айып пул салынат.

Ички иштер министринин орун басары Нурбек Абдиев акыркы убакта интернетте башка бирөөнүн атынан жалган маалымат тараткандар көп болуп жатканын айтты.

Талкуу маалында депутат Дастан Бекешев мыйзам долбоору бир гана жарандарга карата иштебеши керектигин, айрым сөздөрү үчүн чиновниктер да жоопко тартылса адилеттүү болорун билдирди.

Ал айрым маалыматтар бүгүнкү күндө жалган болсо, убакыттын өтүшү менен ал чындык маалымат экени аныкталышы мүмкүн экенин, мындайда ким жоопко тартыларын сурады.

Нурбек Абдиев мындай суроолорго толук кандуу жооп бере алган жок.